Bantu bavula bakeba bingi kuyuka ene mambo o twaikelako. Kabiji bepuzha mepuzho nabiji ano a kuba’mba: Mambo ka o twaikelako? nangwa’mba nanchi mambo ka o naikela na bumi? Baibolo witubuula’mba kyo twaikelako ke kwikala na bulunda bwakosa ne Lesa. Akimonai bishinka bimo byanema byaambapo Baibolo.

•   Lesa ye Mulenga wetu. Baibolo waamba’mba: “[Lesa] ye witulengele, kechi atweba bene ne.”—Salamo 100:3; Lumwekesho 4:11.

•   Paji ene mambo Lesa o alengejile bintu byonse kuvwangakotu ne atweba.—Isaya 45:18.

•   Lesa witulengele na muchima wa “kukeba kuyuka Lesa.” Akino kyo kilengela ne kukeba kuyuka ene mambo o twaikelako. (Mateo 5:3) Ukeba’mba tumuyuke bulongo.—Salamo 145:16.

•   Tuyukatu bulongo Lesa inge twaikala na bulunda bwakosa ne aye. Bantu bamo balanguluka’mba kyakatazha bingi kwikala mulunda ne Lesa. Pano bino, Baibolo witutundaika’mba: “Fwenyai kwipi ne Lesa, ne aye ukafwenya kwipi ne anweba.”—Yakoba 4:8; 2:23.

•   Pa kuba’mba twikale balunda ne Lesa, twafwainwa kubanga bintu bimutokesha ku muchima. Baibolo waamba pa Musapwishi 12:13 amba: “Akamwainga Lesa wa kine ne kulama mikambizho yanji, mambo kino kyo kyafwainwa kuba bantu bonse.”

•   Tusakukemwena kulutwe kufika kwa kyaswa muchima wa Lesa kwi atweba byo akafumyapo buyanji bonse ne kupana bumi bwa myaka ne myaka ku balunda nanji bamwingijila.—Salamo 37:10, 11.