Mambo abula kulekelwa ke byubilo bilengela muntu kukankalwa kuyuka lulekelo lwa mambo kufuma kwi Lesa. Nga muntu wakonsha kwikala byepi na bino byubilo?

 Lesa ulekela mambo boba balapila kya kine, ne kulondela byo akeba mu bwikalo bwabo, ne kuketekela mwi Yesu kilishitu. (Byubilo 3:19, 20) Bino, muntu wakonsha kutwajijilatu na kulenga mambo kwakubula kupimpula byubilo byanji byatama. Baibolo watongola muntu wa uno mutundau amba uji na “muchima watama” kabiji ‘ukosesha muchima wanji na mambo a bujimbijimbi bwa bundengamambo.’ (Bahebelu 3:12, 13) Byonkatu biji buchimba boba soka mu kibili bo mwakonsha kubula kubumba jibiji, byo biji ne muchima wa muntu ukana kulondela Lesa. (Isaya 45:9) Muntu wa uno mutundu mambo anji kechi akonsha kulekelwa ne, ke mambo abula kulekelwa ne nangwa bundenga mambo bubula kulekelwa ne.—Bahebelu 10:26, 27.

 Bantangi ba Bayudea bamo bajinga mu moba a kwa Yesu balenganga mambo abula kulekelwa. Bayukile kuba’mba mupashi wa Lesa ye walengejilenga Yesu kuba byakukumya, bino abo balengulwile amba waubilenga bino bya kukumya na bulume bwafumine kwi Satana Diabola.—Mako 3:22, 28-30.

Bundengamambo bwakonsha kulekelwa

•  Kwamba mwenga kwa kubula kuyuka. Mutumwa Paulo naye wajinga wa mwenga bino pa kupitapo kimye waambile’mba: “Bangubijile lusa mambo naubilenga bino bintu mu bulubi ne mu kubula lwitabilo.”—1 Timoti 1:13.

•  Bukende. Baibolo watongolapo bantu bamo bajinga bankende bino bapimpwile byubilo byabo kabiji Lesa wibalekejileko mambo.—1 Kolinda 6:9-11.

“Nanchi nalenga mambo abula kulekelwa nyi?”

 Inge kya kine mwashikwa byubilo byatama byo mwajinga nabyo kabiji mwakebesha kwibileka, ko kuba’mba kechi mwalenga mambo abula kulekelwa ne. Lesa ulekela mambo bantu babwezhapo mambo antu amo kikulutu muchima wanji kechi washikwa Lesa ne.—Byambo bya Maana 24:16.

 Bantu bamo balanguluka kuba’mba balenga mambo abula kulekelwa na mambo a kuba’mba bezhachisha pa mambo o balengele. Bino nangwa byonkabyo, Baibolo ufunjisha kuba’mba kechi twakonsha kuketekela mu milanguluko yetu ne. (Yelemiya 17:9) Lesa kechi wituswisha kuzhachisha bakwetu nangwa atweba bene ne. (Loma 14:4, 12) Wakonsha kwitulekelako mambo nangwa kya kuba muchima wetu ubena kwituzhachisha.—1 Yoano 3:19, 20.

Nanchi Yudasa Isakaliota walengele mambo akubula kulekelwa nyi?

 Ee walengele. Na mambo a lunkumbwa lwanji, waibile mali o bapaine amba a kwingijisha ku mwingilo wazhila. Wabepekezhenga ne kuta muchima ku bayanji bino saka akebelenga kwiba mali avula. (Yoano 12:4-8) Muchima wa kwa Yudasa byo apijijilwe kuba bintu byatama, kyalengejile wasolola Yesu pa mali a siliva 30. Yesu wayukile kuba’mba Yudasa kechi wakonsha kulapila pa byo auba ne, onkao mambo wamutelele kuba’mba “mwana wa lonaiko.” (Yoano 17:12) Ko kuba’mba Yudasa byo afwile, kyapwa wafwijijila kechi bakamusangula jibiji ne.—Mako 14:21.

 Yudasa kechi wamwesheshe kulapila kwa kine ku bundengamambo bwanji ne. Walapijile ku meso a bantangi ba bupopweshi kechi kwi Lesa ne.—Mateo 27:3-5; 2 Kolinda 7:10.