Ee, uba bino inge bantu baleka byubilo byabo byatama. Lesa byo atumine byambo bya kuzhachisha bena Isalela ba kala, waambile’mba: “Apo kampe bonse bakomvwa ne kusankilapo mashinda abo atama, ne amiwa nkabwezhamo muchima wami pa bya malwa byo mbena kukeba kwibaletela na mambo a byubilo byabo byatama.”—Yelemiya 26:3.

 Ma Baibolo avula atuntulula kino kyepelo uba nobe Lesa “walapila” pa bya malwa byo akebelenga kuletela bantu, kino kyakonsha kumwesha’mba Lesa walubankenye. Pano bino, kyambo kine kya Kihebelu kilumbulula ‘kupimpula milanguluko nangwa kubwezhamo muchima.’ Shayuka umo wanembele’mba: “Umvwe muntu waleka kuba byatama, Lesa kechi umuzhachisha ne.”

 Nangwa kya kuba Lesa wakonsha kubwezhamo muchima, kechi kibena kulumbulula’mba kimye kyonse ukabwezhangamotu muchima ne. Monai bintu bimo byaamba Baibolo byalengejile Lesa kubula kubwezhamo muchima:

•   Lesa kechi wabwezhezhemo muchima ne kuleka Balaka kufinga bena Isalela ne.—Kubala 23:18-20.

•   Saulo Mfumu wa bena Isalela byo atwajijiletu kuba bintu byatama, Lesa kechi wabwezhezhemo muchima ne kumuleka kutwajijila kwikala mfumu ne.—1 Samwela 15:28, 29.

•   Lesa ukafikizha mulaye wanji wa kubika Mwananji kwikala ñanga myaka ne myaka. Lesa kechi ukabwezhamo muchima ne.—Salamo 110:4.

 Ine, Baibolo waamba byaambile mwine Lesa amba: “Amiwa yami Yehoba; kechi ngaluka ne.” (Malakai 3:6) Kabiji waamba ne kuba’mba Lesa kechi ‘waluka byonka byaluka kimvule’ ne. (Yakoba 1:17) Nangwa byonkabyo, abino kechi byapusana na byaamba Baibolo amba Lesa upimpula milanguluko yanji ne. Lesa kechi waluka ne, ko kuba’mba byubilo byanji, mizhilo yanji ya butemwe ne bunchibamambo bwanji bwaoloka kechi bipimpulwa ne. (Mpitulukilo ya mu Mizhilo 32:4; 1 Yoano 4:8) Nangwa byonkabyo, wakonsha kupa bantu mikambizho ikwabo pa bimye byapusana pusana. Kimye kimo, Lesa wapeele Mfumu Davida mikambizho yapusana pusana pa kuya na kulwa nkondo itanshi ne yalondejilepo, kulondela ino mikambizho kwamulengejile kushinda.—2 Samwela 5:18-25.

 Ine, Lesa wilangulushatu umvwe bantu bamukana nangwa bamulengulula. Baibolo walumbulula Lesa byo aumvwine kimye bintu kyo byatamine Muyulo wa mu moba a kwa Nowa saka akyangye kufika. Waamba’mba: “Yehoba wilangulwishe na mambo a kulenga bantu pano pa ntanda kabiji muchima wanji waubile bulanda.” (Ntendekelo 6:6) Mu kino kyepelo, kyambo kya kuba’mba “wilangulwishe” kyafuma ku kyambo kya Kihebelu kilumbulula “kupimpula milanguluko.” Muyulo saka akyangye kwiya, Lesa wapimpwile milanguluko yanji mambo bantu bavula bajingako baubilenga byatama. (Ntendekelo 6:5, 11) Lesa kya mubile bingi bulanda na mambo a bintu byatama. Nangwa byonkabyo, aye kechi wapimpwile mulanguluko wanji ne konauna bantu bonse ne. Waubile bino byo apulwishe Nowa ne kisemi kyanji ku Muyulo.—Ntendekelo 8:21; 2 Petelo 2:5, 9.