Buku Mutanshi wa Samwela 30:1-31
30 Davida ne bantu banji byo babwelele ku Zikilagi+ pa juba ja busatu, bataaine bena Amaleki+ balukuka kala kyalo kya ku kabeta ka ku bulenge* ne Zikilagi, balukukile muzhi wa Zikilagi ne kumusoka na mujilo.
2 Batwajile mu buzha banabakazhi+ ne byonse byajingamo, kutendekelatu ku kicheche kufika ne ku kikatampe. Kafwako nangwa umo ye baipayile ne, bino bebasendele ne kuya bayile.
3 Davida ne bantu banji byo bafikile mu muzhi, bataaine kuba’mba muzhi bamusoka, kabiji bakazhi babo, baana babo ba balume ne baana babo ba bakazhi bebatwala mu buzha.
4 Ponkapo Davida ne bantu bo ajinga nabo batendekele kujila mabingo, kufikatu ne bulume bwa kujila byo bwapwile.
5 Bakazhi ba kwa Davida babiji nabo bebatwajile mu buzha, Ahinoamu wa ku Yezelela ne Abigaila wajinga muka Nabala mwina Kamela.+
6 Davida wajinga bingi na bulanda, mambo banabalume baambilenga bya kumwasa mabwe, mambo bantu* bonse bazhingijile bingi na mambo a kwibasendela baana babo ba balume ne baana babo ba bakazhi. Bino Davida wakosele na mambo a bukwasho bwa Yehoba Lesa wanji.+
7 Kepo Davida aambijile Abiata+ ñanga mwana wa kwa Ahimeleki amba: “Nakusashijilapo, leta kajilaya kabula maboko kuno.”+ Ne Abiata waletele kajilaya kabula maboko kwi Davida.
8 Davida waipwizhe Yehoba+ amba: “Nanchi neipupile ino nzhita nyi? Abya nsakwibataana nyi?” Ponkapo Lesa wamwambijile’mba: “Bapupile, mambo kine usakwibataana kabiji usakupokolola byonse.”+
9 Ponkapotu Davida wayile na banabalume 600+ bo ajinga nabo, kabiji bakafikile ne ku Kakola* ka Besola, konka kwakashajile banabalume bamo.
10 Davida watwajijile kwibapupila na banabalume 400, bino banabalume 200 bakookeletu zubulu kya kuba bakankalwa ne kwabuka Kakola ka Besola, bashajile.+
11 Bataaine mwanamulume mwina Ijipita mungye ne kumuleta kwi Davida. Bamupele kajo ne mema a kutoma,
12 ne kibese kya shinkwa ye balengele na makuyu a kufina ne bashinkwa babiji bo balengele na mañanzañanza auma. Byo ajiile, ngovu yabwelelemo,* mambo kechi wajiilepo kajo nangwa kutoma mema pa moba asatu, mute ne bufuku ne.
13 Kepo Davida amwipwizhe’mba: “Obewa wi wa kwa ñanyi, kabiji wafuma kwepi?” Aye wakumbwile’mba: “Ne wa mwingilo mwina Ijipita, muzha wa mwanamulume mwina Amaleki, bino nkambo yami wanshile mambo nakolelwe moba asatu apitapo.
14 Twalukukile kyalo kya bena Keleta+ ku kabeta ka ku bulenge* ne nyaunda ya Yuda ne kyalo kya Kaleba+ ku kabeta ka ku bulenge,* ne muzhi wa Zikilagi twamusokele na mujilo.”
15 Ponkapo Davida wamwipwizhe’mba: “Nanchi wakonsha kuntwala kuji ino nzhita nyi?” Aye wamukumbwile’mba: “Inge muchipe kwi amiwa mu jizhina ja Lesa amba kechi musakungipaya ne, ne kuba’mba kechi musakumpana kwi nkambo yami ne, nsakwimutwala kuji ino nzhita.”
