Baibolo walaya’mba: “Aye uba kyaswa muchima wa Lesa ukekala myaka ne myaka.” (1 Yoano 2:17; Buku wa Lesa) Lesa ukeba’mba anweba mubenga byepi?

•   Yukai Lesa ne Mwananji, aye Yesu. Yesu walombele kwi Lesa amba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.” (Yoano 17:3) Ñanyi bintu byavwangwamo mu “kuyuka” Lesa ne Yesu? Twafwainwa kwibayuka kupichila mu kufunda Baibolo ne kwingijisha byo tufunda mu bwikalo bwetu. a Baibolo witubuula milanguluko ya Mulenga wetu, Yehoba Lesa, witupa bumi. (Byubilo 17:24, 25) Kabiji Baibolo witubuula byavula pa Mwananji, Yesu, yenka wafunjishe “byambo bipana bumi bwa myaka ne myaka.”—Yoano 6:67-69.

•   Itabilai mu kitapisho kya bukuzhi bwa kwa Yesu. Yesu waishile pano pa ntanda na kwingijila bantu “ne kupana bumi bwanji kwikala bukuzhi.” (Mateo 20:28) Kitapisho kya bukuzhi bwa kwa Yesu kyashinkwijile bantu jishinda ja kutambwilamo bumi bwa myaka ne myaka mu Paladisa pano pa ntanda. b (Salamo 37:29) Yesu waambile’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoano 3:16) Yukai kuba’mba kuji byavula bikebewa kechi kwambatu amba naitabila mwi Yesu konka ne. Twafwainwa kumwesha’mba tuji na lwitabilo mwi aye kupichila mu kulondela mafunjisho anji ne kuba kyaswa muchima wa Shanji.—Mateo 7:21; Yakoba 2:17.

•   Ikalai na bulunda bwakosa ne Lesa. Lesa ukeba’mba tufwenyenga kwipi ne aye ne kwikala balunda nanji. (Yakoba 2:23; 4:8) Lesa wa myaka ne myaka. Kechi ufwa ne, kabiji ukeba balunda nanji nabo kwikala myaka ne myaka. Kupichila mu Mambo anji, Lesa witubuula byo akeba kubila bonse bamukebesha amba: “Mwikale na bumi myaka ne myaka.”—Salamo 22:26.

 Mulanguluko wabula kuyilamo: Bumi bwa myaka ne myaka bukobanga mukose.

 Kishinka: Lesa witutemwa kabiji ukeba’mba twikalenga na lusekelo ye uketupa bumi bwa myaka ne myaka. (Yakoba 1:17; 1 Yoano 4:8) Wayuka kuba’mba pa kuba’mba tukekalenga na lusekelo twafwainwa kwingilanga mingilo yawama. (Musapwishi 3:12) Lesa walaya kuba’mba aba bakekala na bumi bwa myaka ne myaka pano pa ntanda, bakeyowanga mingilo yawama yo bakamwenangamo lusekelo bonse.—Isaya 65:22, 23.

 Kikwabo, aba bakekala myaka ne myaka bakatwajijila kufunda bintu bya katataka pa Mulenga wabo ne pa mingilo yanji ikatampe. Walengele bantu na muchima wa kukeba kwikala myaka ne myaka ne kufunda byavula pe aye nangwa kya kuba “kechi bakonsha kuyuka mingilo yaingila Lesa wa kine kufuma ku ntendekelo kufika ne ku mpelo ne.” (Musapwishi 3:10, 11) Onkao mambo, aba bakekala myaka ne myaka bakekala na bintu byavula bingi byo bakafundanga ne kuba.