Ine. Baibolo kechi waambapo’mba mali atama nangwa’mba o alengela bantu kuba bintu byonse byatama ne. Bantu bamo bamba’mba “mali ye muzhazhi wa bubi bonse.” Pano bino, Baibolo kechi byo byo aamba ne. Baibolo waamba’mba “kutemwa mali ye muzhazhi wa misango yonse ya bubi.”—1 Timoti 6:10.

•  Baibolo waambapo’mba ka pa mali?

•  Mambo ka Baibolo o etujimwinako pa kutemwa mali?

•  Twakonsha kumwenamo byepi mu lujimuno lwaambapo Baibolo pa mali?

•  Byepelo bya mu Baibolo byaamba pa mali

 Baibolo waamba’mba mali inge twiengijisha bulongo “akwashañana.” (Musapwishi 7:12) Kabiji Baibolo usanchila boba bapapo bakwabo bintu kuvwangakotu ne kwibapa mali.—Byambo bya Maana 11:25.

 Pano bino, Baibolo witujimunako kubula kutemwisha mali. Waamba’mba: “Mwikale babula kutemwa mali, sekelainga mu bintu byonka byo muji nabyo.” (Bahebelu 13:5) Lufunjisho lujimo ke lwa kuba’mba twafwainwa kuyuka bya kwingijisha bulongo mali, kechi kukebesha bunonshi ne. Twafwainwa kutondwa na bintu byo tuji nabyo nabiji kajo, bivwalo ne nzubo.—1 Timoti 6:8.

 Bantu ba lunkumbwa kechi bakekala na bumi bwa myaka ne myaka ne. (Efisesa 5:5) Lunkumbwa ke jishinda jimo ja kupopwelamo bankishi, nangwa’mba kwivwanga mu bupopweshi bwa bubela. (Kolose 3:5) Kabiji na mambo a kukebesha kwikala na bintu byo bakeba mu bwikalo bwabo, bantu baji na lunkumbwa baleka kulondela mafunde awama. Byambo bya Maana 28:20 byaamba’mba: ‘Aba banonka bukiji kechi bakekala babula mambo ne.’ Bakonsha ne kutendeka kuba bintu byatama nabiji kuja bintu bya lunkanankana, kutambula mali ku bantu mu bujimuku, kwiba bantu nangwa kwipayañana.

 Nangwa kya kuba kutemwa mali kechi kwakonsha kulengela muntu kwikala na byubilo byatama ne, bino mufuma bintu bikwabo byatama. Baibolo waamba’mba “aba bakebesha bunonshi baponena mu lweseko, mu kitewa, mu bintu bya kukosama ne mu bya kusakasaka bipayañana.”—1 Timoti 6:9.

 Inge twatwajijila kuba bintu byo twayuka’mba byawama kabiji bitokesha Lesa ku muchima, tukanemekwa kabiji Lesa uketutemwa ne kwitukwasha. Aba bonse bebikako kumutokesha ku muchima Lesa wibalaya’mba: “Kechi nkakusha ne, kabiji kechi nkakulekelela ne.” (Bahebelu 13:5, 6) Kabiji witulaya ne kuba’mba “muntu wa kishinka ukatambula mapesho avula.”—Byambo bya Maana 28:20.