2 Samwela 18:1-33
18 Kepo Davida abajile bantu bo ajinga nabo ne kwibatongwela bakulumpe ba pa biumbi ne ba pa bitota.+
2 Kabiji Davida watumine kipanyi kimo kuya ne Yoaba,+ ne kipanyi kya bubiji kuya ne Abishai+ mwana wa kwa Zeluya,+ mulongo wa kwa Yoaba, ne kipanyi kya busatu kuya ne Itai+ mwina Gata. Kepo mfumu aambijile bano banabalume amba: “Ne amiwa nsakuya nenu.”
3 Bino abo baambile’mba: “Ine kange muye ne,+ mambo inge tukanyeme, kechi bakatako muchima kwi* atweba ne; kabiji inge kichika kimo mwi atweba kyafwa, kechi baketuta muchima ne, mambo anweba mwaesakana na bantu 10,000 kunema.+ Onkao mambo, kyakonsha kuwama bingi inge mwitutumina bukwasho kufuma kuno ku muzhi.”
4 Mfumu wibambijile’mba: “Nsakwimubila kyonse kyo mwamona’mba kyawama.” Byonkabyo, mfumu waimene ku kibelo kya muzhi, ne banabalume bonse balupukile mu bipanyi bya bitota ne bya biumbi.
5 Kepo mfumu akambizhe Yoaba ne Abishai ne Itai amba: “Kange mukamukatazhe nsongwalume Abisalomo na mambo a amiwa ne.”+ Bantu bonse baumvwine, mfumu byo akambizhe bakulumpe bonse na mambo a kwa Abisalomo.
6 Kepo banabalume bayile mungye na kusambakana bena Isalela, ne nkondo yaikejile mu jisaka ja Efelaimu.+
7 Konkakwa bena Isalela+ bebashinjile ku bakalume ba kwa Davida,+ ne bantu bavula bafwile pa joja juba, bantu 20,000.
8 Nkondo yakumbene kibunji kyonse. Kabiji bafwijile mu jisaka bavujile kukila bafwile ku mpoko aja juba.
9 Kabiji Abisalomo bamusambakene ku bakalume ba kwa Davida. Abisalomo waendelenga pa myule, kabiji myule wapichile munshi ya kichi kikatampe kyajinga na misampi yavula, ne mutwe wanji wakobamine mu kichi kikatampe, kya kuba washajile na kupepela* kabiji myule ye aendelengapo wayile.
10 Muntu umo wamumwene ne kwambila Yoaba amba:+ “Umvwai! Namona Abisalomo saka akobama ku kichi kikatampe.”
11 Yoaba waambijile awa muntu wamubuujile amba: “Inge waji kumumona, mambo ka o waji kubujila kumutapa ponkapotu kuba’mba aponene panshi? Inge naji kukupa mashekele a siliva jikumi ne mushipi.”
12 Bino uno muntu waambijile Yoaba amba: “Nangwa kya kuba bampa* mashekele a siliva 1,000, kechi nakonsha kutanyika kuboko kwami pa mwana mfumu ne kumuba kyatama ne, mambo twaumvwine mfumu byo emukambizhe anweba ne Abishai ne Itai amba, ‘Muntu yense kechi wafwainwa kumuba kyatama nsongwalume Abisalomo ne.’+
13 Inge naji kubula kukookela ne kumwipaya,* inge kyasoloka ku ba mfumu, kabiji anweba inge kechi mwaji kunzhikijila ne.”
14 Kepo Yoaba aambile’mba: “Kechi nsakutaya kimye ne obewa ne!” Onkao mambo, wasendele byela byatwa* bisatu mu kuboko kwanji ne kwibikulukusa pa muchima wa kwa Abisalomo saka akipema pakachi ka misampi ya kichi kikatampe.
15 Kepo ba mwingilo ba kwa Yoaba basendele bilwilo byanji baishile ne kutapa Abisalomo kufikatu ne byo afwile.+
16 Ponkapo Yoaba wavuminye lusengo, ne bantu bapupijilenga bena Isalela babwelelemo; Yoaba wibambijile’mba baleke kulwa.
17 Bashikwile Abisalomo ne kumutaya mu kimbo kikatampe kyajinga mu jisaka, kabiji bamulumbikile mulumba mukatampe wa mabwe.+ Kabiji bena Isalela bonse banyemejile ku mazubo abo.
18 Abisalomo byo akijinga mumi, washikwile jishiki ne kwijimika mu Kimpachiko* kya Mfumu,+ mambo waambile’mba: “Kechi nasemapo mwana wa mulume wa kulama jizhina jami amba bakejivulukenga ne.”+ Byonkabyo, watumbile aja jishiki jizhina janji, kabiji jitelwa’mba Jishiki ja kwa Abisalomo kufika ne lelo jino.
