Ee! Baibolo wafuma kwi “Lesa utekenesha boba bapopomenwa.” (2 Kolinda 7:6) Nangwa kya kuba Baibolo kechi buku wa bya butuntulu bwa bumi ne, bino wakwasha bavula kushinda milanguluko ya kukeba kwikujika. Maana ajimo akonsha kwimukwasha ne anweba.

•  Ñanyi lujimuno lutanwa mu Baibolo?

•  Nanchi Baibolo waambapo pa bantu bakebelenga kufwa nyi?

•  Ñanyi byepelo bya mu Baibolo byakonsha kwimukwasha kushinda milanguluko ya kukeba kwikujika?

•  Nafwainwa kuba byepi inge mukwetu waamba’mba, “Mbena kukeba kufwa”?

•  Nafwainwa kuba byepi inge kala nakebelenga kwikujika?

• ● Buulaiko bakwenu byo mubena kumvwa.

   Byamba Baibolo: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.

   Byo kilumbulula: Tukebewa bukwasho bwa bakwetu inge twaikala na milanguluko yakatazha.

   Inge mwabula kubuulako bakwenu byo mubena kumvwa, milanguluko yatama yakonsha kwimukookesha. Bino inge mwabuulako bakwenu, mukakepeshako binyenge ne kutendeka kulanguluka bulongo.

   Esekai kuba bino: Buulaiko muntu umo lelo byo mubena kumvwa, nabiji mulongo wenu nangwa mulunda nenu ye mwaketekela. a Kabiji mwakonsha kwamba pa byo mubena kumvwa kupichila mu kunemba milanguluko yenu.

• ● Yai ku kipatela.

   Byamba Baibolo: “Bantu batuntulu kechi bakeba shayuka wa michi ne, poso aba bakolwa.”—Mateo 9:12.

   Byo kilumbulula: Twafwainwa kuya ku kipatela inge twakolwa.

   Milanguluko ya kukeba kwikujika yakonsha kwikala kiyukilo kya kuba’mba muji ku bongo kuji lukatazho. Byonkatu byo tukolwa mu mubiji, kechi twafwainwa kumvwa bumvu inge twaikala na kikola ku bongo ne. Bikola bya ku bongo bibukwa.

   Esekai kuba bino: Lombai bukwasho ku bashayuka ba michi bukiji bukiji.

• ● Vulukainga kuba’mba Lesa wimuta muchima.

   Byamba Baibolo: “Bwalula butanu kechi bupotwa na tumali tubiji nenyi? Pakuba kafwako nangwa kamo kabula kuyukanyikwa kwi Lesa ne. . . . Kwakamwa ne; mambo anweba mwanema kukila bisamba bya bwalula.”—Luka 12:6, 7.

   Byo kilumbulula: Lesa wimunemeka bingi.

   Mwakonsha kumona nobe kafwako wimuta muchima ne, bino Lesa umona byonse byo mubena kupitamo. Wimuta bingi muchima, nangwa inge mubena kuba’mba kechi mwafwainwa kutwajijila kwikala na bumi ne. Salamo 51:17 waamba’mba: “Anweba Lesa, kechi mukakana muchima walajika kabiji wa bulanda ne.” Lesa ukeba’mba mutwajijile kwikala bomi, mambo wimutemwa.

   Esekai kuba bino: Langulukai pa bishinka biji mu Baibolo bimwesha’mba Lesa wimutemwa. Mwakonsha kutanga kitango 24 mu buku wa kufundamo Baibolo wa kuba’mba Fwenyai Kwipi ne Yehoba.

• ● Lombainga kwi Lesa.

   Byamba Baibolo: “Saka mutaya bijikila byenu pe aye, mambo wimuta muchima.”—1 Petelo 5:7.

   Byo kilumbulula: Lesa ukeba’mba mumubuulenga byo mubena kumvwa ne bijikila byonse byo muji nabyo.

   Lesa wakonsha kwimukwasha kwikala na mutende wa mu milanguluko ne bulume bwa kuchinchika. (Filipai 4:6, 7, 13) Mu jino jishinda, Lesa ukwasha boba bamulomba kuba’mba ebakwashe.—Salamo 55:22.

   Esekai kuba bino: Lombai kwi Lesa lelo. Ingijishai jizhina janji ja Yehoba, ne kumubuula byo mubena kumvwa. (Salamo 83:18) Mulombai kuba’mba emukwashe kuchinchika.

• ● Langulukainga pa luketekelo lwa mu Baibolo lwa bwikalo bwa kulutwe.

   Byamba Baibolo: “Tuji na luno luketekelo luji nobe kimiko kya bwikalo bwetu, lwa kine kabiji lwakosa.”—Bahebelu 6:19, tubyambo twa munshi.

   Byo kilumbulula: Milanguluko ya mu muchima wetu iji nobe bwato babena kwenda pa manyaki, mambo bimye bimo twakonsha kwikala na lusekelo, bimye bikwabo twaikala na bulanda, pano bino, luketekelo lwa mu Baibolo lwakonsha kwitukosesha.

   Luno luketekelo kechi kuketekelatu kintu kikabula kumweka ne, pakuba lwaimena pa mulaye wa Lesa wa kuba’mba ukafumyapo byonse bileta bikola.—Lumwekesho 21:4.

   Esekai kuba bino: Fundai pa luketekelo lwa mu Baibolo kupichila mu kutanga lufunjisho 5 mu buloshuwa wa Mambo Awama Afuma kwi Lesa!

• ● Ubaipo kintu kimo kimusangajika.

