Mutumwa Paulo wanembele’mba: “Byo nkeba kuba kyaoloka, kyatama kyo kinkosela.” (Loma 7:21) Nanchi ne anweba mwakyumvwapo kala bino nyi? Inge byo ibyo, kino kibaaba kyakonsha kwimukwasha kuchinuzhuka lweseko lwa kukeba kuba byatama.

•  Byo mwakonsha kuyuka

•  Byo mwakonsha kuba

•  Byambapo bakwenu

 Lweseko ne byatama bimukanjikizha bakwenu kuba byendela pamo. Baibolo waamba’mba: “Kupwanañana na babi konauna byubilo byawama.” (1 Kolinda 15:33) Bintu bimukanjikizha bakwenu kuba nangwa byambo bya pa mwela ne mu mapepala a byambo byakonsha kwimulengela kusaka kuba bintu byakonsha kwimubika mu lweseko kabiji byakonsha ne kwimulengela “kulondela jibumba mu kuba bubi.”—Kulupuka 23:2.

 “Kukeba kuba’mba bakwenu bemutemwe ne kwimuketekela kwakonsha kwimulengela kuba byonse byo boba.”—Jeremy.

 Bya kulangulukapo: Mambo ka o kyakonsha kukatezha kuchinuzhuka lweseko inge mwata bingi muchima pa bibena kulanguluka bakwenu?—Byambo bya Maana 29:25.

 Kishinka ke kino: Kechi mwafwainwa kuleka bimukanjikizha bakwenu kuba kwimulengela kulala mizhilo ya Lesa ne.

 Yukai byo mwaitabilamo. Inge mwayuka bintu byo mwaitabilamo, kechi mwakonsha kwikala kitabilambijinga ne. Kyawama kulondela lujimuno lwa mu Baibolo lwa kuba’mba: “Monai’mba bintu byonse bijitu bulongo; kakachilai ku kyawama.” (1 Tesalonika 5:21) Umvwe mwashiinwa na bintu byo mwaitabilamo, kikemukwasha kutwajijila kwikala bakosa mu lwitabilo kabiji mukakana lweseko.

 Bya kulangulukapo: Mambo ka o mwaitabila kuba’mba mizhilo ya Lesa yaikelako buwame bwenu?

 “Nataana kuba’mba inge nakakachila ku bintu byo naitabilamo ne kubula kuponena mu lweseko, bakwetu bannemeka bingi.”—Kimberly.

 Muntu wanembwa mu Baibolo ye mwafwainwa kulondela: Danyela. Kimye Danyela kyo akijinga mwanyike, “wafuukwilepo mu muchima wanji” amba ukakookelanga mizhilo ya Lesa.—Danyela 1:8.

 Yukai byo mukankalwa kuba. Baibolo waamba pa “bya kusakasaka bya bwanyike,” bintu bikebesha kuba banyike. (2 Timoti 2:22) Abino bya kusakasaka kechi bulalelaletu ne, bino byavwangamo ne kukeba kuba’mba bakwenu bemutemwe ne kukeba kwifuukwilanga bya kuba anweba bene.

 Bya kulangulukapo: Baibolo waamba’mba: “Bino muntu yense wesekwa kupichila mu kumukoka ne kumujimbaika ku bya kusakasaka byanji mwine.” (Yakoba 1:14) Ñanyi bya kusakasaka bimubika bingi mu lweseko?

 “Yukai bintu bimubika bingi mu meseko. Kebakebai bishinka byakonsha kwimukwasha kushinda oo meseko, kabiji nembai bishinka byo mwakonsha kwingijisha. Kuba bino kukemukwasha kushinda lweseko lo mukapitamo kimye kikwabo.”—Sylvia.

 Muntu ye banemba mu Baibolo ye mwafwainwa kulondela: Davida. Pa bimye bimo waubile byamukanjikizhenga bakwabo ne bya kusakasaka byanji mwine. Bino Davida wafunjijileko ku bintu byo alubankenye kabiji wibikileko kuba byawama. Walombele Yehoba amba: “Anweba Lesa, lengai mwi amiwa muchima watoka, kabiji bikai mwi amiwa milanguluko ipya, yashikimana.”—Salamo 51:10.

 Kanainga meseko: Baibolo waamba’mba: “Kange muleke bubi bwimushindenga ne.” (Loma 12:21) Kino kibena kulumbulula’mba kechi mwafwainwa kwikala bazha ku bubi ne. Makonsha kusalapo kubanga bintu byaoloka.

 Bya kulangulukapo: Mwakonsha kukana byepi lweseko ne kuba byawama?

 “Ndanguluka pa byo nakonsha kumvwa inge naponena mu lweseko. Nanchi nkomvwa bulongo nyi? Kampe, pano bino ke pa kimyetu kicheche. Abya nkekala na lusekelo pa kimye kyabaya nyi? Ine, nkomvwangatu kutama ku muchima. Nanchi kyanema nyi? Ine!”—Sophia.

 Muntu wanembwa mu Baibolo ye mwafwainwa kulondela: Paulo. Nangwa kya kuba waswile’mba waikala na milanguluko yatama, bino wiikanyanga. Wanembele’mba: “Nkanya mubiji wami ne kumutwala mu buzha.”—1 Kolinda 9:27, tubyambo twa munshi.

 Kishinka ke kino: Anweba bene yenu mwafwainwa kufuukula bya kuba inge mwatalañana na lweseko.

 Yukai’mba meseko a pa kakimye kachechetu. Nsongwakazhi wa myaka 20 aye Melissa waambile’mba: “Meseko akatampe o napitangamo kimye kyo najinga ku sukulu luno kechi amweka kubaya ne. Kulanguluka pa kino kundengela kushiinwa’mba ne meseko o mbena kupitamo luno akapita kabiji nkekala na lusekelo lwa kuba’mba nashinjile meseko.”