3 Yoano 1:1-14
1 Amiwa mukulumpe,* mbena kunembela mutemwe wami aye Ngayusa ye natemwa bingi.
2 Obewa mutemwe wami, mbena kulomba namba mu bintu byonse wikale na bubile ne butuntulu bwa mubiji bwawama byonkatu byo ubena* kwikala.
3 Mambo nasekejile bingi kimye balongo kyo baishile ne kushimuna pa mambo a bukine bo uji nabo, byonkatu byo watwajijila kwenda mu bukine.+
4 Kafwako kintu kindetela lusekelo* kyakila kino ne: kya kumvwa’mba baana bami batwajijila kwenda mu bukine.+
5 Obewa mutemwe wami, umwesha bukishinka mu bintu byo ubila balongo, nangwatu kya kuba kechi wibayuka ne.+
6 Bashimuna pa butemwe bobe ku kipwilo. Byo bakabwelanga, ukebakwashe monka mo kyafwainwa kwi Lesa.+
7 Mambo bayile na kusapwila na mambo a jizhina janji, kabiji kechi basendelepo kintu nangwa kimo+ kufuma ku bantu ba mu bisaka bya bantu ne.
8 Onkao mambo, tuji na mwingilo wa kutambwila bulongo bantu ba uno mutundu,+ kuba’mba twingijilenga pamo nabo mu kutundaika bukine.+
9 Nanembejile kipwilo nkalata, pakuba Diotelefesa ukeba kwikala mutanshi mwi abo,+ kechi unemeka ne kuswa bintu byo twamba ne.+
10 O ene mambo umvwe nkeye, nkasolola mingilo yanji yo abena kuba ne bintu byatama byo abena kwamba pe atweba.*+ Kabiji na mambo a kubula kusekela mu bino bintu, ukana kutambwila balongo+ na mushingi; kabiji aba bakeba kwibatambwila, wibakanya ne kwibapanga mu kipwilo.
11 Obewa mutemwe wami, kange ulondelenga bintu byatama ne, pakuba ulondelengako bintu byawama.+ Awa uba byawama ye wa kwa Lesa.+ Awa uba byatama kechi wamuyuka Lesa ne.+
12 Demeteliusa bamushimuna bulongo ku balongo bonse ne bukine. Ne atweba tubena kumushimuna ne obewa wayuka’mba kushimuna kwetu kwa kine.
13 Amiwa nji na bintu byavula bya kukubuula, pano bino kechi nasaka kwibinemba na peni ne na inki ne.
14 Nangwa byonkabyo, naketekela kukumona katataka kabiji tukesamba saka twitala.
Mutende ekale pe obewa.
Balunda nobe bakwimuna. Ñimwinepo balunda nami pa mazhina.
Tubyambo twa munshi
^ Nangwa’mba “Mukulumpe mu kipwilo.”
^ Nangwa’mba “mweo wobe byo aji.”
^ Nangwa, “kindengela kusanta.”
^ Mu Kingiliki, “kwitunena na byambo byatama.”
