‘Kwamba mu njimi ingi’ kulumbulula bulume bwa kukumya bwajinga na bena Kilishitu batanshi bwibalengejile kwamba milaka yo babujile kufunda ne. (Byubilo 10:46, Buku wa Lesa) Bantu bayukile ino milaka baumvwinenga byo baambilenga. (Byubilo 2:4-8) Kwamba mu njimi ingi kyajinga kya bupe kya mupashi wazhila Lesa ye aitulwijile pa bena Kilishitu batanshi.—Bahebelu 2:4; 1 Kolinda 12:4, 30.

•  Ñanyi kimye bantu kyo batendekele kwamba mu njimi ingi kabiji kwepi?

•  Ki ka kyalengejile kuba’mba bambenga njimi ingi?

•  Nanchi kwamba mu njimi ingi kwafwainwe kutwajijila nyi?

•  Ñanyi kimye bantu kyo balekele kwamba mu njimi ingi?

•  Nanchi bantu baji na kya bupe kya kwamba mu njimi ingi lelo jino nyi?

•  Twakonsha kuyuka byepi bena Kilishitu ba kine?

 Kino kya kukumya kyamwekele mu Yelusalema lukelo pa juba ja Kijiilo kya Pentekosita mu mwaka wa 33 C.E. Baana ba bwanga ba kwa Yesu nobe 120 bakonkene pamo kabiji “bonse bayujile mupashi wazhila ne kutatula kwamba mu milaka yapusana pusana.” (Byubilo 1:15; 2:1-4) Jibumba jikatampe ja bantu “bafumine mu byalo byonse” bapwijile, kabiji “muntu yense wibomvwine saka bamba mu mulaka wanji.”—Byubilo 2:5, 6.

1.   Kumwesha kuba’mba Lesa wakwashishenga bena Kilishitu. Kala, Lesa waubanga biyukilo bya kukumya pa kuba’mba amwesha’mba ubena kukwasha bantu ba kishinka, byonka byo aubile kwi Mosesa. (Kulupuka 4:1-9, 29-31; Kubala 17:10) Kwamba mu njimi ingi nako kwamwesheshenga kuba’mba Lesa wakwashishenga kipwilo kya bena Kilishitu kyalengelwe pa kyokya kimye. Mutumwa Paulo wanembele’mba: “Kwamba mu njimi ingi kechi kyo kiyukilo kya baitabila ne, ke kya boba babula kwitabila.”—1 Kolinda 14:22.

2.   Kukwasha bena Kilishitu kushimuna bulongo bukamonyi. Aba baumvwine byaambilenga baana ba bwanga ba kwa Yesu pa juba ja Pentekosita baambile’mba: “Tubena kwibomvwa saka bamba pa mingilo ikatampe ya Lesa mu milaka yetu.” (Byubilo 2:11) Onkao mambo, kintu kikwabo kyalengejile Lesa kuba kino kya kukumya ke kukwasha bena Kilishitu “kushimuna bulongo” bukamonyi ne “kufunjisha bantu ba mu bisaka byonse bya bantu kwikala ke baana . . . ba bwanga,” byonka bibakambizhe Yesu. (Byubilo 10:42; Mateo 28:19) Bantu bamwene kino kya kukumya bajinga nobe 3,000 kabiji baumvwine bukamonyi bo bashimwine kabiji baikele baana ba bwanga pa jonkaja juba.

 Ine. Bya bupe bya mupashi wazhila, kubikapo ne kya kwamba mu njimi byajingatu bya pa kimye kicheche. Baibolo waambijile jimo amba: “Umvwe kuji bya bupe bya kwaula, bikapwa; umvwe kuji kwamba mu njimi, kukapwa.”—1 Kolinda 13:8.

 Javula bena Kilishitu batambulanga bya bupe bya mupashi wazhila kupichila mu bena Kilishitu bakwabo, kikatakata kupichila mu kwibatenteka maboko ku batumwa. (Byubilo 8:18; 10:44-46) Pano bino, kyamweka aba batambwile bya bupe bya mupashi kufuma ku batumwa kechi bajinga na bulume bwa kupako bakwabo ne. (Byubilo 8:5-7, 14-17) Byonkatu byo kikala ku wa mwingilo mu kafulumende. Wakonsha kupa muntu kitupa kya kwendesheshapo motoka, pano awa ye bapa kino kitupa kechi bamupa luusa lwa kupana kitupa ku muntu mukwabo ne. Kwamba mu njimi kyamweka kwapwile kimye kyafwile batumwa ne boba batambwile kino kya bupe kupichila mu kwibatenteka maboko ku batumwa.

 Kya bupe kya kwamba mu njimi ingi kyapwile kimye kyafwile batumwa mu myaka kitota kitanshi C.E. Lelo jino kafwako wakonsha kwipuma mu kyaji amba wamba mu njimi na mambo a bulume bwa Lesa ne. a

 Yesu waambile’mba butemwe bo bukayukanyikilwangako baana banji ba bwanga. (Yoano 13:34, 35) Mutumwa Paulo naye wafunjishe kuba’mba butemwe bukatwajijila kwikala kayukilo ka bena Kilishitu ba kine. (1 Kolinda 13:1, 8) Wamwesheshe kuba’mba mupashi wa Lesa ukakwasha bena Kilishitu kwikala na byubilo byatongolwa’mba “bipangwa bya mupashi,” kabiji kyubilo kitanshi kyatongolwa ke butemwe.—Ngalatiya 5:22, 23.