16 Onkao mambo, wamutwajile ku mpunzha ko bajinga saka baikala kukumbana mpunzha yonse, saka baja ne kutoma ne kusangalala na mambo a bintu byavula byo basendele kufuma mu kyalo kya bena Filishitiya ne kyalo kya Yuda.
17 Kepo Davida ebatapile kufumatu ku makya kufika ne mabanga; kafwako muntu nangwa umo wanyemene ne,+ kanatu aba banabalume 400 bakanjijile pa bangamela ne kunyema.
18 Davida waangachile bintu byonse byo basendele bena Amaleki,+ kabiji Davida wapokolwele bakazhi banji babiji.
19 Kafwako kintu kyabo nangwa kimo kyaelekele ne, kutendekelatu ku kicheche kufika ne ku kikatampe. Bapokolwele baana babo ba balume ne baana babo ba bakazhi ne bintu byo bebapukwile;+ Davida waangachile bintu byonse byo basendele.
20 Kabiji Davida wasendele mikooko ne bañombe bonse, bo bafungilenga ne kwibatangizhako kulutwe ya banyama babo. Baambile’mba: “Abino byo bipukulwa bya kwa Davida.”
21 Kepo Davida afikile pajinga banabalume 200 bonka bakookeletu zubulu kya kuba bakankalwa ne kuya ne Davida, aba bonka bashajile ku Kakola ka Besola,+ ne abo bamutundaijile Davida ne bantu bo ajinga nabo. Davida byo afikile kwipi na bano banabalume wibemwine.
22 Nangwa byonkabyo, bantu batama kabiji babula maana bajinga pa boba bayile ne Davida baambile’mba: “Na mambo a kuba’mba kechi bayile ne atweba ne, kechi tusakwibapapo bipukulwa byo twapokolola ne, basakusendatu bakazhi babo ne baana babo ne kuya bayenga.”
23 Bino Davida waambile’mba: “Balongo bami, kange mube kino pa bintu Yehoba byo etupa ne. Wituzhikijile ne kupana mu maboko etu nzhita yaishile na kwitulukuka.+
24 Ñanyi usakuswa byo mwaamba? Kintu kisakutambula yense wayile ku nkondo, kyo kisakutambula ne yense washajile na bipe.+ Bonse basakutambula.”+
25 Kabiji kufumatu jonkaja juba kuya ne kulutwe, kino kintu wikilengele kwikala ke jilamuna ne muzhilo ku bena Isalela kufika ne lelo jino.
26 Davida byo abwelele ku Zikilagi, watuminepo bipukulwa bimo ku bakulumpe ba mu Yuda bajinga balunda nanji ne kwamba’mba: “Buno bo bupe* bwenu bwafuma pa bipukulwa bya balwanyi ba Yehoba.”
27 Wibutumine ku boba bajinga ku Betele,+ ne bajinga ku Lamota wa mu Negeba,* ne bajinga ku Yatila,+
28 ne bajinga ku Aloa, ne bajinga ku Sifumota, ne bajinga ku Eshitemoa,+
29 ne bajinga ku Lakala, ne bajinga mu mizhi ya bena Yelamela,+ ne bajinga mu mizhi ya bena Keni,+
30 ne bajinga ku Holama,+ ne bajinga ku Bolashane, ne bajinga ku Ataki,
31 ne bajinga ku Hebulona+ ne mu mapunzha onse mwayanga Davida ne bantu banji.
Tubyambo twa munshi
^ Nangwa’mba “ku Negeba.”
^ Nangwa’mba “mambo myeo ya bantu.”
^ Monai Mutanchi.
^ Mu Kihebelu, “mupashi wanji wabwelele mwi aye.”
^ Nangwa’mba “ku Negeba.”
^ Nangwa’mba “ku Negeba.”
^ Mu Kihebelu, “Ano o mapesho.”
^ Nangwa’mba “wa ku kabeta ka ku bulenge.”
