Buku Mutanshi wa Bamfumu 4:1-34
4 Mfumu Solomone walamine bena Isalela bonse.+
2 Abano bo bajinga babinemanga banji: Azaliya mwana wa kwa Zadoka+ wajinga ñanga;
3 Eliholefwa ne Ahiya baana ba kwa Shisha bajinga banembeshi;+ Yehoshafwata+ mwana wa kwa Ahiluda wajinga munembeshi wa mambo;
4 Benaya+ mwana wa kwa Yehoyada ye wajinga mukulumpe wa nzhita; Zadoka ne Abiata+ bajinga bañanga;
5 Azaliya mwana wa kwa Natana+ ye wajinga mukulumpe wa bakapitao; Zabuda mwana wa kwa Natana ye wajinga ñanga kabiji mulunda wa mfumu;+
6 Ahisha ye wajinga mukulumpe wa pa nzubo; kabiji Adonyilama+ mwana wa kwa Abeda ye watangijilanga aba bo bakambizhe kwingijila mfumu.+
7 Solomone wajinga na bakapitao 12 batangijilenga bena Isalela bonse kabiji bo banengezhanga kajo ka mfumu ne ka ba mu nzubo yanji. Kapitao umo umo wajinga na mwingilo wa kunengezha kajo pa ñondo umo mu mwaka.+
8 Ano o ajinga mazhina abo: Mwana wa kwa Hula, ye walaminenga kibunji kya mitumba kya Efelaimu;
9 mwana wa kwa Dekela, ye walaminenga mu Makaza, mu Shalabimu,+ mu Bete-shemeshi ne mu Elona-bete-hanana;
10 mwana wa kwa Heseda ye walaminenga mu Alubota (walaminenga ne Soko ne kyalo kyonse kya Hefela);
11 mwana wa kwa Abinadaba walaminenga mpunzha ya mikolo yonse ya ku Dola (wasongwele Tafwata mwana wa mukazhi wa kwa Solomone);
12 Beana mwana wa kwa Ahiluda, ye walaminenga mu Taanaka, mu Megido+ ne monse mu Bete-sheana,+ uji kwipi na Zaletana munshi ya Yezelela, kufuma ku Bete-sheana kukafika ne ku Abela-mehola mu kibunji kya Yokemeama;+
13 mwana wa kwa Gebela ye walaminenga mu Lamota-gileada+ (wajinga na mizhi ya matente ya kwa Yaila+ mwana wa kwa Manase iji mu Gileada;+ kabiji walaminenga ne kibunji kya Alagoba+ kiji mu Bashana:+ mizhi ikatampe 60 yajinga na masakwa ne mipingilo ya mukuba);
14 Ahinadaba mwana wa kwa Ido, ye walaminenga mu Mahanaimu;+
15 Ahimaza, ye walaminenga mu Nafitali (wasongwele Bashemata mwana wa mukazhi mukwabo wa kwa Solomone);
16 Beana mwana wa kwa Hushai, ye walaminenga mu Ashela ne mu Beyalota;
17 Yehoshafwata mwana wa kwa Palua, ye walaminenga mu Isakala;
18 Shimei+ mwana wa kwa Ela, ye walaminenga mu Benjamina;+
19 Gebela mwana wa kwa Uli, ye walaminenga kyalo kya Gileada,+ kyalo kya kwa Sihona+ mfumu wa bena Amoli ne Oga+ mfumu wa Bashana. Kwajinga ne kapitao wajinga mukulumpe pa bano bonse bakapitao ba mu kyalo.
20 Bena Yuda ne bena Isalela bavujile bingi nobe busenga bwa ku kalunga ka mema;+ bajanga ne kutoma ne kusangalala.+
21 Solomone walaminenga byalo byonse kufuma ku Mukola*+ kukafika ne ku kyalo kya bena Filishitiya ne ku mupaka wa Ijipita. Baletanga milambo kabiji bamwingijilanga Solomone mu moba onse a bumi bwanji.+
22 Kajo ka kwa Solomone ka pa juba pa juba kajinga makolo* 30 a bunga bwalamba ne makolo 60 a bungatu,
23 bañombe banuna 10, bañombe bakwabo 20 bo bajishanga mungye ne mikooko 100, kubikapo ne balupaala, bansebula, basontwa ne bañonyi banuna.
24 Mambo aye watangijilenga bintu byonse byajinga ku buno bushiya bwa Mukola,*+ kufuma ku Tifisa kufikatu ne ku Gaza,+ kubikapotu ne bamfumu bonse bajinga ku buno bushiya bwa Mukola; kabiji waikelenga mu mutende mu bibunji byonse byamuzhokolokele.+
25 Bena Yuda ne bena Isalela baikele ku matwi nzoo, muntu yense waikelenga munshi ya muñanzañanza wanji ne munshi ya kichi kyanji kya mukuyu, kufuma ku Danyi kukafika ne ku Belesheba, mu moba onsetu a kwa Solomone.
26 Kabiji Solomone wajinga na bipaka 4,000* bya bambili ba ku makalaki anji ne bambili* 12,000.+
27 Bano bakapitao baletanga kajo kwi Mfumu Solomone ne ku bonse bajanga ku tebulu wa Mfumu Solomone. Kapitao yense wajinga na mwingilo wa kunengezha kajo mu ñondo, kabiji wamonanga’mba kafwako kintu nangwa kimo kyabulapo ne.+
28 Kabiji baletanga mbaale ne nsono kimye kyonse kyo byakebewenga kupa bambili ne bipanyi bya bambili, muntu yense monka mwayijile mwingilo wanji.
29 Kabiji Lesa wapele Solomone maana avula ne milangwe ya kukankalwa kuyuka ne muchima* wa kuyukisha bintu byavula nobe busenga bwa ku kitulu kya ku kalunga ka mema.+
30 Maana a kwa Solomone akijile maana a bantu bonse ba ku Musela ne maana a bena Ijipita bonse.+
31 Wajinga bingi na maana kukila bantu bonse, kukila Etana+ mwina Ezela ne Hemanyi,+ ne Kalakola,+ ne Dala, baana ba kwa Mahola; nkuwa yanji yafikile mu bisaka byonse byamuzhokolokele.+
32 Wanembele* bishimpi 3,000,+ kabiji nyimbo yanji+ yajinga 1,005.
33 Waambanga pa bichi, kutendekela pa kichi kya sida kiji ku Lebanoni kufika ne ku kakichi ka isopi+ kamena ku lubumbulu; waambanga pa banyama,+ bañonyi,*+ bikalaba panshi*+ ne pa masabi.
34 Bantu ba mu bisaka byonse baiyanga na kumvwa maana a kwa Solomone, kubikapotu ne bamfumu bonse ba pano pa ntanda baumvwine maana anji.+
Tubyambo twa munshi
^ Ko kuba’mba, Ufelata.
^ Kipimo kya kolo kyaesakana na malita 220. Monai bya Kulumbulula B14.
^ Ko kuba’mba, ku muzhika wa Ufelata.
^ Ino nambala itanwa mu manyusikilipiti ne mu mabuku akwabo. Manyusikilipiti akwabo amba’mba 40,000.
^ Nangwa’mba “benda pa bambili.”
^ Nangwa’mba “muchima wa milangwe.”
^ Nangwa’mba “waambile.”
^ Nangwa’mba “bilengwa bitumbuka.”
^ Kampe’mba kuvwangakotu ne binyama bisema make ne bilongolo.
