Ulengulula Kilishitu kechi muntu umo nangwa kipamo ne, mambo Baibolo waamba’mba kuji “balengulula Kilishitu bavula.” (1 Yoano 2:18) Pano bino byambo bya kuba’mba “ulengulula kilishitu” byafuma ku kyambo kya Kingiliki kilumbulula’mba “ukanya Kilishitu,” kilumbulula muntu yense uba bino bintu byalondelapo:

•   Ukana’mba Yesu kechi Kilishitu (Mesiasa) nangwa ukana’mba kechi Mwana Lesa ne.—1 Yoano 2:22.

•   Ukaanya Kilishitu, Mushingwa wa Lesa.—Salamo 2:1, 2; Luka 11:23.

•   Wibepekezha kwikala Kilishitu.—Mateo 24:24.

•   Umanyika baana ba bwanga ba kwa Kilishitu, mambo Yesu umona boba bino amba babena kumumanyika.—Byubilo 9:5.

•   Wibepekezha kwikala mwina Kilishitu bino saka oba byatama nangwa bujimbijimbi.—Mateo 7:22, 23; 2 Kolinda 11:13.

 Baibolo utela muntu yense uji na bino byubilo amba balengulula Kilishitu, kabiji wibatela bonse pamo amba “ulengulula Kilishitu” (2 Yoano 7) Ulengulula Kilishitu wasolokele mu kimye kya batumwa kabiji ne kino kimye koaji. Bungauzhi bwa mu Baibolo bwaambijile jimo amba bino bintu bikamwekanga.—1 Yoano 4:3.

•   Bafunjisha bya bubela pe Yesu. (Mateo 24:9, 11) Nabiji aba bafunjisha pa Ba Lesa basatu nangwa’mba Yesu ke Lesa wa Bulume bonse bakaana byafunjishe Yesu byo aambile’mba: “Mambo Batata bankila.”—Yoano 14:28.

•   Balengulula Kilishitu bakaana byaambile Yesu pa biji Bufumu bwa Lesa. Kya kumwenako, bantangi ba bupopweshi bamo bamba’mba Kilishitu wingila kupichila mu makafulumende a bantu. Bino byapusana na byaambile Yesu amba: “Bufumu bwami kechi bwa pano pa ntanda ne.”—Yoano 18:36.

•   Bamba’mba Yesu Nkambo yabo, bino kechi balondela mikambizho yanji ne, kubikapotu ne wa kusapwila mambo awama a Bufumu.—Mateo 28:19, 20; Luka 6:46; Byubilo 10:42.