1 Bamfumu 18:1-46
18 Byo papichile moba, mu mwaka wa busatu,+ Yehoba waambijile Elaija amba: “Yanga kwi Ahaba, ne amiwa nkanokesha mvula pa mushiji.”+
2 Onkao mambo, Elaija wayile kwi Ahaba kimye kyo kwajinga kipowe+ kya nzala mu Samaliya.
3 Kabiji Ahaba waichile Obadiya yenka wajinga mukulumpe wa pa nzubo. (Obadiya waakamwanga bingi Yehoba,
4 kabiji Yezebeli+ byo aipayilenga* bangauzhi ba Yehoba, Obadiya wasendele bangauzhi 100 ne kwibafya bantu 50 mu jiyengo, kabiji wibapelenga kajo ne mema.)
5 Kepo Ahaba aambijile Obadiya amba: “Pitañana mu kyalo ku masulo a mema onse ne mu bimpachiko byonse.* Kampe twakonsha kutaanapo munyemvu wa kujiisha bambili ne bamyule kuba’mba bekale bomi pa kuba’mba banyama betu babule kufwa bonse.”
6 Byonkabyo, baabene kwa kuya na kupitañena mu kyalo. Ahaba wayile janji bunke, ne Obadiya wayile janji bunke.
7 Obadiya byo ayilenga mu jishinda, Elaija wamusambakene. Ponkapo wamuyukile kabiji waponene kinkuvumene ne kumushikisha’mba: “Nanchi yenu bankambo ba Elaija nyi?”+
8 Aye wamukumbwile’mba: “Yami iye. Yanga ukabuule nkambo yobe amba: ‘Elaija uji kuno.’”
9 Bino aye waambile’mba: “Ñanyi mambo o nalenga pa kuba’mba amiwa kalume wenu mumpane kwi ba Ahaba amba bangipaye?
10 Byonkatu Yehoba Lesa wenu byo aji na bumi, kafwako kisaka kya bantu nangwa bufumu bankambo ko babujile kutuma bantu na kwimukeba ne. Ne abo byo baambile’mba, ‘Kuno ufwako,’ abo balengejile bufumu ne kisaka kya bantu kuchipa’mba kechi bemumonapo ne.+
11 Pano mubena kuñambila’mba, ‘Yanga ukabuule nkambo yobe amba: “Elaija uji kuno.”’
12 Byo nsakufumakotu kwi anweba, mupashi wa Yehoba usakwimusenda+ ne kwimutwala ku mpunzha ko nabula kuyuka, kabiji inge mbuule ba Ahaba ne abo babule kwimutaana, kine basakungipaya. Kabiji amiwa kalume wenu ngakamwa Yehoba kufumatu ku bwanyike bwami.
13 Nanchi anweba nkambo kechi bemubuula kintu kyo naubile kimye Yezebeli kyo aipayilenga bangauzhi ba Yehoba, byo nafile bangauzhi ba Yehoba 100 mu jiyengo, jibumba jimo bantu 50 ne byo nebapelenga kajo ne mema nenyi?+
14 Pano anweba mubena kuñambila’mba, ‘Yanga ukabuule nkambo yobe amba: “Elaija uji kuno.”’ Kine basakungipaya.”
15 Nangwa byonkabyo, Elaija waambile’mba: “Byonkatu Yehoba wa mabumba byo aji na bumi, yenka ye ñingijila,* lelo mbena kuya kwi aye.”
16 Byonkabyo, Obadiya wayile kwajinga Ahaba ne kumubuula, kabiji Ahaba wayile na kumonañana ne Elaija.
17 Ahaba byo amwenetu Elaija, wamwambijile’mba: “Nanchi ye obewa, yenka waleta luno lukatazho lukatampe* pa bena Isalela nyi?”
18 Aye wakumbwile’mba: “Amiwa kechi naletapo lukatazho pa bena Isalela ne, bino anweba ne ba mu nzubo ya bashenu yenu mwiluleta na mambo a kubula kulondela mikambizho ya Yehoba ne kupopwela Baela.+
19 Pano itai bena Isalela bonse beye kwi amiwa ku Mutumba wa Kamela,+ pamo na bangauzhi ba kwa Baela 450 ne bangauzhi 400 bapopwela bichi bya milumbulumbu byazhila,*+ bonka baja ku tebulu wa ba Yezebeli.”
