BANYIKE BEPUZHA’MBA
Nanchi Nafwainwa Kubatizhiwa Nyi?—Lubaji 3: Mambo ka o Mbena Kukankazhamina?
Nanchi mumvwa moyo inge mwalanguluka pa kwipana kwi Yehoba ne kubatizhiwa nyi? Inge ibyo, kino kibaaba kisakwimukwasha kushinda uno moyo.
Mu kino kibaaba
Kyakonsha kwikala byepi inge nalenga mambo akatampe panyuma ya kubatizhiwa?
Mambo ka a kulangulukila pa kino: Kampe mwayukapo umo walengele mambo akatampe ye bapangile mu kipwilo. (1 Kolinda 5:11-13) Mwakonsha kwakamwa’mba kampe ne anweba kino kikemumwekela.
“Byo natendekeletu kukeba’mba batizhiwe, mulanguluko wa kuba’mba nakonsha kulenga mambo akatampe wandengelanga kwakamwa bingi. Nalangulukanga’mba nakonsha kukozha bansemi bami ku muchima inge nalenga mambo.”—Rebekah.
Kinembelo kyafwainwa kwimukwasha: “Muntu mubi aleke byubilo byanji byatama . . . Abwele kwi Yehoba, yenka ukamubila lusa, abwele kwi Lesa wetu mambo aye ukamulekelako mambo anji onsetu.”—Isaya 55:7
Langulukai pa kino: Nangwa kya kuba bantu babula kulapila bebapanga mu kipwilo, Yehoba ubila lusa balapila ne kuswa byo bebajimwineko.—Salamo 103:13, 14; 2 Kolinda 7:11.
Kishinka ke kino: Nangwa kya kuba kechi mwaoloka ne, mwakonsha kushinda lweseko na bukwasho bwa Lesa. (1 Kolinda 10:13) Ñanyi ufuukulapo byo muba na lweseko? Anweba bene nyi? Inyi muntu mukwabo?
“Nachiinanga’mba kampe nakonsha kulenga mambo akatampe saka na batizhiwa, bino nayukile’mba kubula kubatizhiwa ke kwibika mu kizumba. Kabiji nayukile’mba kechi nafwainwa kwakamwa pa bya kesha ne.”—Karen.
Kishinka ke kino: Mwakonsha kusalapo kubula kulenga mambo akatampe—byonka byasalapo bakalume ba Yehoba bavula.—Filipai 2:12.
Mukeba kufunjilapo bikwabo nyi? Monai kibaaba kya kuba’mba, “Nakonsha Kukana Byepi Lweseko?”
Nanchi nkakonshanga kwingila mingilo ingilako babatizhiwa nyi?
Mambo ka a kulangulukila pa kino: Kampe mwayukapo bakyanyike bamo basha bisemi ne balunda nabo ne kuya kwalepa pa kuba’mba bengileko pakatampe mu mwingilo wa Yehoba. Kabiji mwakamwa’mba bantu bakakebanga’mba ne anweba mube bino.
“Mwina Kilishitu wabatizhiwa wafikila kwingila mingilo yavula bingi, bino bamo kechi benengezha kwingila ne, nangwa kampe butuntulu bwabo bwa mubiji kechi bwibaswisha ne.”—Marie.
Kinembelo kyafwainwa kwimukwasha: “Muntu yense apime byubilo byanji, ne kwitotela mu bintu byanji mwine, kechi kwiesakanya ku muntu mukwabo ne.”—Ngalatiya 6:4.
Langulukai pa kino: Kechi mwafwainwa kwiesakanyanga ku bakwenu ne, pa kuba mwafwainwa kuta muchima pa byambo biji pa Mako 12:30: “Wafwainwa kutemwa Yehoba Lesa wobe na muchima wobe yense.”
Yukai’mba mwafwainwa kwingijilanga Yehoba na muchima wenu yense—kechi muntu mukwabo ne. Umvwe mwatemwa Yehoba kya kine, mukakebanga mashinda mwa kumwingijila papelela bulume bwenu.
“Nangwa kya kuba lubatizhilo kintu kyanema bingi, kechi kisendwa ne. Inge mwaikala na balunda bawama, bakemukwashanga inge mwaikala na makatazho. Kubatizhiwa kukemulengela kwikala ba lusekelo. Kuchinuzhuka kubatizhiwa kwakonsha kubika bumi bwenu mu kizumba.”—Julia.
Kishinka ke kino: Sanchilainga Yehoba pa butemwe bo emumwesha. Kuba bino kukemutundaika kumwingijila papelela bulume bwenu.—1 Yoano 4:19.
Mukeba kufunjilapo bikwabo nyi? Monai kibaaba kya mu Kizungu kya kuba’mba, “How Responsible Am I?”
Ibyepi inge neumvwa’mba kechi nafikilamo kwingijila Yehoba ne?
Mambo ka a kulangulukila pa kino: Yehoba ye Nkambo walengele bintu byonse; kechi waesakana na bantu nangwa pachechetu ne. Mwakonsha kuzhinauka inge Yehoba wimuyuka.
“Na mambo a kuba’mba bansemi bami Bakamonyi ba kwa Yehoba, nalangulukanga’mba ‘naswainetu’ bulunda ne Yehoba kufuma kwi abo ne kuba’mba Yehoba kechi wankokele mwine’mba ngikale mulunda nanji ne.”—Natalie.
Kinembelo kyafwainwa kwimukwasha: “Kafwako muntu wakonsha kwiya kwi amiwa ne, poso Batata bantumine bamukokela ko nji.”—Yoano 6:44.
Langulukai pa kino: Byo mubena kulanguluka pa kubatizhiwa, ko kuba’mba Yehoba ubena kukeba’mba kwikale na bulunda bwakosa ne aye. Nanchi musakuswa luno lwito nyi?
Vulukainga’mba Yehoba ye usala muntu wafwainwa kufwenya kwipi ne aye—kechi anweba nangwa muntu mukwabo ne. Kabiji Mambo anji etubuula’mba umvwe ‘mwafwenya kwipi ne Lesa, . . . ukafwenya kwipi ne anweba.’—Yakoba 4:8
“Byo kiji kuba’mba mwamuyuka Yehoba kabiji wimukokela kwi aye, ko kuba’mba wimutemwa. Onkao mambo umvwe kemwiumvwe’mba kechi mwafikilamo kwingijila Yehoba ne, mwafwainwa kuvulukanga’mba aye kechi byo byo alanguluka ne. Kabiji Yehoba wakishinka kimye kyonse.”—Selina.
Kishinka ke kino: Umvwe mubena kufikizha bikebewa byaamba Baibolo pa kuba’mba muntu abatizhiwe, ko kuba’mba mwafikilamo kupopwela Yehoba. Kabiji mwafwainwa kumupopwelanga.—Lumwekesho 4:11
Mukeba kufunjilapo bikwabo nyi? Monai kibaaba kya kuba’mba, “Mambo ka o Nafwainwa Kulombela?”
