Ine. Kechi bejifuukwijile jimo juba ja kufwa ne. Baibolo naye kechi walumbululapo amba juba ja kufwa bejifuukwijile jimo ne. Walumbululatu’mba bantu bafwa na mambo a “bintu bibasolomokelatu.”—Musapwishi 9:11.

Nanchi Baibolo kechi waamba’mba kuji ‘kimye kya kufwilamo’ nenyi?

 Ee byo byoaamba. Musapwishi 3:2 waamba’mba “ko kiji kimye kya kusemekelwamo ne kya kufwilamo; kabiji kuji kimye kya kujimbilamo ne kimye kya kuyokwelamo byajimbilwe.” Nangwa byonkabyo, kino kyepelo kibena kwambatu pa bintu bimwekela bantu mu bwikalo bwabo. (Musapwishi 3:1-8) Lesa kechi wafuukwijile jimo juba muntu jo a kafwa ne, nabiji byonka byo a lengela njimi kuyuka kimye kya kubyajilamo nkunwa. Onkao mambo, kechi twafwainwa kutesha muchima ku bintu bya ku mubiji kya kuba twalubako kwi Mulenga wetu ne.—Musapwishi 3:11; 12:1, 13.

Muntu wakonsha kwikala moba avula

 Nangwa kya kuba bintu bimo bitusolomokelatu, twakonsha kwikala moba avula inge kya kuba saka tufuukula bulongo. Baibolo waamba’mba: “Mafunjisho a ba maana yo nsulo ya bumi, amubula muntu bya kusezha bitewa bya lufu.” (Byambo bya Mana 13:14) Ne Mosesa byobyo abuujile bena Isalela amba inge saka bakokela mikambizho ya Lesa ‘bakekala moba avula.’ (Mpitulukilo ya mu mizhilo 6:2) Kuba bintu byatama kwakonsha kwitulengela kufwa bukiji.—Musapwishi 7:17.

 Twakonsha kufwa nangwa tuji na maana nangwa twajimuka. (Loma 5:12) Nangwa byonkabyo bintu bikekala bulongo kulutwe mambo Baibolo walaya’mba “lufu kechi lukekalako jibiji ne.”—Lumwekesho 21:4.