20 Byonkabyo Ahaba watumine mawi ku bena Isalela bonse ne kukonkanya pamo bangauzhi ku Mutumba wa Kamela.
21 Kepo Elaija ayile ku bantu bonse ne kwamba’mba: “Bimye binga byo mukatwajijila na kukankazhama na milanguluko ibiji?*+ Inge Yehoba ye Lesa wa kine, mulondelai;+ bino inge Baela ye Lesa wa kine, mulondelai!” Bino bantu kechi baambilepo kyambo nangwa kimo kya kumukumbula ne.
22 Kepo Elaija aambijile bantu amba: “Yami yenka ngauzhi wa Yehoba washalapo,+ pakuba bangauzhi ba kwa Baela baji 450.
23 Betupe baana ba bañombe babiji, kabiji basalepo mwana ñombe umo ne kumuchibaula bipimvwa bipimvwa ne kumubika pa nkunyi, bino kange babikepo mujilo ne. Ne amiwa nsakunengezha mwana ñombe mukwabo, kabiji nsakumubika pa nkunyi, bino kechi nsakubikapo mujilo ne.
24 Apa bino mwite pa jizhina ja lesa wenu,+ ne amiwa nsakwita pa jizhina ja Yehoba. Lesa yenka usakukumbula na mujilo, ye usakumwesha’mba ye Lesa wa kine.”+ Ponkapo bantu bonse bakumbwile’mba: “Mwaamba bulongo.”
25 Kepo Elaija aambijile bangauzhi ba kwa Baela amba: “Salaipo mwana ñombe umo kabiji mwikale batanshi kumunengezha, mambo yenu mwavula. Apa bino mwite pa jizhina ja lesa wenu, bino kange mubikepo mujilo ne.”
26 Byonkabyo, basendele mwana ñombe ye bebapele ne kumunengezha, kabiji baichilenga pa jizhina ja Baela kufuma lukelo kufika ne pa kushinkamana juba, saka bamba’mba: “Anweba Baela, tukumbulai!” Bino kechi kwajinga jiwi nangwa wa kwibakumbula ne.+ Batwajijile kukilauka saka bazhokoloka kya kusokelapo bitapisho kyo balengele.
27 Pa kushinkamana juba, Elaija watendekele kwibendeleka amba: “Bijikishai! Mambo aye ye lesa!+ Kampe ubena kulangulukisha nangwa kampe waya na kupambuka.* Nangwa kampe walaala kubena kukebewa wa kumubuusha!”
28 Babijikilenga bingi ne kwichibaula abo bene na mapoko ne na mafumo, monka mwayijile kisho kyabo, kya kuba ne mashi apokomokelenga pa mibiji yabo.
29 Kabiji juba byo jaalukile batwajijile na kuba kiwowo,* kufikatu ne kimye kyo balambwilapo mulambo wa kajo wa mabanga, bino kechi kwajinga jiwi nangwa wa kwibakumbula ne; kafwako nangwa umo wateleko muchima ne.+
30 Pa kupitapo kimye, Elaija waambijile bantu bonse amba: “Iyai ko nji.” Ne bantu bonse baishile ko ajinga. Kepo awamishe kya kusokelapo bitapisho kya Yehoba kyo bakundwile.+
31 Kabiji Elaija watolele mabwe 12, monka mwayijile kuvula kwa mikoka ya baana ba kwa Yakoba, yenka Yehoba ye aambijile’mba: “Jizhina jobe jisakwikala Isalela.”+
32 Washimikile kya kusokelapo bitapisho+ na ano mabwe mu jizhina ja Yehoba. Kepo apoyile mufolo kuzhokoloka kya kusokelapo bitapisho, mpunzha yabaya ya kukonsha kubyalapo nkunwa ya bipimo bya seya* bibiji.
33 Kepo atanchikile nkunyi bulongo ne kuchibaula mwana ñombe bipimvwa bipimvwa, ne kwibibika pa nkunyi.+ Kabiji waambile’mba: “Yuzhai mema mu milondo ikatampe ina ne kwiechila pa mulambo wa kusoka ne pa nkunyi.”
