Baibolo kechi waingijishapo byambo bya kuba’mba “kufumya jimi” kwamba pa kwipaya kya nshiji mwana uji munda ne. Pano bino, Binembelo byavula bimwesha kuba’mba Lesa wanemeka bingi bumi bwa muntu, kuvwangakotu ne bwa mwana ukyangye kusemwa.

 Bumi ke bupe bwafuma kwi Lesa. (Ntendekelo 9:6; Salamo 36:9) Lesa wanemeka bumi bwa bantu bonse, kuvwangakotu ne bumi bwa mwana uji munda. Onkao mambo, inge muntu waipaya kya nshiji mwana uji munda, ko kuba’mba waipayañana.

 Mizhilo Lesa yo apeele bena Isalela yaambile’mba: “Umvwe banabalume babena kulwa kabiji basakula mwanamukazhi uji na jimi, ne aye wasema mwana mubishi, bino kafwako wafwa ne, awo wasakulañana wafwainwa kupana kintu kyonse kyo bakamutongwela ku mwine mwina mukazhi; kabiji kintu kyo bakamutongwela wafwainwa kwikipana ku bamitonyi. Bino umvwe pamweka lufu, mwafwainwa kupana bumi pa bumi.”—Kulupuka 21:22, 23. a

•  Ñanyi kimye kitendeka bumi bwa muntu?

•  Nanchi Lesa wakonsha kulekela muntu mambo wafuminye jimi nyi?

•  Nanchi kyatama kufumya jimi inge bumi bwa inanji nangwa bwa mwana buji mu kizumba nyi?

 Inge mwana bamwimita mu jivumo, Lesa umona uno mwana kuba’mba muntu mumi. Mu Mambo anji Baibolo, Lesa umwesha kuba’mba mwana ukyangye kusemwa ke muntu. Twayai twisambe pa binembelo bimo bimwesha patoka kuba’mba Lesa wanemeka bumi bwa mwana uji munda ne bwa mwana wasemwa kala.

•   Davida bamutangijile na mupashi kwamba kwi Lesa amba: “Meso enu ammwene saka nji munda.” (Salamo 139:16) Lesa wamumonanga Davida kuba’mba muntu saka akyangyetu ne kusemwa.

•   Kabiji Lesa wayukile’mba ukapa mwingilo wanema bingi ngauzhi Yelemiya saka akyangyetu ne kusemwa. Lesa wamubuujile’mba: “Saka nkyangye kukulenga munda mwa inobe, amiwa nakuyukile. Kabiji saka ukyangye kusemwa, nakusajile kwingila mwingilo wazhila. Nakutongwele kwikala ngauzhi ku bisaka bya bantu.”—Yelemiya 1:5.

•   Nembi wa Baibolo aye Luka, wajinga dokotala, waingijishe kyambo kintutu kimo kya Kingiliki pa kwamba pa mwana ukyangye kusemwa ne pa mwana wasemwa kala.—Luka 1:41; 2:12, 16.

 Lesa wakonsha kulekelako muntu mambo wafumishepo kala jimi. Inge wafunda ne kuyuka’mba Lesa wanemeka bumi, kechi wafwainwa kwikala na jiwi jibena kumukatazha ne. “Yehoba ye wa lusa ne kifyele . . . Byonkatu musela byo aji kwalepa na muzhika, Byo byo abika kwalepa mizhilulwila yetu.” b (Salamo 103:8-12.—Salamo 103:8-12) Yehoba ulekelako mambo bonse balapila kufuma panshi ya muchima pa bintu byatama byo baubile kala, kuvwangakotu ne kufumya jimi.—Salamo 86:5.

 Kwesakana na byaamba Baibolo pa bumi bwa mwana ukyangye kusemwa, kyatama kufumya jimi na mambo a kuba’mba bumi bwa inanji nangwa bwa mwana buji mu kizumba.

 Pano kyakonsha kwikala byepi inge pa kupaapa bintu byakatazha kya kuba kekikebewe kupulushamo bumi bwa inanji nangwa bwa mwana? Inge kyaikala bino, bantu bavwangiwamo bafwainwa kwifuukwilapo abo bene kana bumi bwa wepi bo basakupulushapo.