Bantu baingijisha byafunjishanga Yesu Kilishitu kulengelamo machechi a bena “Kilishitu” apusana pusana. Pano bino, Baibolo ufunjisha’mba kujitu bupopweshi bumo bwa kine bwa bena Kilishitu. Monai bino bishinka bisatu bitulengela kwamba bino.

1.   Yesu waambile’mba wafunjishenga “bukine,” kabiji bena Kilishitu batanshi baambile pa bupopweshi bwabo amba, “bukine.” (Yoano 8:32; 2 Petelo 2:2; 2 Yoano 4; 3 Yoano 3) Abino byambo bimwesha’mba aba bonse bafunjisha byapusanako na byafunjishenga Yesu kechi baji mu bupopweshi bwa kine bwa bena Kilishitu ne.

2.   Baibolo ufunjisha’mba bena Kilishitu, ‘bamba na jiwi jimo.’ (1 Kolinda 1:10) Nangwa byonkabyo, machechi a bena Kilishitu avula afunjisha bintu byapusana pa byo kilumbulula kwikala mwina Kilishitu. Ano machechi onse a bubela.—1 Petelo 2:21.

3.   Yesu waambijile jimo amba bavula bakefwanyikizhanga amba bena Kilishitu bino saka babula kukookela mikambizho yanji, kabiji bantu baji bino, ukebakana. (Mateo 7:21-23; Luka 6:46) Bantu bamo bakebatwala mungi ku bantangi ba bupopweshi, bavulañanya mafunjisho a kine pa kuba’mba bamwenemo bintu byo bakeba. (Mateo 7:15) Pa kuba bantu bakwabo, bakakebanga kwibepekezha kwikala bena Kilishitu mambo bakeba kwibabuula byo bakeba kumvwa ne kukana kumvwa bukine bwa mu Baibolo.—2 Timoti 4:3, 4.

 Mu kishimpi kya wichi ne nseku, Yesu waambijile jimo pa bunsatuki bukatampe bwa bupopweshi bwa kine. (Mateo 13:24-30, 36-43) Pakapita kimye kyabaya pa kuba’mba bena Kilishitu ba kine ne ba bubela bayukanyikwe. Byonkatu byaambile Yesu, bansatuki bavujile bingi kimye kyafwile batumwa. (Byubilo 20:29, 30) Nangwa kya kuba bifunjisha bansatuki byapusana pusana, bupopweshi bwavula bwibepekezha kwikala bwa bena Kilishitu bonse ‘bwafuma mu bukine.’—2 Timoti 2:18.

 Kabiji Yesu waambijile jimo amba bena Kilishitu ba kine ne ba bubela bakayukanyikwa mu kuya kwa moba. Abino bibena kumweka mu ano moba etu, “kimye kya ku mpelo ya buno bwikalo.”—Mateo 13:30, 39.