1 Kolinda 12:1-31
12 Balongo bami, pa mambo a bya bupe bya ku mupashi,+ kechi nakeba namba mbule kwimubuula kino ne.
2 Mwayuka kuba’mba byo mwakijinga bantu ba mu bisaka* bya bantu, mwatwajilwe mungi na bankishi babula kwamba,+ saka mwibalondela konse konse ko bemutwajilenga.
3 Mbena kukeba muyuke’mba kafwako muntu nangwa umo inge ubena kwamba na mupashi wa Lesa wakonsha kwamba’mba: “Yesu wafingwa!” ne, kabiji kafwako wakonsha kwamba’mba: “Yesu ye Nkambo!” ne, kanatu na mupashi wazhila.+
4 Kuji bya bupe byapusana pusana, bino kujitu mupashi umo;+
5 kabiji kuji mingilo yapusana pusana,+ bino kujitu Nkambo umo;
6 kuji mingilo* ya misango ne misango, bino Lesa umo yenka ye wiingila yonse mu bonse.+
7 Bino mupashi wamwekela mu bonse pa muntu pa muntu kuba’mba bakwashe bakwabo kumwenamo bintu byawama.+
8 Mambo umo bamupa kya bupe kya kwamba* byambo bya maana na mupashi, kabiji na yenka uno mupashi mukwabo naye bamupa kya bupe kya kwamba bintu byo ayuka,
9 kabiji na yenka uno mupashi, umo bamupa lwitabilo,+ mukwabo bamupa kubuka bakolwa+ na yenka uno mupashi,
10 mukwabo naye bamupa kya bupe kya kuba mingilo ya kukumya,+ mukwabo kya kwaula, mukwabo kya milangwe ya kuyuka kana byambo byafuma kwi Lesa nangwa ne,+ mukwabo kya bupe kya kwamba mu njimi* ingi,+ ne mukwabo kya bupe kya kulumbulula njimi.+
11 Bino bintu byonse bebingila na mupashi umotu, saka ebabanya pa muntu pa muntu monka mo asakila mupashi.
12 Mambo byonkatu mubiji byo aji umo ne kwikala na binungwa byavula, nangwa kya kuba binungwa bya mubiji byavula ye mubiji umo,+ abino byo biji ne Kilishitu.
13 Mambo atweba bonse twabatizhiwe na mupashi umo kwikala mubiji umo, nangwa Bayudea nangwa Bangiliki, nangwa bazha nangwa baana ba bene, kabiji bonse twatambwile mupashi umotu.
14 Mambo mubiji kechi ujitu na kinungwa kimo ne, uji na binungwa byavula.+
15 Umvwe kulu kwaamba’mba: “Amiwa byo nabula kwikala kuboko, kechi nekinungwa kya mubiji ne,” kino kechi kilengela kulu kubula kwikala kinungwa kya mubiji ne.
16 Kabiji umvwe kutwi kwaamba’mba, “Amiwa byo nabula kwikala jiso, kechi nekinungwa kya mubiji ne,” kino kechi kilengela jiso kubula kwikala kinungwa kya mubiji ne.
17 Umvwe mubiji yense wajinga jiso, inge tumvwina ku ka? Umvwe mubiji yense wajingatu kutwi, inge tumvwa byepi bwema?
18 Bino Lesa wabika binungwa bya mubiji ponka po byafwainwa kwikala, monka mwaswila muchima wanji.
19 Umvwe binungwa byonse byajingatu kimo, inge mubiji uji pi?
20 Bino kuji binungwa bya mubiji byavula, pakuba mubiji ye umotu.
21 Jiso kechi jakonsha kwambila kuboko amba, “Kechi mbena kukukeba ne,” nangwa mutwe kechi wakonsha kwambila maulu amba, “Kechi mbena kwimukeba ne.”
22 Nangwa byonkabyo, binungwa bya mubiji bimweka nobe byanekena, bikebewa bingi.
23 Kabiji binungwa bya mubiji byo tumona’mba kechi byanema ne, twibivwika bulongo,+ onkao mambo binungwa bya mubiji wetu bitulengela kumvwa bumvu, twibivwika bulongo.
24 pakuba binungwa bimweka bulongo kechi bikebewa kintu ne. Nangwa byonkabyo, Lesa wanungakenye mubiji, ne kunemeka binungwa bimweka nobe kechi byanema ne,
25 pa kuba’mba mu mubiji mubule mabano, poso amba binungwa bya mubiji bilame bine na bine.+
26 Umvwe kinungwa kimo kyamanama, ne binungwa byonse bimanamina nakyo pamo;+ nangwa umvwe kinungwa kimo kyatumbijikwa, binungwa bikwabo bisekela nakyo pamo.+
27 Anweba mwi mubiji wa Kilishitu,+ ne anweba bonse pa muntu pa muntu mwi binungwa.+
28 Kabiji Lesa watongola bamo mu kipwilo: batanshi batumwa;+ ba bubiji bangauzhi;+ ba busatu bafunjishi;+ kepo mingilo ya kukumya;+ bya bupe bya kubuka bikola;+ mingilo ya kukwashañana; maana a kutangijila bantu;+ ne njimi yapusana pusana.+
29 Nanchi bonse batumwa nyi? Abya bonse bangauzhi nyi? Nanchi bonse bafunjishi nyi? Abya bonse boba mingilo ya kukumya nyi?
30 Nanchi bonse baji na bya bupe bya kubuka bakolwa nyi? Abya bonse bamba mu njimi nyi?+ Nanchi bonse balumbulula* byambo nyi?+
31 Bino ibikaingako* kukanamina bya bupe byakila mu kunema.+ Pano bino nsakwimubuula jishinda jakila mashinda onse.+
Tubyambo twa munshi
^ Ko kuba’mba babula kwitabila.
^ Nangwa’mba “ñingijilo.”
^ Nangwa’mba “byambo.”
^ Nangwa’mba “milaka.”
^ Nangwa’mba “bantuntuluzhi.”
^ Nangwa’mba “kebeshainga na mukoyo.”
