Ine. Baibolo witubuula’mba twafwainwa kulombangatu kwi Lesa kupichila mu jizhina ja kwa Yesu kwapwa. Yesu wabuujile baana banji ba bwanga kuba’mba: “Mwafwainwa kulombanga bino amba: ‘Tata wetu wa mwiulu, jizhina jenu jizhile.” (Mateo 6:9) Yesu kechi wakambizhepo baana banji ba bwanga kuba’mba bafwainwa kulomba ku bantu bazhila, kulomba ku bamalaika nangwa ku kintu kikwabo ne, kanatu kulomba kwi Lesa kwapwa.

 Kabiji Yesu wabuujile baana banji ba bwanga kuba’mba: “Amiwa yami jishinda ne bukine ne bumi. Kafwako wiya kwi Batata ne, poso wapichila mwi amiwa.” (Yoano 14:6) Yesu ye ye baswishatu kwi Lesa kwitusashijilako.—Bahebelu 7:25.

Nanchi kyatama inge nalomba kwi Lesa ne ku bantu bazhila nyi?

 Lesa waambile pa mikambizho jikumi amba: “Amiwa Yehoba, Lesa wenu, ne Lesa wa mukao.” (Kulupuka 20:5, Buku wa Lesa) Mu ñanyi jishinda mo aikela Lesa wa “mukao”? Tubyambo twa munshi mu Baibolo wa New American Bible paamba’mba aye “ukebatu bantu kumwingijilangatu bunke kwapwa.” Lesa witukambizha’mba tumupopwelengatu ne kulombanga kwi aye bunke kwapwa.—Isaya 48:11.

 Tuzhingijisha bingi Lesa inge ke tulombe ku kintu kingi nabiji kulomba ku bantu bazhila nangwa bamalaika. Mutumwa Yoano byo akebelenga’mba apopwele malaika, uno malaika wamukainye ne kumwambila’mba: “Jimuka! Kange ube kino ne! Amiwa nekalume mukwenu kabiji wa balongo bobe baji na mwingilo wa kushimuna bukamonyi pe Yesu. Popwela Lesa!”—Lumwekesho 19:10.