Byambo bya kuba’mba “kusemwa jibiji” bilumbulula kwikala na bulunda bupya na Lesa ne muntu wasemwa jibiji. (Yoano 3:3, 7) Lesa utongola boba basemwa jibiji kwikala baana banji. (Loma 8:15, 16; Ngalatiya 4:5; 1 Yoano 3:1) Popamotu ne boba balondela mizhilo bo asala, bwikalo bwabo bupimpulwa kabiji bekala lubaji lwa kisemi kya Lesa.—2 Kolinda 6:18.

Mambo ka o kwikela “kusemwa jibiji” ku muntu?

 Yesu waambile’mba: “Umvwe muntu wabula kusemwa jibiji, kechi wakonsha kumona Bufumu bwa Lesa ne.” (Yoano 3:3) Kusemwa jibiji kulengela muntu kulama pamo ne Kilishitu mu Bufumu bwa Lesa mu kimye kya kulutwe. Buno Bufumu bulamina mwiulu, onkao mambo, Baibolo walumbulula “kusemwa jibiji” kwamba pa buswanyi bo ‘bebalamina mwiulu.’ (1 Petelo 1:3, 4) Aba basemwa jibiji bashiinwa’mba bakalama pamo ne Kilishitu “nobe bamfumu.” —2 Timoti 2:12; 2 Kolinda 1:21, 22.

Muntu usemwa jibiji byepi?

 Yesu byo afunjishenga pa uno mutwe, waambile’mba aba basemwa jibiji ‘bakasemwa ku mema ne ku mupashi.’ (Yoano 3:5) Bino byambo bilumbulula kubatizhiwa mu mema apa bino palondela kubatizhiwa na mupashi wazhila.—Byubilo 1:5; 2:1-4.

 Yesu ye muntu wajinga mutanshi kusemwa jibiji. Bamubatizhe mu Mukola wa Yodano, panyuma, Lesa wamushingile (nangwa’mba kumubatizha) na mupashi wazhila. Onkao mambo, Yesu wasemekelwe jibiji kwikala mwana Lesa wa ku mupashi kabiji wajinga na luketekelo lwa kubwela mwiulu. (Mako 1:9-11) Lesa wafikizhe luketekelo lwanji byo asangwile Yesu kwikala kilengwa kya mupashi.—Byubilo 13:33.

 Bantu bakwabo basemwa jibiji nabo bebabatizha mu mema saka bakyangye kutambula mupashi wazhila. a (Byubilo 2:38, 41) Onkao mambo, bekala na luketekelo lwa kuya mwiulu, kabiji kino kimweka inge Lesa wibasangula.—1 Kolinda 15:42-49.

Bintu bya bubela byaamba pa kusemwa jibiji

 Bubela: Muntu wakonsha kwifuukwilapo kusemwa jibiji.

 Kishinka: Lesa wapana kimye kya kukwasha bantu bonse kwikala na bulunda ne aye ne kupuluka. (1 Timoti 2:3, 4; Yakoba 4:8) Nangwa byonkabyo, Lesa usala bafwainwa kusemwa jibiji nangwa kushingwa na mupashi wazhila. Kabiji kwesakana na byamba Baibolo, kusemwa jibiji ‘kechi kwaimena pa kintu muntu kyo akeba nangwa kyo oba ne, bino kyaimena pe Lesa.’ (Loma 9:16) Byambo bya kuba’mba “kusemwa jibiji” byakonsha ne kulumbulula “kusemwa mwiulu,” kino kyamwesha kuba’mba nsajilo ya boba basemwa jibiji ifuma ‘mwiulu,’ nangwa’mba kwi Lesa.—Yoano 3:3, tubyambo twa munshi.