Baibolo wamba’mba kijitu bulongo kabiji kikebewa muntu kwitemwa mwine mu kwesakanya. Buno butemwe bulumbulula muntu kwilama bulongo, kwinemeka, ne kubula kwilengulula. (Mateo 10:31) Baibolo wamba’mba muntu wafwainwa kwitemwa mwine, pano bino, kechi kukizhamo kwita muchima mwine ne.

Ñanyi ye twafwainwa kutemwa patanshi?

1.   Kutemwa Lesa kyo kintu kitanshi kyafwainwa kwikala mu muchima wetu. Baibolo ufunjisha’mba mukambizho mutanshi ke uno: “Mwafwainwa kutemwa Yehoba Lesa wenu na muchima wenu yense, ne na mweo wenu yense ne na bulume bwenu bonse.”—Mako 12:28-30; Mpitulukilo ya mu Mizhilo 6:5.

2.   Mukambizho wa bubiji ke uno: “Wafwainwa kutemwa mukwenu byonka byo witemwa obe mwine.”—Mako 12:31; Bena Levi 19:18.

3.   Nangwa kya kuba Baibolo kechi wabikapo mukambizho wa kwitemwa muntu mwine ne, bino mukambizho wa kuba’mba wafwainwa “kutemwa mukwenu byonka byo witemwa obe mwine” umwesha’mba kijitu bulongo muntu kwitemwa mwine mu kwesakanya ne kwinemeka.

Yesu watemenwe ñanyi patanshi?

 Yesu wamwesheshe butemwe bwa kutemwa Lesa, kutemwa mukwenu, ne kwitemwa mwine, kabiji wakambizhe baana banji ba bwanga kulondela mu ngayo yanji.—Yoano 13:34, 35.

1.   Watemenwe Yehoba patanshi kabiji wipaine kuba kyaswa muchima wanji. Waambile’mba: “Pa kuba’mba ba pano pa ntanda bayuke’mba natemwa Batata, mbena kuba byonka byankambizhe Batata.”—Yoano 14:31.

2.   Yesu watemenwe bakwabo, kabiji wamwesheshe kino kupichila mu kwibakwasha kufikatu ne pa kupana bumi bwanji na mambo a abo.—Mateo 20:28.

3.   Wamwesheshe byo etemenwe mwine kupichila mu kwikalapo na kimye kya kukookoloka, kuja, ne kupwanañana na baana banji ba bwanga ne bantu bo afunjishenga.—Mako 6:31, 32; Luka 5:29; Yoano 2:1, 2; 12:2.

Nanchi kutangizhako kutemwa bakwenu kwakonsha kwimulengela kubula kwikala na lusekelo ne kubula kwinemeka nyi?

 Ine, mambo twalengelwe mu kipasha kya Lesa, kabiji kyubilo kyanema kya Lesa ke butemwe. (Ntendekelo 1:27; 1 Yoano 4:8) Kino kibena kulumbulula’mba twalengelwe kuba’mba tumweshenga bakwetu butemwe. Kijitu bulongo kwitemwa atweba bene, pano bino, twikala na lusekelo lukatampe inge twatemwa Lesa kukila bintu byonse ne kuta muchima pa kubila bakwetu byawama. Byonka byaamba Baibolo amba “mu kupana mufuma lusekelo lukatampe kukila mu kutambula.”—Byubilo 20:35.

 Lelo jino, bantu bavula bamba’mba lusekelo lufuma mu kutangizhako bintu byo ukeba obewa mwine. Abo balanguluka’mba “kwitemwa obe mwine” kwapingakena pa “kutemwa mukwenu.” Pano bino, kyataanwa kuba’mba bantu bekala na butuntulu bwa mubiji bwawama ne lusekelo inge balondela jifunde ja mu Baibolo ja kuba’mba: “Muntu yense kechi akebengatu bintu byamuwamina aye mwine ne, poso bintu byawamina ne mukwabo.”—1 Kolinda 10:24.