Kyambo kyatuntululwa mu Baibolo amba “lusanguko” kyafuma ku kyambo kya Kingiliki kya a·naʹsta·sis, kilumbulula “kubwela” nangwa’mba “kwikalako jibiji.” Muntu yebasangula bamubwezha kufuma ku bafu ne kwikala ke mumi jibiji byonka byoajinga kala.—1 Kolinda 15:12, 13.

 Lufunjisho lwa kuba’mba bantu bafwa bakasanguka luji monka mu Binembelo bya Kihebelu bitelwa’mba Lulayañano lwa kala nangwa kya kuba kyambo kine kya kuba’mba “lusanguko” kifwamo. Lesa walayile kupichila mwi ngauzhi Hosea amba: “Nkebapokolola ku bulume bwa Kalunga ka bafu ne kwibakula ku lufu!”—Hoseya 13:14; Yoba 14: 13-15; Isaya 26:19; Danyela 12:2, 13.

 Nanchi bakasangulwa bakekalanga pi? Bamo bakasangulwa kuya mwiulu na kukekala bamfumu bakalamanga pamo na Kilishitu. (2 Kolinda 5:1; Lumwekesho 5:9, 10) Baibolo wilutela’mba “lusanguko lutanshi.” Kino kibena kulumbulula’mba kuji lusanguko lukwabo. (Lumwekesho 20:6; Filipai 3:11) Aba bakalondelapo kusangulwa bakavula kabiji bakekalanga pano ponka pa ntanda.—Salamo 37:29.

 Bantu bakasangulwa byepi? Lesa wapa Yesu bulume bwa kusangula bafwa. (Yoano 11:25) Yesu ukabwezha ku bumi “bonse baji mu bilende.” Ukebasangulatu byonka byo bamwekanga ne na byubilo byabo ne kuvulukatu bulongo bintu. (Yoano 5:28, 29) Bakaya mwiulu bakasangulwa na mibiji ya bumupashi. Bakekala ponka pano pa ntanda bakasangulwa na mibiji ya mashi ya kubula kukolwa.—Isaya 33:24; 35:5, 6; 1 Kolinda 15:42-44, 50.

 Bañanyi bakasangulwa? Baibolo waamba’mba “kukekala lusanguko lwa baoloka ne babula koloka.” (Byubilo 24:15) Nowa, Sala ne Abalahama bo bantu bamo baoloka kabiji bakishinka bo bakasangula. (Ntendekelo 6:9; Bahebelu 11:11; Yakoba 2:21) Babula koloka ke bantu bakankelwe kulondela mizhilo ya Lesa. Bakankelwe kwiilondela na mambo a kubula wa kwibafunjisha.

 Bino umvwe bantu saka boba bubi kyanshiji ne kwibuleka ne, kechi bakasangulwa ne. Lufu yo mpelo ya bano bantu, kechi bakekala bomi jibiji ne.—Mateo 23:33; Bahebelu 10:26, 27.

 Lusanguko lukekalako ñanyi kimye? Baibolo witubula lusanguko lwa bakaya mwiulu lwatatwile mu kimye kyakwikalapo kwakwa Kilishitu mu 1914. (1 Kolinda 15:21-23) Ba pano pa ntanda bakasangulwa mu Bukalama bwa kwa Yesu Kilishitu bwa Myaka Kiumbi, kimye ntanda kyo bakeyalula ke paladisa.—Luka 23:43; Lumwekesho 20:6, 12, 13.

 Mambo ka kyo twafwainwa kwitabila’mba lusanguko lukekalako? Baibolo witulumbulwila bantu batanu na bana bo basangwile. Bantu bashinkilwepo bashimuna kine amba bano bantu basangwilwe. (1 Bamfumu 17:17-24; 2 Bamfumu 4:32-37; 13:20, 21; Luka 7:11-17; 8:40-56; Yoano 11:38-44; Byubilo 9:36-42; Byu. 20:7-12; 1 Kolinda 15:3-6) Kikatakata kusangulwa kwakwa Lazalasa kwayukanyikwa bingi. Papichile moba ana kufuma pafwijile Lazalasa bino Yesu wamusangwile bantu bavula saka batalapo. (Yoano 11:39, 42) Nangwatu boba bamukatezhenga Yesu baitabile’mba Lazalasa wasangwilwe. Na mambo a kino baumvwañene amba bepaye Yesu ne Lazalasa.—Yoano 11:47, 53; 12:9-11.

 Baibolo witubula’mba Lesa uji na bulume bwa kusangula bafwa kabiji usakisha kwikyuba. Ukengijisha bulume bwanji bukatampe kusangula bonse bantu bo akabula kulubamo. (Yoba 37:23; Mateo 10:30; Luka 20:37, 38) Lesa uji na bulume bwa kusangula bafwa, kabiji usakisha kwikyuba! Baibolo walumbulula lusanguko lukekalako byo aamba pe Lesa amba: “Mwingilo wa maboko enu mukamukebeshanga bingi.”—Yoba 14:15, NW.

Lusanguko mo beluyukila bavula

 Bayuka’mba: Lusanguko lulumbulula kubwezhezha muntu mweo wanji.

 Kishinka: Baibolo witufunjisha’mba muntu ye mweo kabiji amba mweo ufwa. Kechi ufumamo inge muntu wafwa ne. (Ntendekelo 2:7; Ezikyo 18:4) Muntu ye basangula kechi bamubwezhezha mweo wanji ne; bamusangula kwikala mweo mumi.

 Bayuka’mba: Bantu bamo basangulwa bino inge bebasangula bebonaunatu ponkapo.

 Kishinka: Baibolo waamba’mba “baubilenga byatama bakasangukila ku kije.” (Yoano 5:29) Bino kechi bebatotolwesha na mambo a bintu byo baubile saka bakyangye kufwa ne, ke mambo a bintu byo bakoba inge basangulwa. Yesu waambile’mba: “Bafu bakomvwa jiwi ja Mwana Lesa ne boba bamumvwijile bakekala na bumi.” (Yoano 5:25) Aba ‘bakomvwa,’ nangwa’mba bakakokela bintu byo bakafunda saka basangulwa kala mazhina abo akanembwa mu “buku wa bumi.”—Lumwekesho 20:12, 13.

 Bayuka’mba: Umvwe muntu wasangulwa, mubiji wanji ukekalatu suka byonka byo ajinga saka akyangye kufwa.

 Kishinka: Umvwe muntu wafwa mubiji wanji wonaika, waluka ke malobatu.—Musapwishi 3:19, 20.