19 Ahimaza+ mwana wa kwa Zadoka waambile’mba: “Mwane nswishai ngye na kubuula bamfumu kino kyamweka, mambo Yehoba wibapokolola ku balwanyi babo.”+
20 Bino Yoaba wamwambijile’mba: “Obewa kechi usakutwala ino mbila lelo ne. Ukeitwale juba jikwabo, pakuba lelo kechi usakutwala ino mbila ne, mambo mwana bamfumu wafwa.”+
21 Kepo Yoaba aambijile mwina Kushi amba:+ “Yanga ukabuule ba mfumu kyo wamona.” Ponkapo mwina Kushi wafukamine kwi Yoaba kepo ayile lubilo.
22 Ahimaza mwana wa kwa Zadoka waambijile Yoaba jibiji amba: “Kechi na mambo a kisakumweka ne, mwane nswishai ndondele panyuma ya mwina Kushi.” Nangwa byonkabyo, Yoaba waambile’mba: “Mwanami, mambo ka o wafwainwa kuyila lubilo, byo pabula mbila ya kuba’mba uye na kwamba?”
23 Waambile jikwabo amba: “Kechi na mambo a kisakumweka ne, nswishai ngye lubilo.” Kepo Yoaba amwambijile’mba: “Yanga lubilo!” Ponkapo Ahimaza wanyemene kupita mu jishinda japita mu nkambi ya Yodano, kabiji washilemo mwina Kushi.
24 Kabiji Davida waikele pakachi ka bibelo bibiji bya muzhi,+ ne kasopa+ wakanjijile pa musemi wa ku kibelo kwipi na nsakwa. Byo akenkentele wamwene muntu saka eya lubilo bunke bwanji.
25 Onkao mambo, kasopa wabijikile ne kubuula mfumu. Mfumu waambile’mba: “Inge uji bunke ko kuba’mba uji na mbila ya kwamba.” Byo afikilenga kwipi,
26 kasopa wamwene muntu mukwabo saka eya lubilo. Kepo kasopa abijikile ku ulama kibelo amba: “Umvwa! Kubena kwiya muntu mukwabo lubilo ujitu bunke!” Mfumu waambile’mba: “Uno naye waleta mbila.”
27 Kasopa waambile’mba: “Muntu mutanshi ubena kunyema nobe Ahimaza+ mwana wa kwa Zadoka.” Ponkapo mfumu waambile’mba: “Aye ke muntu wawama, kabiji uleta mbila yawama.”
28 Kepo Ahimaza abijikile kwi mfumu amba: “Bintu byonse bijitu bulongo!” Ponkapo wafukamine kwi mfumu saka akunyika kilungi panshi. Kepo aambile’mba: “Atotwe Yehoba Lesa wenu yenka wimupa bantu bemusatukijile* anweba nkambo mfumu!”+
29 Nangwa byonkabyo, mfumu washikishe’mba: “Nanchi nsongwalume Abisalomo ujitu bulongo nyi?” Ponkapo Ahimaza wakumbwile’mba: “Naji kumvwa kiwowo kikatampe Yoaba byo aji kutuma kalume wa mfumu ne amiwa kalume wenu, bino kechi naji kuyuka kyaji kubiwanga ne.”+
30 Kepo mfumu aambile’mba: “Iya wimane papo.” Ponkapo wayile ne kwimana po bamubuujile.
31 Kepo mwina Kushi afikile,+ kabiji mwina Kushi waambile’mba: “Mwane anweba mfumu, muswe ino mbila: Lelo Yehoba wimupokolola mu maboko a bonse bemusatukijile.”+
32 Bino mfumu washikishe mwina Kushi amba: “Nanchi nsongwalume Abisalomo ujitu bulongo nyi?” Ponkapo mwina Kushi waambile’mba: “Balwanyi benu bonse anweba nkambo mfumu ne bonse bemusatukijile kuba’mba bemube kintu kyatama, bekale nobe uno nsongwalume!”+
33 Kino kintu kyamukatezhe mfumu ku muchima, kabiji wakanjijile kuya mu kibamba kya peulu ya kibelo ne kujila, byo ayilenga wajijilenga amba: “Mwanami Abisalomo, mwanami, mwanami Abisalomo! Nanchi inge yami naji kufwa kukila obewa, Abisalomo mwanami, mwanami!”+
Tubyambo twa munshi
^ Mu Kihebelu, “wabikile muchima pe.”
^ Mu Kihebelu, “pakachi ka jiulu ne ntanda.”
^ Mu Kihebelu, “bapimina mu maboko ami.”
^ Nangwa’mba “Inge naalukijilemo mweo wanji.”
^ Nangwa, “tumiketo; mingele.” Kihebelu, “tukonkolo.”
^ Nangwa’mba “Musanza.”
^ Mu Kihebelu, “bemusuntwijile maboko abo.”
