Nanchi Mwiulu mo Muka?

JIZHAI

Mukumbu wa mu Baibolo

Kyambo kya “mwiulu” bekingijisha mu Baibolo mu mbaji isatu yanema bingi: (1) mwiulu mo tumona na meso; (2) kwikala bilengwa bya mupashi; ne (3) kifulo kya peulu. Bino byonse byakonsha kwitukwasha kuyuka mwiulu byo muji. a

Mwiulu. “Mwiulu” mo babena kwambapo ke mulwelele, monka mupuupa mwela, mutumbuka bañonyi, muji makumbi alengela mvula ne mabebe, ne kubesha kwa mvula. (Salamo 78:26; Byambo bya Maana 30:19; Isaya 55:10; Luka 17:24) Kabiji mwakonsha ne kulumbulula kunsa ya lwelele muji “juba, ñondo ne tubangabanga.”—Mpitulukilo ya mu Mizhilo 4:19; Ntendekelo 1:1.
Mwikala bilengwa bya mupashi. Kyambo kya kuba’mba “mwiulu” kilumbulula ne meulu mwikala bilengwa bya mupashi, mwiulu mwine kupitayila lwelele. (1 Bamfumu 8:27; Yoano 6:38) Bekala mu ano meulu ke Yehoba Lesa kabiji “Mupashi,” ne bamalaika bo alengele. (Yoano 4:24; Mateo 24:36) Kimo kimye mwiulu mutelwa nobe muntu kulumbulula ba malaika bakishinka, ‘kipwilo kya bazhijikwa.’—Salamo 89:5-7

Kabiji Baibolo wamba pa “mwiulu” kutazha ku kifulo kikalako bilengwa bya mupashi konka kwikala Yehoba, ‘monka mwiulu mo ekala.’ (1 Bamfumu 8:43, 49; Bahebelu 9:24; Lumwekesho 13:6) Kya kumwenako, Baibolo waambijile jimo amba Satana ne bandemona bakebataya kufuma mwiulu, kwakubula kwibaswisha kutwela mwikala Yehoba. Bino batwajijile kwikala bilengwa bya mupashi.—Lumwekesho 12:7-9, 12.
Kifulo kiji peulu pene. Binembelo bingijisha kyambo kya “mwiulu” kulumbulula kifulo kya peulu, nabiji luusa lwa kulama. Bakonsha kwikala na luusa lwa kulama ke:
- Yehoba Lesa aye mwine byo aji Mfumu Wabulume bonse.—2 Byambo bya Moba 32:20; Luka 15:21.
- Bufumu bwa Lesa, kafulumende ukafumyapo bukalama bwa bantu. Baibolo wamba pa buno Bufumu kuba’mba ke “meulu apya.”—Isaya 65:17; 66:22; 2 Petelo 3:13. b
- Bena Kilishitu bakiji pano pa ntanda, baji na lwitabilo lwa kuya mwiulu.—Efisesa 2:6.
- Makafulumende a bantu betumbijika pa bantu bo balama.—Isaya 14:12-14; Danyela 4:20-22; 2 Petelo 3:7.
- Bapashi batama babena kulama ino ntanda.—Efisesa 6:12; 1 Yoano 5:19.

Mwiulu muji byepi?

Kwikala bilengwa bya mupashi kuji mingilo yavula bingi. Kabiji kwikala bilengwa bya mupashi byavula bingi “bonka boba byo amba [Yehoba].”—Salamo 103:20, 21; Danyela 7:10.

Baibolo ulumbulula amba mwiulu muji kyeya kikatampe. (1 Timoti 6:15, 16) Ngauzhi Ezikyo watambwijile kimwesho kya mwiulu kya “kyeya,” kabiji kimwesho kya mwiulu kyamwene Danyela mwajinga “kakola ka mujilo. (Ezikyo 1:26-28; Danyela 7:9, 10) Mwiulu mwazhila, nangwa’mba kafwamo bubi, kabiji mwawama.—Salamo 96:6; Isaya 63:15; Lumwekesho 4:2, 3.

Bintu bya mwiulu byonse byaambapo Baibolo ke bya kukumya bingi. (Ezikyo 43:2, 3) Nangwa byonkabyo, bantu kechi bakonsha kumvwisha biji mwiulu ne, mambo bilengwa bya mupashi kechi twibimona ne.

a Kyambo kya Kihebelu kyatuntululwa’mba “mwiulu” kyamweka kyafuma ku kyambo kine kilumbulula “mwalepa.” (Byambo bya Maana 25:3) Monai The New Brown, Driver, and Briggs Hebrew and English Lexicon of the Old Testament, jipa 1029.

b Muntu wa jizhina ja McClintock ne buku wa Strong’s Cyclopedia waamba’mba meulu apya o baambapo mu Isaya 65:17 alumbulula “kafulumende mupya, bufumu bupya.”—Volyumu IV, jipa 122.