Mpelo ya Ntanda Ikeya Ñanyi Kimye?

JIZHAI

Mukumbu wa mu Baibolo

Pa kuba’mba tuyuke kimye kikeya mpelo ya ino ntanda, patanshi twafwainwa kuyuka Baibolo byo aingijisha kyambo kya “ntanda.” Kyambo kya Kingiliki kya koʹsmos, javula kituntululwa’mba “ntanda,” kilumbulula’mba bantu, kikatakata bantu babula kuba kyaswa muchima wa Lesa. (Yoano 15:18, 19; 2 Petelo 2:5) Bimye bimo kyambo kya koʹsmos kilumbulula byubilo bya bantu.—1 Kolinda 7:31; 1 Yoano 2:15, 16. a

“Mpelo ya Ntanda” yo ika?

Byambo bya kuba’mba “mpelo ya ntanda,” bitanwa mu Mabaibolo avula, byakonsha kutuntululwa’mba “mpelo ya buno bwikalo,” nangwa’mba “mpelo ya kisemi.” (Mateo 24:3; English Standard Version) Kino kechi kibena kulumbulula konaunwa kwa ntanda yonkaye nangwa bantu bonsetu pelu ne, bino kilumbulula mpelo ya bantu baji na byubilo byatama.—1 Yoano 2:17.

Baibolo ufunjisha’mba “bantu babi bakebonauna” pa kuba’mba bantu bawama bakeyowenga bwikalo bwawama pano pa ntanda. (Salamo 37:9-11) Luno lonaiko lukobiwa kimye kya “malwa akatampe” kufika ne ku nkondo ya Amagedonyi.—Mateo 24:21, 22; Lumwekesho 16:14, 16.

Ntanda ikapwa ñanyi kimye?

Yesu waambile’mba: “Pa mambo a joja juba ne kimye kafwako wayuka ne, nangwatu bamalaika ba mwiulu, nangwatu Mwana, kana bene Batata.” (Mateo 24:36, 42) Wanungilepo amba kimye kikeshilamo mpelo kechi kikayukanyikwa ne, ikafika “pa kimye kyo mwabula kuketekela.”—Mateo 24:44.

Nangwa kya kuba kechi twayuka juba ne kimye ne, Yesu witubuujile “kiyukilo,” nangwa’mba bintu bikamwekanga bikamweshanga’mba mpelo ya ino ntanda ijitu pepi. (Mateo 24:3, 7-14) Baibolo utongola kino kimye amba “kimye kya ku mpelo,” ne “moba a kupelako.”—Danyela 12:4; 2 Timoti 3:1-5.

Nanchi kujipo kikashala umvwe ino ntanda yapwa nyi?

Ee, ko kiji. Ntanda ikatwajijila kwikalako, mambo Baibolo waamba’mba “ikekalanga pa mpunzha yayo myaka ne myaka.” (Salamo 104:5) Kabiji pa ntanda pakekalanga bantu, byonkatu byalaya Baibolo amba: “Baoloka bakaswana ntanda, kabiji bakekalangamo myaka ne myaka.” (Salamo 37:29) Lesa ukaleta bintu byawama pano pa ntanda byonka byo akebelenga mu ntendekelo:

Paladisa—Isaya 35:1; Luka 23:43.
Kuzhikijilwa ne kwikala ku matwi nzoo.—Mika 4:4.
Bonse bakengilanga mingilo ikebaletelanga lusekelo.—Isaya 65:21-23.
Kechi kukekala kukolwa nangwa kukota ne.—Yoba 33:25; Isaya 33:24.

a Kyambo kya Kingiliki kya kuba’mba ai·onʹ ne akyo mu Mabaibolo amo kyatuntululwa’mba “ntanda.” Inge bengijisha mu jino jishinda, kino kyambo kya ai·onʹ kilumbululatu kintu kimo na kyambo kya koʹsmos, ko kuba’mba byubilo bya bantu.