Nanchi Lesa Utanwatu Konsetu Nyi?
Mukumbu wa mu Baibolo
Lesa umona bintu byonsetu kabiji wingijilapo ponse po akebela. (Byambo bya Maana 15:3; Bahebelu 4:13) Baibolo kechi waamba’mba Lesa utanwatu konsetu ne. Pakuba Baibolo waamba’mba Lesa muntu kabiji uji na mpunzha ko ekala.
Biji Lesa: Lesa mupashi. (Yoano 4:24) Bantu kechi bakonsha kumumona ne. (Yoano 1:18) Bimwesho byaamba pe Lesa biji mu Baibolo bimwesha’mba Lesa uji na mpunzha ko ekala. Baibolo kechi waambapo’mba utanwatu konsetu ne.—Isaya 6:1, 2; Lumwekesho 4:2, 3, 8.
Mpunzha kwikala Lesa: Lesa wikala mwiulu mwine kechi mu jiulu jonkaje jo tumona na meso ne. Monkamwa, Lesa uji na mpunzha ‘mwiulu mo ekala.’ (1 Bamfumu 8:30) Baibolo waambapo bimye bimo bamalaika byo “baishile na kwimana kwi Yehoba,” a abino byambo byamwesha kuba’mba kine Lesa uji na mpunzha ko ekala.—Yoba 1:6.
Inge Lesa kechi utanwatu konsetu ne, abya wakonsha kunkwasha nyi?
Ee, wafwainwa kwimukwasha. Lesa wata bingi muchima bantu. Nangwa kya kuba wikala kwalepa, Lesa umona bantu bonse pano pa ntanda babena kuba kyaswa muchima wanji kabiji wibakwasha. (1 Bamfumu 8:39; 2 Byambo bya Moba 16:9) Akimonai bino bishinka byamwesha Yehoba byo ata muchima bakalume banji:
Inge mwalomba: Yehoba umvwa ne kukumbula inge mwamulomba.—2 Byambo bya Moba 18:31.
Inge mwapopomenwa: “Yehoba uji kwipi na boba balajika michima; upulusha boba baji na bulanda.”—Salamo 34:18.
Inge mukeba mwa kubila bintu: Yehoba ‘ukakupa milangwe ne kukufunjisha’ kwingijisha Baibolo Mambo anji.—Salamo 32:8.
Milanguluko yabula kuyilamo yamba bantu amba Lesa utanwatu konsetu
Milanguluko yabula kuyilamo: Lesa utanwatu konsetu mu bintu byo alenga.
Kishinka: Lesa kechi wikala pano pa ntanda nangwa mu jiulu jo tumona na meso ne. (1 Bamfumu 8:27) Ibyo kuba’mba tubangabanga ne bintutu bikwabo byo alenga ‘byamba lukumo lwa Lesa.’ (Salamo 19:1) Nangwa byonkabyo, Lesa kechi wikala mu bilengwa byanji byonkatu byuba muntu upenta bya kupentapenta ne. Bino kintu kyo bapenta kitubuulapo bintu bimo pa mwine wikilenga. Po pamotu, bintu biji pano pa ntanda bimweka bitubuula pa “byubilo bibula kumweka” bya Mulenga wetu nabiji bulume, maana ne butemwe.—Loma 1:20.
Milanguluko yabula kuyilamo: Lesa wafwainwa kutanwa ku mapunzha konsetu pa kuba’mba ayukenga bintu byonse bibena kumweka ne kwingijilapo.
Kishinka: Mupashi wazhila wa Lesa nangwa’mba ngovu ingila, bo bulume bwa Lesa bwingila. Kupichila mu mupashi wanji wazhila, Lesa umona ne kuba bintu byonsetu pa kimye kyonse kyo akeba kwa kubula kuyako aye mwine.—Salamo 139:7.
Milanguluko yabula kuyilamo: Pa Salamo 139:8 paamba’mba Lesa utanwatu konsetu mambo paamba’mba: “Inge nakanjila mwiulu, mukekala monka, kabiji inge naanshika mwanya wami mu Kilende, mukekala monka.”
Kishinka: Akino kinembelo kechi kibena kwamba pa mpunzha kwikala Lesa ne. Pakuba kibena kulumbulula’mba kafwako mpunzha ko twakonsha kuya nangwa kutanwa yakonsha kulengela Lesa kukankalwa kwitukwasha ne.
a Yehoba jo jizhina ja Lesa jiji mu Baibolo.
Mwakonsha Kutemwa
MEPUZHO A MU BAIBOLO A KUMBULWA
Mupashi Wazhila ye mu Ka?
Kuji bishinka byawama byalengela Baibolo kutongola mupashi wazhila amba “maboko” a Lesa.
BAKAMONYI BA KWA YEHOBA
Lombai Lufunjisho lwa Baibolo
Ikalai na lufunjisho lwa Baibolo lwatutu pa kimye ne mpunzha yo mukeba.