Baibolo kechi watongolapo bano banyama batelwa’mba madainaso ne. Nangwa byonkabyo, Baibolo wamba’mba Lesa ye ‘walengele bintu byonse,’ onkao mambo, kino kimwesha’mba bano banyama bajinga pa bilengwa byo alengele. a (Lumwekesho 4:11) Nangwa kya kuba Baibolo kechi washinkamika kutongola madainaso ne, bino waamba pa mitundu yapusana pusana ya bilengwa, kabiji kyamweka pa bino bilengwa pafwainwa pajinga ne bano banyama:

•   “Bilengwa byumi bikatampe bya mu kalunga ka mema,” nangwa’mba “binyama bikatampe.”—Ntendekelo 1:21; Buku wa Lesa.

•   “Byonse bikalaba panshi.”—Ntendekelo 1:25.

•   “Banyama ba mungye monka mwayila mitundu yabo.”—Ntendekelo 1:25.

Nanchi madainaso aalukile kufuma ku banyama bakwabo nyi?

 Bintu byo bazhikwile bya kala bimwesha kuba’mba bano banyama byo byo bajingatu, kechi bimweshapo’mba baalukilenga pachepache kufuma ku banyama bakwabo ne. Kino kyakwatankana na byanembwa mu Baibolo bimwesha’mba Lesa walengele banyama bonse. Pa Salamo 146:6 pamba kuba’mba Lesa ye “Mulenga wa jiulu ne ntanda, kalunga ka mema ne byonse bijimo.”

Bano banyama bajingako ñanyi kimye?

 Baibolo walumbulula kuba’mba banyama ba mu mema ne ba ku mutunta balengelwe mu moba atanu na jimo alengejilwemo bintu byonse. b (Ntendekelo 1:20-25, 31) Onkao mambo, Baibolo umwesha’mba banyama batelwa’mba madainaso baikeleko pa myaka yavula.

Nanchi Kyovwe ne Leviatana o madainaso nyi?

 Ine. Nangwa kya kuba bano banyama batongolwa mu buku wa Yoba kechi bayukanyikwa bulongo ne, bino Kyovwe twamuyuka kabiji Leviatana wayukanyikwa’mba kiwele. Ano mazhina ayilamo kwesakana na byo bebalumbulula mu Baibolo. (Yoba 40:15-23; 41:1, 14-17, 31) Kabiji mazhina a kuba’mba “Kyovwe” ne “Leviatana” kechi alumbulula madainaso ne. Lesa wabuujile Yoba kumona bano banyama, kabiji Yoba wajingako kala madainaso saka azhiya kala.—Yoba 40:16; 41:8.

Ki ka kyamwekejile madainaso?

 Baibolo kechi waambapo pa byazhiile madainaso ne. Nangwa byonkabyo, Baibolo wamba’mba bilengwa byonse bwalengelwe “na mambo a kyaswa muchima [wa Lesa],” onkao mambo, Lesa mwine wayuka kyo alengejile madainaso. (Lumwekesho 4:11) Mwingilo ye ebalengejile byo apwile, Lesa waswishishe kuba’mba madainaso azhiye.