Lupulukilo lo Luka?
Mukumbu wa mu Baibolo
Byambo bya kuba’mba “kupuluka” ne “lupulukilo” bebingijisha mu Baibolo kulumbulula kupokololwa kufuma mu kizumba nangwa mu lonaiko. (Kulupuka 14:13, 14; Byubilo 27:20) Javula bino byambo bilumbulula kupokololwa ku bundengamambo. (Mateo 1:21) Byo kiji kuba’mba lufu lwiya na mambo a bundengamambo, bantu bapokololwa ku bundengamambo bekala na luketekelo lwa kwikala myaka ne myaka.—Yoano 3:16, 17. a
Mwakonsha kuba byepi pa kupuluka?
Pa kuba’mba mupuluke, mwafwainwa kuketekela mwi Yesu ne kukookela mikambizho yanji.—Byubilo 4:10, 12; Loma 10:9, 10; Bahebelu 5:9.
Baibolo wamba’mba lwitabilo lwafwainwa kwikala na mingilo nangwa kukookela pa kuba’mba lwikale lwakosa bulongo. (Yakoba 2:24, 26) Bino nangwa byonkabyo, kino kechi kilumbulula amba twakonsha kupuluka ne. Ke “Bupe bwa Lesa” kupichila mu “lusa lukatampe,” nangwa “kifyele.”—Efisesa 2:8, 9.
Nanchi inge wapuluka wakonsha konaika jibiji nyi?
Ee. Byonkatu muntu wakutomenanga ye babula pa mema byo akonsha kwitayapo jibiji, ne muntu ye bapokolola ku bundengamambo wakonsha kukankalwa kwikala na lwitabilo ne kufwa. Oene mambo, Baibolo o atundaikila Bena Kilishitu bapuluka ‘kulwila na muchima yense lwitabilo.’ (Yuda 3) Kabiji wajimunako aba bapuluka amba “Ikalainga na moyo ne kuzakama byo mubena kwibikishako kuba’mba Lesa akemupulushe.”—Filipai 2:12.
Mupulushi Ñanyi—Lesa nyi, inyi Yesu?
Baibolo watongola Lesa amba ye witupulusha, ko kuba’mba ye “Mupulushi.” (1 Samwela 10:19; Isaya 43:11; Titusa 2:10; Yuda 25) Kabiji, Lesa waingijishe baana balume bapusana pusana kupokolola mukoka wa bena Isalela, kabiji Baibolo wibatela mba “bapokolweshi.” (Nehemiya 9:27; Mitonyi 3:9, 15; 2 Bamfumu 13:5) b Kyo kimotu, Lesa ye witupokolola ku bundengamambo kupichila mu kitapisho kya bukuzhi bwa kwa Yesu Kilishitu, onkao mambo Baibolo watongola Yesu kuba’mba “Mupulushi.”—Byubilo 5:31; Titusa 1:4. c
Nanchi bonse bakapuluka nyi?
Ine, bantu bamo kechi bakapuluka ne. (2 Tesalonika 1:9) Yesu byo bamushikishe kuba’mba, “Bantutu bacheche bo bakapuluka nyi?” Aye wibakumbwile’mba: “Ibikishaiko pa kutwela pa kibelo kyakepa, mambo nemubuula namba bavula bakakeba kutwela, bino bakakankalwa.”—Luka 13:23, 24.
Bubela bwamba bantu pa lupulukilo lwa bantu bonse
Bubela: Pa 1 Kolinda 15:22 paamba lupulukilo lwa bantu bonse amba “bonse bakasangulwa na mambo a Kilishitu.”
Kishinka: Kino kyepelo kyaamba pa lusanguko. (1 Kolinda 15:12, 13, 20, 21, 35) Nanchi byambo bya kuba’mba “bonse bakasangulwa na mambo a Kilishitu” bilumbulula amba bonse basangulwa bakatambula mapesho kupichila mwi Yesu Kilishitu.—Yoano 11:25.
Bubela: Titusa 2:11 waamba pa kupuluka kwa bantu bonse amba Lesa ubena kuleta “lupulukilo ku bantu bonse.”—International Standard Version.
Kishinka: Kyambo kya Kingiliki kyatuntululwa’mba “bonse” mu kino kyepelo kulumbulula ne “bantu ba mitundu yonse nangwa bapusana pusana.” d Onkao mambo bino byambo biji pa Titusa 2:11 bilumbulula kuba’mba Lesa upulusha mitundu yonse ya bantu, kuvwangakotu ne bantu ba mu “bisaka byonse, mu mikoka yonse, mu mitundu yonse ya bantu ne mu njimi yonse.”—Lumwekesho 7:9, 10.
Bubela: 2 Petelo 3:9 waamba pa kupuluka kwa bantu bonse amba Lesa kechi “usaka muntu nangwa umo amba akafwe ne.”
Kishinka: Lesa ukeba amba bantu bakapuluke pano bino kechi ukanjikizha bantu kuba’mba ebapulushe ne. Kabiji mu “juba ja kije” janji popo kukekala ne “lonaiko lwa bantu babula kwakamwa Lesa.”—2 Petelo 3:7.
a Baibolo waamba pa muntu amba “bemupulusha” nangwa kya kuba lupulukilo ku bundengamambo ne lufu lukyangye kufika.—Efisesa 2:5; Loma 13:11.
b Mu bino byepelo byo twatongola, ma Baibolo amo aingijisha byambo bya kuba’mba “kitonzhi,” “mupokolweshi,” “kaimbi,” “ntangi,” nangwatu “muntu” kechi kyambo kya “mupulushi.” ne. Bino, mu mulaka mutanshi wa Kihebelu wanembelwemo Baibolo, baingijishatu kyambo kimo pa kulumbulula Yehoba Lesa mu Baibolo amba Mupulushi byonka byo bekingijisha ku bantu.—Salamo 7:10.
c Jizhina ja Yesu jafuma ku jizhina ja Kihebelu ja kuba’mba Yehoh·shuʹaʽ, ko kuba’mba “Yehoba lo Lupulukilo.”
d Monai Vine’s Complete Expository Dictionary of Old and New Testament Words. Kyambo kimo kya Kingiliki kitanwa mu Mateo 5:11, apo paji byambo byaambile Yesu amba bantu bakemwambila mwenga wa “misango yonse” pa baana banji ba bwanga.—International Standard Version.
Mwakonsha Kutemwa
MEPUZHO A MU BAIBOLO A KUMBULWA
Kitapisho kya kwa Yesu Kyaikala Byepi “Bukuzhi ku Bantu Bavula”?
Bukuzhi bwitulengela byepi kukasuluka ku bundengamambo?
MEPUZHO A MU BAIBOLO A KUMBULWA
Nanchi Baibolo Ufunjisha’mba inge ‘Waitabila ko kuba’mba Kyapwa Wapuluka’ Nyi?
kishimpi kyaambile Yesu kyakumbula buno bwipuzho.
ESSENTIAL BIBLE TEACHINGS
Mambo ka Yesu o Afwijile?
Baibolo umwesha buneme bwa lufu lwa kwa Yesu. Nanchi lufu lwanji lwaingijile mwingilo wanema nyi?
