Baibolo kechi washinkamika kwamba pa kino kintu ne. a Nangwa byonkabyo, byaamba Baibolo pa bumi ne lufu bitukwasha kuyuka bishinka. Baibolo kechi waswisha kwipayañana ne, pano bino, kechi pajipo ene mambo a kulepesha bumi bwa muntu ubena kufwa ne.

 Baibolo walumbulula’mba Lesa ye Mulenga wetu, “nsulo ya bumi.” (Salamo 36:9; Byubilo 17:28) Lesa wanemeka bingi bumi. Onkao mambo, Lesa wakanya kwipayañana nangwa mwine muntu kwiipaya. (Kulupuka 20:13; 1 Yoano 3:15) Kabiji Baibolo umwesha kuba’mba twafwainwa kwizhikijilanga ku bintu byakonsha kubika bumi bwetu ne bwa bakwetu mu kizumba. (Mpitulukilo ya mu Mizhilo 22:8) Kwambatu kine, Lesa ukeba’mba tunemeke bupe bwa bumi.

Pano kyakonsha kwikala byepi inge muntu wakolwa kya kuba kechi ukabukapo ne?

 Baibolo kechi waswisha kwipaya muntu nangwa kya kuba wakolwa bingi kabiji ubena kupembelelatu lufu ne. Kyamwekejile Mfumu Saulo kitukwasha kumvwisha kino kishinka. Byo bamukozhezhe bingi mu nkondo, waambijile kalume wanji kuba’mba amwipaye. (1 Samwela 31:3, 4) Kalume wa kwa Saulo wakaine. Pano bino, palutwe kacheche, muntu umo witumbijikile’mba ye waubile kyakebelenga Saulo. Uno muntu bamupelemo mambo a mashi kwi Davida, mambo Davida wayukile milanguluko ya Lesa pa kino kintu.—2 Samwela 1:6-16.

Nanchi twafwainwa kunungulula bumi bwa muntu nangwa kya kuba pabena kubokolatu nyi?

 Inge kya kuba’mba lufu lwafika, Baibolo kechi waambapo’mba twafwainwa kwilukanya ne. Pakuba Baibolo witukwasha kwikala na ndangulukilo yawama. Lufu ye mulwanyi mukatampe, kabiji lwaishile na mambo a bundengamambo. (Loma 5:12; 1 Kolinda 15:26) Nangwa kya kuba kafwako muntu ukeba kufwa ne, bino kechi twafwainwa kuchina lufu ne, mambo Lesa walaya’mba ukasangula bafwa. (Yoano 6:39, 40) Muntu unemeka bumi ukeba mashinda awama a kubukilwamo. Pano bino, kuba bino kechi kubena kulumbulula kukeba mashinda a kunungulwilamo bumi bwa muntu nangwa kya kuba kyamwekeshatu patoka amba bumi kafwamo ne.

Nanchi kwikujika mambo abula kulekelwa nyi?

 Ine, Baibolo kechi wabika kwikujika pa mutanchi wa mambo abula kulekelwa ne. Nangwa kya kuba muntu mwine inge wiipaya ke mambo akatampe, b Lesa uyuka bilengela bantu kufuukulapo kuba byobyo, nabiji bijikila bikatampe, nangwa’mba ayo milanguluko ya mu mashi basemwatu nayo. (Salamo 103:13, 14) Lesa wingijisha Baibolo kutekenesha bantu babena kupita mu bya malwa. Kikwabo, Baibolo waamba’mba kukekala “lusanguko lwa baoloka ne babula koloka.” (Byubilo 24:15) Kino kimwesha kuba’mba kukekala lusanguko lwa bantu babula kufuukulapo bulongo, nabiji boba bekujika.