Yesu wapulwishe bantu byo apaine bumi bwanji kwikala kitapisho kya bukuzhi. (Mateo 20:28) Onkao mambo, Baibolo utela Yesu amba “Mupulushi wa ba pano pa ntanda.” (1 Yoano 4:14) Kabiji Baibolo wamba’mba: “Lupulukilo kechi lukeshilapo mu muntu mukwabo ne, mambo kafwako jizhina jikwabo pano pa ntanda Lesa jo asala mu bantu ja kwitupulushishamo ne.”—Byubilo 4:12.

 Yesu ‘watompejile lufu bantu bonse’ bamwitabila. (Bahebelu 2:9; Yoano 3:16) Kabiji “Lesa wamusangwile mu bafu,” kabiji Yesu wabwelele mwiulu saka aji kilengwa kya mupashi. (Byubilo 3:15) Amwa mwiulu, Yesu “wakonsha kupulusha aba basolomoka Lesa kupichila mwi aye, mambo ye mumi kimye kyonse kuba’mba ebasashijileko.”—Bahebelu 7:25.

Mambo ka o tukebela Yesu kwitusashijilako?

 Atweba bonse twibandengamambo. (Loma 3:23) Bundengamambo bubika mukiika pakachi ketu ne Lesa, kabiji buleta lufu. (Loma 6:23) Pano bino, Yesu wingila nobe ‘wa kwambilako’ boba betabila mu kitapisho kya bukuzhi kyo apaine. (1 Yoano 2:1) Wibasashijilako kwi Lesa kuba’mba akumbule milombelo yabo ne kwibalekelako bundengamambo bwabo kupichila mu lufu lwa kwa Yesu lwa bukitapisho. (Mateo 1:21; Loma 8:34) Lesa umvwa misashijilo ya kwa Yesu mambo yakwatankana na kyaswa muchima wanji. Lesa watumine Yesu pano pa ntanda kuba’mba bantu “bakapuluke kupichila mwi aye.”—Yoano 3:17.

Nanchi kwitabila mwi Yesu kyo kyonkatu kikebewa pa kuba’mba tukapuluke nyi?

 Ine. Nangwa kya kuba’mba twafwainwa kwitabila mwi Yesu pa kuba’mba tukapuluke, bino kuji ne bikwabo bikebewa. (Byubilo 16:30, 31) Baibolo waamba’mba: “Byonkatu mubiji wabula mupashi byo afwa, ne lwitabilo lwabula mingilo nalo lwafwa.” (Yakoba 2:26) Pa kuba’mba aketupulushe, twafwainwa:

•   Kufunda pe Yesu ne Shanji, Yehoba.—Yoano 17:3.

•   Kwibetabila.—Yoano 12:44; 14:1.

•   Kumwesha lwitabilo lwetu kupichila mu mukookela mikambizho yabo. (Luka 6:46; 1 Yoano 2:17) Yesu wafunjishe’mba kechi bonse bamwita’mba “Nkambo” bakapuluka ne, kanatu boba “kyaswa muchima wa [Shanji] wa mwiulu.”—Mateo 7:21.

•   Kutwajijila kumwesha lwitabilo lwetu nangwatu mu bimye bya makatazho. Yesu walumbulwile bulongo kino byo aambile’mba: “Awa ukachinchika kufika ne ku mpelo, ye ukapuluka.”—Mateo 24:13.