Kafwako muntu nangwa umo wamonapo kala Lesa ne. (Kulupuka 33:20; Yoano 1:18; 1 Yoano 4:12) Baibolo waamba’mba, “Lesa Mupashi” ko kuba’mba kafwako muntu wakonsha kumumona ne.—Yoano 4:24; 1 Timoti 1:17.

 Nangwa byonkabyo, bamalaika bo bamona Lesa mambo nabo bilengwa bya mupashi. (Mateo 18:10) Pano bino kuji bantu bamo bafwa pa kusanguka bakaya mwiulu. Bakamumona Lesa mambo bakekala na mubiji wa mupashi.—Filipai 3:20, 21; 1 Yaono 3:2.

 Baibolo wingijisha kyambo kya kumona mu bukifwanyikizho kulumbulula kuyuka. (Isaya 6:10; Yelemiya 5:21; Yoano 9:39-41) Kino kibena kulumbulula’mba muntu wafwainwa kumona Lesa luno na ‘meso a muchima wanji’ ne kwikala na lwitabilo, ko kuba’mba kumuyuka ne kuyuka byubilo byanji. (Efisesa 1:18) Baibolo waambapo mashinda a kukoseshamo lwitabilo.

•   Bintu Lesa byo alenga bitufunjisha kuyuka byubilo byanji nabiji butemwe, bumpanyi, maana ne bulume. (Loma 1:20) Yoba byo bamuvulwileko pa mwingilo wa Lesa wa kulenga bintu wamwene nobe ubena kumona Lesa.—Yoba 42:5.

•   Kufunda Baibolo kukemukwasha kuyuka Lesa. Baibolo witubuula’mba: “Umvwe obewa wamukeba ukamutaana.”—1 Byambo bya Moba 28:9; Salamo 119:2; Yoano 17:3.

•   Kufunda bwikalo bwa kwa Yesu kwakonsha kwimukwasha kuyuka Lesa. Yesu waambile’mba, “Awa wammona, wamona ne Batata.” Waambile bino, mambo wamwesheshe byubilo bijipo ne Shanji, Yehoba Lesa.—Yoano 14:9.

•   Ikalainga bwikalo butokesha Lesa ku muchima, pa kuba’mba mumone byo akemukwashanga. Yesu waambile’mba: “Bo bene balusekelo baji na michima yatoka, mambo bakamumona Lesa.” Monka mo twaambilapo kala bantu bamo bamutokesha Lesa pa muchima bakasanguka ne kuya mwiulu. Bano “bakamumona Lesa.”—Mateo 5:8; Salamo 11:7.

 Aa mashimikila a mu Baibolo aamba nobe bantu bamo bamumwene Lesa amwesha’mba bamumwene kupichila mwi malaika nangwa mu kimwesho.

 Bamalaika.

Mu moba a kala, Lesa watumanga bamalaika kumwimenako pa kwisamba na bantu mu jizhina janji. (Salamo 103:20) Kimye kimo, Lesa wisambile ne Mosesa mu kipupu kyatemenenga mujilo, kabiji Baibolo walumbulula amba “Mosesa wafile kilungi kyanji mambo wajinga na moyo wa kubula kukeba kumona Lesa wa kine.” (Kulupuka 3:4, 6) Mosesa kechi wamwene Lesa ne, kino kyepelo kyamwesha’mba wamwene “malaika wa Yehoba.”—Kulupuka 3:2.

 Kyo kimotu umvwe Baibolo waamba’mba Lesa “wisambilenga na Mosesa sa betala kilungi ne kilungi,” kilumbulula kuba’mba wisambilenga nanji byonka muntu byo esamba na mulunda nanji wa pa muchima. (Kulupuka 4:10, 11; 33:11) Mosesa kechi wamwena kilungi kya Lesa ne, bino watambwile Mizhilo yo bamupele “kupichila mu bamalaika.” (Ngalatiya 3:19; Byubilo 7:53) Nangwa byonkabyo, lwitabilo lwa kwa Mosesa lwakosele bingi mambo Baibolo wamulumbulula’mba wamwenenga uba “nobe ubena kumona awa ubula kumweka.”—Bahebelu 11:27.

 Lesa wisambilenga na Abalahama kwingijisha bamalaika byonkatu byo esambanga ne Mosesa. Kutangatu Baibolo kya lubilo lubilo kwakonsha kulengela kumona nobe Abalahama wamwene Lesa. (Ntendekelo 18:1, 33) Nangwa byonkabyo, kino kyepelo kyamwesha’mba aba “banabalume basatu” baishile kwi Abalahama bajinga bamalaika bo batumine kwi Lesa. Abalahama wayukile amba babena kwimenako Lesa kabiji wisambilenga nabo uba nobe ubena kwamba na Yehoba.—Ntendekelo 18:2, 3, 22, 32; 19:1.

 Bimwesho.

Lesa wamwekapo kala ku bantu mu bimwesho. Baibolo byo aamba’mba Mosesa ne bena Isalela “bamwene Lesa wa Isalela,” “bamumwene Lesa” mu kimwesho. (Kulupuka 24:9-11) O ene mambo kimye kimo Baibolo kyo ambila’mba bangauzhi ‘bamwene Yehoba.’ (Isaya 6:1; Danyela 7:9; Amosi 9:1) Binembelo bimwesha’mba bimye byonse byo bamumonanga Lesa, kechi bamumonanga meso na meso ne, pano bino bamumwenanga mu kimwesho.—Isaya 1:1; Danyela 7:2; Amosi 1:1.