Ine, pulaneti wa ntanda kechi bakamonauna, kumusoka mu mujilo nangwa kumufumyapo ne kupingizhapo mukwabo ne. Baibolo ufunjisha’mba Lesa walengele ntanda kuba’mba mukekalenga bantu myaka ne myaka.

•   “Baoloka bakaswana ntanda, kabiji bakekalangamo myaka ne myaka.”—Salamo 37:29.

•   “[Lesa] waikajika ntanda pa bitendekesho byayo; kabiji ikekalanga pa mpunzha yayo myaka ne myaka.”—Salamo 104:5.

•   “Ntanda yaikala myaka ne myaka.”—Musapwishi 1:4.

•   “Yenka walengele ntanda, Mulenga wiikajikile, kechi wiilengele kwikala yatutu ne, bino wiilengele’mba mukekalenga bantu.”—Isaya 45:18.

 Lesa kechi ukaswisha bantu konauna ntanda na bya kufutumuna bitamisha mwela, na nkondo, nangwa na bintutu bikwabo ne. Pakuba ‘ukonauna boba babena konauna ntanda.’ (Lumwekesho 11:18) Ukoba byepi kino?

 Lesa ukafumyapo makafulumende a bantu akankalwa kulama bulongo ntanda, ne kupingizhapo Bufumu bwalumbuluka bwa mwiulu. (Danyela 2:44; Mateo 6:9, 10) Buno Bufumu bukekala mu maboko a Mwana Lesa, Yesu Kilishitu. (Isaya 9:6, 7) Yesu byo ajinga pano pa ntanda, wamwesheshe’mba uji na bulume bwa kukanya bya malwa biyakotu bine. (Mako 4:35-41) Byo aji Mfumu wa Bufumu bwa Lesa, Yesu ukengijisha buno bulume bwanji pa ntanda ponse ne byonse bijipo. Ukawamisha ntanda ne kwiilengela kwikala byonka byajinga bujimi bwa Edena.—Mateo 19:28; Luka 23:43.

 Ine, kechi byo byo afunjisha ne. Ino ndangulukilo yabula kuyilamo iyako na mambo a kubula kumvwisha kinembelo kya 2 Petelo 3:7, kyaamba’mba: “Meulu ne ntanda bijipo luno byalaminwa mujilo.” Langulukai pa bishinka bibiji byanema bitukwasha kumvwisha mwatala bino byambo:

1.   Baibolo waingijisha byambo bya kuba’mba “meulu,” “ntanda,” ne “mujilo” kwamba pa bintu byavula. Pa Ntendekelo 11:1 paamba’mba: “Pano pa ntanda ponsetu pajinga mulaka umotu.” (Buku wa Lesa) Pa kino kinembelo, “ntanda” ibena kulumbulula bantu.

2.   Byambo bikwabo byazhokoloka kinembelo kya 2 Petelo 3:7 byalumbulula meulu, ntanda, ne mujilo watongolwa pano. Kyepelo 5 ne 6 byaamba pa byajinga Muyulo wa mu moba a Nowa. Pa kyokya kimye ntanda yajingako yaonawinwe, pano bino, pulaneti wetu kechi wazhimañene ne. Pakuba Muyulo wapyangilepotu bantu, nangwa’mba “ntanda” yajinga na byubilo bya bukapondo. (Ntendekelo 6:11) Kabiji uno Muyulo waonawine ne “meulu” amo, ko kuba’mba bantu balamanga bakwabo pano pa ntanda. Onkao mambo, bantu batama bebonawine, kechi ntanda yonkaye ne. Nowa ne kisemi kyanji bapulukile lonaiko lwa ntanda kabiji Muyulo byo apwile bantu batwajijile kwikala pa ntanda.—Ntendekelo 8:15-18.

 Byonkatu Muyulo byo aonawine bantu, ne lonaiko, nangwa’mba “mujilo” watongolwa pa 2 Petelo 3:7 ukafumyapo bantu babi pano pa ntanda, kechi ntanda ine ne. Lesa walaya “meulu apya ne ntanda ipya” kabiji mo “mukekala bololoke.” (2 Petelo 3:13) “Ntanda ipya” nangwa’mba bantu bakekala mu ntanda baji na byubilo byawama mu bukalama bwa “meulu apya,” nangwa’mba buntangi bwa katataka, ko kuba’mba Bufumu bwa Lesa. Kimye buno Bufumu kyo bukatendeka kulama, ntanda ikekala paladisa.—Lumwekesho 21:1-4.