1 Bamfumu 19:1-21
19 Kepo Ahaba+ abuujile Yezebeli+ bintu byonse byaubile Elaija ne byo aipayile bangauzhi bonse na mpoko.+
2 Ponkapo Yezebeli watumine muluwe kwi Elaija ne kumwambila’mba: “Kine balesa bakankambule inge kesha pa kyonka kino kimye nkabule kukulengela kwikala byonka byo baji!”*
3 Ponkapo waumvwine moyo, kabiji waimene ne kunyema kuba’mba apulushe bumi* bwanji.+ Wafikile ku Belesheba+ wa mu Yuda,+ kabiji ko ko ashile wa mwingilo wanji.
4 Waendele lwendo lwa juba jimo kuya mu kiselebwa, kabiji wafikile ne kwikala munshi ya kipupu, kabiji watatwile kulomba’mba afwe.* Waambile’mba: “Byawana! Anweba Yehoba tambulai bumi* bwami,+ mambo amiwa kechi nawama kukila bashakulu bami ne.”
5 Kepo asendalele ne kuponena mu tulo munshi ya kipupu. Bino malaika wamusunsunyinye+ ne kumwambila’mba: “Buuka uje.”+
6 Byo akenkentele, wamwene ku mitwe yanji shinkwa wanzhingwile saka aji pa mabwe atwa kyuya ne mulondo wa mema. Wajiile ne kutoma kabiji walaajile jibiji.
7 Malaika wa Yehoba waishile ja bubiji ne kumusunsunya ne kumwambila’mba: “Buuka uje, mambo lwendo lo usakwenda lwalepa bingi.”
8 Onkao mambo, wabuukile ne kuja ne kutoma, kabiji na mambo a bulume bwamupele kano kajo waendele moba 40 mute ne bufuku posotu ne byo afikile ku Holeba, mutumba wa Lesa wa kine.+
9 Konkakwa watwelele mu jiyengo+ ne kulaala monka bufuku; kabiji jiwi ja Yehoba jaishile kwi aye ne kumushikisha’mba: “Elaija, ubena kuba ka kuno?”
10 Aye wakumbwile’mba: “Nemubila mukoyo anweba Yehoba Lesa wa mabumba;+ mambo bena Isalela bakana lulayañano lwenu,+ kabiji bakundula bya kusokelapo bitapisho byenu, ne bangauzhi benu bebepaya na mpoko,+ kabiji yami yenka nashalapo. Pano babena kukeba konauna ne bumi* bwami.”+
11 Bino aye wamwambijile’mba: “Lupuka ukemane pa mutumba ku meso a Yehoba.” Kabiji Yehoba wapichilenga,+ ne kinkunkwila kikatampe kyaabenyenga mitumba ne kulalaula mabwe konka ku meso a Yehoba,+ bino Yehoba kechi wajinga mu kinkunkwila ne. Kinkunkwila byo kyapichile, palondejile kitentanshi,+ bino Yehoba kechi wajinga mu kitentanshi ne.
12 Kitentanshi nakyo byo kyapichile, palondejile mujilo,+ bino Yehoba kechi wajinga mu mujilo ne. Mujilo byo apichile, palondejile jiwi jicheche, jaambijilenga munshi.+
13 Elaija byo aumvwinetu jino jiwi, wivwetele kivwalo kyanji ku meso+ ne kulupuka ne kwimana ku kibelo kya jiyengo. Kepo jiwi jamushikishe’mba: “Elaija, ubena kuba ka kuno?”
14 Aye wakumbwile’mba: “Nemubila mukoyo anweba Yehoba Lesa wa mabumba; mambo bena Isalela bakana lulayañano lwenu,+ kabiji bakundula bya kusokelapo bitapisho byenu, ne bangauzhi benu bebepaya na mpoko, kabiji yami yenka nashalapo. Pano babena kukeba konauna ne bumi* bwami.”+
15 Yehoba wamwambijile’mba: “Bwelamo, uye ku kiselebwa kya Damasakasa. Byo usakufika, umushinge manyi Hazela+ kuba’mba ekale ke mfumu wa Silya.
16 Kabiji wafwainwa kumushinga manyi Yehu+ munkana wa kwa Nimushi kuba’mba ekale ke mfumu wa mu Isalela, kabiji wafwainwa ne kushinga manyi Elisha* mwana wa kwa Shafwata wa ku Abela-mehola kuba’mba akekale ke ngauzhi wa kupinga pe obewa.+
17 Yense ukapuluka ku mpoko ya kwa Hazela,+ bakamwipaya kwi Yehu;+ kabiji yense ukapuluka ku mpoko ya kwa Yehu, bakamwipaya kwi Elisha.+
18 Kabiji mu Isalela nashamo bantu 7,000,+ bonka babula kufukaminapo Baela+ kabiji baji na tunwa twabula kumufyompapo.”+
19 Byonkabyo, wafumineko kokwa kabiji wataaine Elisha mwana wa kwa Shafwata saka ajima na bañombe 12 bo bakashile babiji babiji ku bikonkoji saka baji kulutwe yanji, kabiji aye wajinga na bañombe bajinga ku kikonkoji kya bu 12. Onkao mambo, Elaija wayile kwi aye ne kumukupika kivwalo kyanji.+
20 Ponkapo washile bañombe ne kumulondela lubilo Elaija ne kwamba’mba: “Mwane, nswishai ngye nkafyompe batata ne bamama. Apa bino ngiye nemulondelenga. Aye wamukumbwile’mba: “Yanga, ñanyi kintu kyo nauba kisakukulengela kubula kuya?”
21 Byonkabyo, wabwelelemo ne kusenda bañombe babiji ne kwibatapisha, kabiji waingijishe bintu byo ajiminangako kutekelako nyama ya ñombe ne kwiipana ku bantu ne abo beijiile. Kepo aimene ne kulondela Elaija kabiji watendekele kumwingijila.+
Tubyambo twa munshi
^ Nangwa’mba “kulengela mweo wobe kwikala nobe mweo wabo.”
^ Nangwa’mba “mweo wanji.”
^ Nangwa’mba “mweo wami.”
^ Nangwa’mba “mweo afwe.”
^ Nangwa’mba “mweo wami.”
^ Nangwa’mba “mweo wami.”
^ Kulumbulula’mba “Lesa ye Lupulukilo.”
