Kwikala bazhila kulumbulula kwipaatulako ku byubilo byatama. Kyambo kya Kihebelu kyatuntululwa’mba “bazhila” kyafuma ku kyambo kilumbulula “kwipaatula.” Onkao mambo, kwikala bazhila kulumbulula kwipaatula ku byubilo bimo, nangwa kwizhijika, kikatakata kwikala na byubilo byawama.

 Lesa ye wazhila mu bintu byonse. Baibolo wamba’mba: “Kafwako muntu mukwabo wazhila nobe Yehoba ne.” a (1 Samwela 2:2) Onkao mambo, twafwainwa kwikala bazhila byonka bikeba Lesa.

 Kyambo kya kuba’mba “kyazhila” kilumbulula kintu kyonse kyalamata ku kupopwela Lesa, kikatakata bintu byo bapaatula bya kwingijishatu mu bupopweshi. Abino byo bintu bimo Baibolo byo aambapo:

•   Mapunzha azhila: Lesa wabuujile Mosesa kwipi na kipupu kyatemenenga mujilo amba: “Pa mpunzha po waimana pazhila.”—Kulupuka 3:2-5.

•   Kupwila kwazhila: Bena Isalela bapopwelanga Yehoba kimye kyonse pa bijiilo bya pa mwaka pa mwaka byatelwanga’mba “kushonkena kwazhila.”—Bena Levi 23:37.

•   Bintu byazhila: Bintu byo baingijishanga pa kupopwela Lesa mu nzubo ya Lesa yajinga mu Yelusalema bebitelanga’mba ‘bipe byazhila.’ (1 Bamfumu 8:4) Abino bintu byazhila bebinemekanga nangwa kya kuba kechi bafwainwe kwibipopwela ne. b

 Ee. Lesa wakambizha bena Kilishitu amba: “Mwafwainwa kwikala bazhila, mambo amiwa nazhila.” (1 Petelo 1:16) Ibyo kuba’mba bantu bambulwa kulumbuluka kechi bakonsha kwikala bazhila byonka biji Lesa ne. Nangwa byonkabyo, bantu bakookela mizhilo yaoloka ya Lesa bakonsha kwibamona’mba ‘bazhila, baitabilwa kwi Lesa.’ (Loma 12:1) Muntu wibikako kwikala wazhila umwesha kino mu byubilo ne mu byambo byanji. Ulondela lujimuno lwa mu Baibolo lwa kuba’mba “mwafwainwa kwikala bazhila ne kuchina bulalelale” ne lwa kuba’mba “ikalai bazhila mu byubilo byenu byonse.”—1 Tesalonika 4:3; 1 Petelo 1:15.

 Ee. Inge muntu waleka kulondela mizhilo ya Lesa ya byubilo byawama, Lesa wakonsha kuleka kumona uno muntu amba wazhila. Buku wa mu Baibolo wa Bahebelu banembejile ‘balongo bazhijikwa,’ pano bino, wibajimwineko kubula kwikala “na muchima watama wa kubula lwitabilo na mambo a kufuma kwi Lesa mumi.”—Bahebelu 3:1, 12.

 Mulanguluko wabula kuyilamo: Kubula kusongola nangwa kusongolwa kulengela muntu kwikala wazhila.

 Kishinka: Nangwa kya kuba bena Kilishitu bakonsha kusalapo kubula kutwela mu masongola, pano bino, kubula kutwela mu masongola kechi ko kulengela muntu kumumona kwi Lesa amba wazhila ne. Ibyo kuba’mba muntu wabula kutwela mu masongola wingijila Lesa bulongo kwa kubula bya kutabataba. (1 Kolinda 7:32-34) Nangwa byonkabyo, Baibolo umwesha’mba aba batwela mu masongola nabo bakonsha kwikala bazhila. Ne umo pa batumwa ba kwa Yesu aye Petelo wasongwele.—Mateo 8:14; 1 Kolinda 9:5.