Jizhina ja kuba’mba Mikela, bupopweshi bumo butongola’mba “Mikela Wazhila.” Bamutongolanga jino jizhina Yesu saka akyangye kwiya pano pa ntanda ne byo abwelele mwiulu. a Mosesa byo afwile, Mikela malaika mwine mukatampe wikatezhe ne Satana kabiji wakwashishe malaika kutwajila ngauzhi Danyela sawakya wafumine kwi Lesa. (Danyela 10:13, 21; Yuda 9) Mikela wikela monka mwayila jizhina janji janji, kulumbulula’mba “Ñanyi Uji Nobe Lesa?” Ko kuba’mba uzhikijila bufumu bwa Lesa ne kulwa ne balwanyi ba Lesa.—Danyela 12:1; Lumwekesho 12:7.

 Tangai muyuke ene mambo o kyayilamo Yesu kumutongola’mba Mikela malaika mwine mukatampe.

•   Mikela ye “malaika mwine mukatampe.” (Yuda 9) Jizhina ja kuba’mba “malaika mwine mukatampe,” jalumbulula’mba “mukulumpe wa bamalaika.” Jino jizhina jitanwatu mu byepelo bibiji mu Baibolo. Mu bino byonse byepelo, jino jizhina jibena kwamba pa kintutu kimo, kulumbulula kuba’mba jafwainwatu malaika umo kwapwa. Kyepelo kimo kyaamba’mba nkambo Yesu “ukekila mwiulu na mbila, na jiwi ja malaika mwine mukatampe.” (1 Tesalonika 4:16) Yesu ye uji na “jiwi ja malaika mwine mukatampe” mambo ye Mikela, malaika mwine mukatampe.

•   Mikela ukambizha biumbi bya bamalaika. “Mikela ne bamalaika banji balwile na nsuñunyi,” aye Satana. (Lumwekesho 12:7) Mikela ye uji na luusa lukatampe pa bilengwa byonse bya mupashi nangwa’mba bamalaika, mambo bamutongola’mba “kinemanga uji pa kifulo kikatampe pa bonse” ne “mfumu mwine.” (Danyela 10:13, 21; 12:1) Ano onse mazhina alengela Mikela kufikilamo kwikala “mukulumpe wa nzhita ya bamalaika,” byonka byaambile nnembi wa Baibolo wa New Testament aye David E. Aune.

   Baibolo waambapo ne pa jizhina jikwabo ja muntu umo wakila bulume bamalaika bonse. Waamba’mba ‘Nkambo Yesu ukamweka kufuma mwiulu pamo na bamalaika banji ba bulume mu mujilo utema, byo akeya na kushinkanya.’ (2 Tesalonika 1:7, 8; Mateo 16:27) Yesu “wayile mwiulu, kabiji bamalaika, ba luusa ne ba bulume bonse bamukokesheshebo.” (1 Petelo 3:21, 22) Kechi kyafwainwe kuyilamo Lesa kwingijisha ano mazhina abiji ku bantu babiji ne kwibapa bifulo bikatampe bya kutangijila biumbi bya bamalaika mwiulu ne. Onkao mambo, kyayilamo kuba’mba Yesu ne Mikela ye muntu umotu.

•   Mikela “ukemana” mu “kimye kya malwa” akatampe akyangye kumwekapo kala. (Danyela 12:1) Mu buku wa Danyela, byambo bya kuba’mba “ukemana,” javula byaamba pa mfumu waimana kabiji wafuukulapo kala kubapo kintu kimo. (Danyela 11:2-4, 21) Yesu Kilishitu bamutongola’mba “Mambo a Lesa,” kabiji ukengila mwingilo mukatampe wa kwikala “Mfumu wa bamfumu” ukashinda balwanyi ba Lesa bonse ne kuzhikijila bantu ba Lesa. (Lumwekesho 19:11-16) Abino byonse ukebyuba kimye kya “malwa akatampe, akyangye kumwekapo kala kufumatu ku ntendekelo.”—Mateo 24:21, 42.