Byambo bya kuba’mba “Yelusalema Mupya,” byatanwatu jibiji mu Baibolo, ke muzhi wa kifwanyikizho wimenako jibumba ja baana ba bwanga ba kwa Yesu baya mwiulu na kulama pamo ne aye mu Bufumu bwa mwiulu. (Lumwekesho 3:12; 21:2) Baibolo umwesha’mba jino jibumba jakonsha ne kutelwa’mba musongwa wa Kilishitu.

1.   Yelusalema Mupya uji mwiulu. Ponsetu Baibolo po atongola Yelusalema Mupya, umwesha’mba ufuma mwiulu kabiji bamalaika bo basopa bibelo bya uno muzhi. (Lumwekesho 3:12; 21:2, 10, 12) Kabiji kubaya kwa uno muzhi kumwesha’mba kechi wakonsha kwikala pano pa ntanda ne. Uno muzhi waesakenetu monse, ne mu bula bwanji mwaesakenetu pamo na mu bwipi bwanji, “bibanza 12,000 nangwa’mba “mafolonga” mu bula, mu bwipi ne mu kimino monse mwaesakene. a (Lumwekesho 21:16; Buku wa Lesa) Mu mbavu wakonsha kubaya makilomita 560 kuya mwiulu, ko kuba’mba wakonsha kufika mulwelele.

2.   Yelusalema Mupya walengwa na jibumba ja baana ba bwanga ba kwa Yesu, ko kuba’mba musongwa wa Kilishitu. Yelusalema Mupya utelwa’mba “musongwa, muka Mwana Mukooko.” (Lumwekesho 21:9, 10) Mu ino ndumbulwilo ya kifwanyikizho, Yesu Kilishitu ye Mwana Mukooko. (Yoano 1:29; Lumwekesho 5:12) “Muka Mwana Mukooko,” musongwa wa Kilishitu, wimenako bena Kilishitu bakekala pamo ne Yesu mwiulu. Baibolo waesakanya bulunda buji pakachi ka kwa Yesu ne bano bena Kilishitu ku bulunda bwikala na mulume ne mukazhi. (2 Kolinda 11:2; Efisesa 5:23-25) Kunungapo, pa mabwe a kitendekesho kya Yelusalema Mupya, panembelwe “mazhina 12 a batumwa 12 ba Mwana Mukooko.” (Lumwekesho 21:14) Abino bishinka bitukwasha kuyuka Yelusalema Mupya, mambo bena Kilishitu baji na luketekelo lwa kuya mwiulu ‘bebashimika pa kitendekesho kya batumwa ne bangauzhi.’—Efisesa 2:20.

3.   Yelusalema Mupya ke lubaji lwa kafulumende. Yelusalema wa kala ye wajinga muzhi mukatampe mu Isalela, kabiji mo mwaikalanga Mfumu Davida, mwananji Solomone, ne baana babo baikelenga “pa jitanda ja Yehoba.” (1 Byambo bya Moba 29:23) Muzhi wa Yelusalema watelwanga’mba “muzhi wazhila,” mambo waimenangako bukalama bwa Lesa bwajinga mu kisemi kya kwa Davida. (Nehemiya 11:1) Yelusalema Mupya, utelwa ne kuba’mba “muzhi wazhila,” walengwa na boba bakaya na kwikala ne Yesu mwiulu, “bakekala bamfumu ba kulama ntanda.”—Lumwekesho 5:9, 10; 21:2.

4.   Yelusalema Mupya ukaletela bantu mapesho pano pa ntanda. Yelusalema Mupya bamumwesha saka “ekila kufuma mwiulu kwi Lesa,” kumwesha’mba Lesa umwingijisha kukwasha bantu pa ntanda. (Lumwekesho 21:2) Abino byambo bikwatankanya Yelusalema Mupya na Bufumu bwa Lesa, Lesa bo akengijisha kuba kyaswa muchima wanji “pano pa ntanda, byonka byo kibena kubiwa mwiulu.” (Mateo 6:10) Kyaswa muchima wa Lesa ku bantu pano pa ntanda kyavwangamo ano mapesho:

   •   Kufumyapo bundengamambo. “Mukola wa mema a bumi” afuma mu Yelusalema Mupya kabiji akwasha “bichi bya bumi” bya “kubukilako bisaka bya bantu.” (Lumwekesho 22:1, 2) Kuno kubukwa ku mubiji ne ku mupashi kukafumyapo bundengamambo ne kulengela bantu kwikala balumbuluka byonka byakebelenga Lesa mu ntendekelo.—Loma 8:21.

   •   Bulunda bwawama pakachi ka Lesa ne bantu. Bundengamambo bwafumishe bantu kwi Lesa. (Isaya 59:2) Kufumyapo bundengamambo, kukafikizha bungauzhi bwa kuba’mba: “Tente wa Lesa uji na bantu, ne aye ukekala nabo, ne abo bakekala ke bantu banji. Ne Lesa mwine ukekala nabo.”—Lumwekesho 21:3.

   •   Kufumyapo buyanji ne lufu. Kwingijisha Bufumu bwanji, Lesa “ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne.”—Lumwekesho 21:4.