   Byamba Baibolo: “Muchima wa lusekelo ye muchi wawama.”—Byambo bya Maana 17:22.

   Byo kilumbulula: Inge twauba bintu bitusangajika, tukwashako kwikala na butuntulu bwa ku bongo bwawama.

   Esekai kuba bino: Ubaipo kintu kimusangajika javula. Nabiji kuteleka ku nyimbo ikizha muchima, kutanga byambo bitundaikañana, nangwa kubapo kintu kimo kyo mwatemwa. Kabiji mwakonsha kubayishako lusekelo lwenu inge kemukwashe bakwenu, nangwatu mu tubintu tucheche.—Byubilo 20:35.

• ● Lamainga bulongo butuntulu bwa mubiji wenu.

   Byamba Baibolo: “Mu kukosesha mubiji ukamwenamo.”—1 Timoti 4:8.

   Byo kilumbulula: Tumwenamo inge ketukaye makayo a kukosesha mubiji, kulaala kimye kyabaya, ne kuja kajo kawama.

   Esekai kuba bino: Kwenda kya kupimpauka nangwatu pa maminiti 15.

• ● Vulukainga kuba’mba milanguluko yaluka.

   Byamba Baibolo: “Kechi mwayuka bikekala bumi bwenu kesha ne.”—Yakoba 4:14.

   Byo kilumbulula: Lukatazho lwimuletela bijikila, nangwatu lumweke nobe kechi mwakonsha kwilupwisha ne, lwakonsha kwikalatu lwa pa kimye kicheche.

   Nangwa bintu bimwekepotu kukatazha byepi, byakonsha kupimpulwa juba jikalondelapo. Onkao mambo, monaingapo mashinda a kuchinchikilamo. (2 Kolinda 4:8) Lukatazho lo mubena kupitamo lukapimpulwa mu kuya kwa kimye, pano inge mwikujika kechi mwakonsha kupimpula bintu ne.

   Esekai kuba bino: Tangai mashimikila a mu Baibolo aamba pa bantu baumvwine kutama ku muchima kya kuba kebakebe ne kufwa, ne kumona bwikalo bwabo byo bwawamine kulutwe, kabiji javula bintu byapimpwilwe mu jishinda jo babujilenga ne kuketekela. Akilangulukai pa bamo.

 Ee. Baibolo witubuulapo bantu bamo bakebelenga kufwa. Lesa kechi wibazhingijile ne, pakuba wibakwashishe. Ne anweba wakonsha kwimukwasha.

Elaija

•  ● Wajinga ñanyi? Elaija wajinga ngauzhi wabujile moyo. Pano bino, naye bimye bimo walefulwanga. Yakoba 5:17 waamba’mba: “Elaija wajinga muntu byonka byo tuji.”

•  ● Mambo ka o akebejilenga kufwa? Pa kimye kimo, Elaija wamwene nobe washajiletu bunke, waumvwine moyo, kabiji wamwene’mba kechi wanemene ne. Onkao mambo, walombele’mba: “Anweba Yehoba tambulai bumi bwami.”—1 Bamfumu 19:4.

•  ● Ki ka kyamukwashishe? Elaija wabuujile Lesa byonse byajinga ku muchima wanji. Lesa wamutundaikile byepi? Lesa wamumwesheshe byo amutele muchima kabiji wamumwesheshe kiyukilo kya bulume bwanji. Kabiji wamubujile’mba wakijinga na mwingilo wanema kabiji wamupele ne bintu byakebewenga.

•  ▸ Tangai jishimikila ja kwa Elaija: 1 Bamfumu 19:2-18

Yoba

•  ● Wajinga ñanyi? Yoba wanonkele bingi kabiji wajinga na kisemi kikatampe. Kabiji wajinga wa kishinka kwi Lesa wa kine.

•  ● Mambo ka o akebejilenga kufwa? Nobe mu kukopa kwa jiso, Yoba watendekele kupita mu bintu byatama bingi. Bintu byanji byonse byaonaikile. Baana banji bonse bafwile na kinkunkwila. Wakolelwe kikola kyatama bingi. Kabiji bamubepejilenga’mba aye mwine ye wiletelejile makatazho o apichilengamo. Yoba waambile’mba: “Nashikwa bumi bwami; kechi mbena kukeba kutwajijila kwikala na bumi ne.”—Yoba 7:16.

•  ● Ki ka kyamukwashishe? Yoba walombanga kwi Lesa ne kwisamba na bakwabo. (Yoba 10:1-3) Bamutundaikile ku mulunda nanji wajinga na lusa aye Elihu, kabiji uno mulunda nanji wamukwashishe kulanguluka pa byo apichilengamo mu jishinda japusanako. Kyakijile pa byonse, Yoba watambwijile lujimuno ne bukwasho bwa Lesa.

•  ▸ Tangai jishimikila ja kwa Yoba: Yoba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosesa

•  ● Wajinga ñanyi? Mosesa wajinga ntangi wa bena Isalela kabiji wajinga ngauzhi wa kishinka.

•  ● Mambo ka o akebejilenga kufwa? Mosesa wajinga na mwingilo wabaya bingi, bantu baendangatu na kumunena, kabiji kimye kimo wakookele bingi. Onkao mambo, wajijile Lesa amba: “Ngipayai lonka luno.”—Kubala 11:11, 15.

•  ● Ki ka kyamukwashishe? Mosesa wabuujile Lesa byo aumvwinenga. Lesa wamukwashishe kupeezhako kisendwa kyanji pa kuba’mba bijikila bikepeko.

•  ▸ Tangai jishimikila ja kwa Elaija: Kubala 11:4-6, 10-17.