34 Kepo aambile’mba: “Ichilaipo jibiji.” Ne abo baichijilepo. Kabiji wibambijile’mba: “Ichilaipo ja busatu.” Ne abo baichijilepo ja busatu.
35 Kabiji mema akumbene pa kya kusokelapo bitapisho kyonse, kabiji wayuzhizhe mema ne mu mufolo.
36 Pa kimye kyo balambwilapo mulambo wa kajo wa mabanga,+ ngauzhi Elaija wayile kulutwe ne kwamba’mba: “Anweba Yehoba, Lesa wa Abalahama,+ wa Izaka+ ne wa Isalela, lelo jino kiyukanyikwe amba yenu Lesa mu Isalela ne kuba’mba amiwa ne kalume wenu, ne kuba’mba nauba bino bintu byonse monka mwayila byambo byenu.+
37 Anweba Yehoba, nkumbulai! Nkumbulai pa kuba’mba bano bantu bayuke’mba anweba Yehoba, yenu Lesa wa kine, ne kuba’mba yenu mubena kwalulwila michima yabo ko muji.”+
38 Ponkapo mujilo wa Yehoba waponene kufuma mwiulu ne kusoka mulambo wa kusoka,+ ne nkunyi, ne mabwe ne maloba, kabiji waumishe ne mema ajinga mu mufolo.+
39 Bantu bonse byo bamwene kino, ponkapotu bakinkile bilungi panshi ne kwamba’mba: “Yehoba ye Lesa wa kine! Yehoba ye Lesa wa kine!”
40 Kepo Elaija ebambijile’mba: “Kwatai bangauzhi ba kwa Baela! Kange mupulushepo nangwa umo ne!” Ponkapo bebakwachile, ne Elaija wibatwajile ku kakola ka Kishonyi+ ne kwibepayila konkakwa.+
41 Kepo Elaija aambijile Ahaba amba: “Tuntukai, muye na kuja ne kutoma, mambo mvula mukatampe ubena kupoota.”+
42 Byonkabyo, Ahaba watuntukile ne kuya na kuja ne kutoma, kabiji Elaija watuntukile ne kuya peulu ya Kamela kabiji wazonzomene saka akinka kilungi kyanji pa manungo.+
43 Kepo aambijile wa mwingilo wanji amba: “Tuntuka, utale ku kalunga ka mema.” Byonkabyo, watuntukile ne kutalako ne kwamba’mba: “Kafwako kintu nangwa kimo ne.” Elaija wamwambijile bimye bitanu na bibiji amba, “Bwelako.”
44 Pa kimye kya butanu na bubiji, wa mwingilo wanji waambile’mba: “Talai! Kuji kajikumbi kacheche kaji nobe kuboko kwa muntu kabena kutuntuka kufuma mu kalunga ka mema.” Kepo amwambijile’mba: “Yanga ukambile ba Ahaba amba; ‘Nengezhai kalaki! Kunkulukai pa kuba’mba mvula abule kwimushinkila!’”
45 Pa kyonkakya kimye, jiulu jafinjile makumbi ne mwela wapupilenga, kabiji mvula mukatampe watendekele kunoka,+ ne Ahaba watwajijile kwenda pa kalaki kuya ku Yezelela.+
46 Bino kuboko kwa Yehoba kwaishile pe Elaija, ne aye wanyingile kivwalo kyanji mu lubunda ne kunyema lubilo kupitayila Ahaba kukafika ne ku Yezelela.
Tubyambo twa munshi
^ Mu Kihebelu, “achibilengako.”
^ Nangwa’mba “tukola tonse.”
^ Mu Kihebelu, “yenka ye ñimanako.”
^ Nangwa’mba “waleta bya malwa.”
^ Nangwa’mba “pa mikombo ibiji.”
^ Nangwa, “waya pa lwendo.”
^ Nangwa’mba “kuba nobe bangauzhi.”
^ Kipimo kya seya kyaesakana na malita 7.33. Monai bya Kulumbulula B14.
