Amosi 8:1-14
8 Nkambo Mfumu Yehoba wammwesheshe bino: Kwajinga ntumbe mwajinga bipangwa bya mu kimye kya kisalo.
2 Kepo angipwizhe’mba, “Amosi, wamona ka?” Nakumbwile’mba, “Namona ntumbe muji bipangwa bya mu kimye kya kisalo.” Kepo Yehoba añambijile’mba: “Mpelo ya bantu bami bena Isalela yafika. Kechi nkebalekelako mambo ne.+
3 ‘Nyimbo ya mu nzubo ya Lesa ikaluka ke mabingo mu joja juba,’+ byo byaamba Nkambo Mfumu Yehoba. ‘Kukekala mibiji ya bafwa yavula ikalalazhamatu konse konse,+ kya kuba kukazhindamatu nzoo!’
4 Umvwai kino, anweba munyantaula bayanjiYenka anweba mwapwisha bakimote mu kyalo,+
5 Anweba mwamba’mba, ‘Kijiilo kya pa kutentama kwa ñondo kikapwa kimye ka,+ kuba’mba tupoteshe kajo ketu?Ne juba ja Sabado,+ pa kuba’mba tupoteshe kajo ketu?
Pa kuba’mba tukepeshe kipimo kya efa*Ne kubayisha kinemenezhi kya shekele,*Kuba’mba tukepeshe mashikelu etu a bujimbijimbi;+
6 Pa kuba’mba tupote bakajilwa na silivaNe bayanji na makwabilo abiji,+Ne kupotesha kajo kabula kulumbuluka.’
7 Yehoba, ye Etotelamo Yakoba,+ wachipa mwine amba,‘Kechi nkalubako mingilo yabo yonse ne.+
8 Na mambo a kino, kyalo* kikasunkena,Kabiji bangikazhi bonse bajimo bakajila.+
Nanchi kyalo kyonse kechi kikayula nobe Mukola wa Nile,Ne kuyula ne kuma nobe Mukola wa Nile wa mu Ijipita nenyi?’+
9 Nkambo Mfumu Yehoba waamba’mba, ‘Pa joja juba,Nkalengela juba kuzhika mu kimye kya mute wansanana,Kabiji nkaleta mfishi mu kyalo mu kimye kya mute.+
10 Nkalula bijiilo byenu kwikala mabingo+Ne nyimbo yenu yonse ikekala ke nyimbo ya bulanda.*
Nkemunyinga bisapi bya majila mu mbunda yonse ne kulengela mitwe yonse kwikala na mabala;Nkalengela kino kwikala nobe kijilo kya mwana yenka umotu,Ne mpelo yakyo ikekala nobe juba jatama.’
11 Nkambo Mfumu Yehoba waamba’mba, ‘Umvwai! Moba abena kwiya,Po nkatuma kipowe kya nzala mu kyalo,Kechi kipowe kya nzala ya kajo nangwa kilaka kya mema ne,Bino kya kukeba kumvwa byambo bya Yehoba.+
12 Bakapitañananga kufuma ku kalunga ka mema kufika ku kalunga ka memaKabiji kufuma ku kabeta ka ku buyeke kufika ku musela.*
Bakapitañananga na kukeba byambo bya Yehoba, bino kechi bakebitaana ne.
13 Pa joja juba bisungu byalamba bikapungila,Ne bansongwalume nabo bakapungila na mambo a kilaka;
14 Aba bachipila mu balesa ba mu Samaliya+ kabiji bonka bamba’mba,“Byonkatu lesa wobe byo aji na bumi, obewa Danyi!”+
Kabiji, “Byonkatu jishinda ja ku Belesheba+ byo jaikala kikupu!”
Bakapona, kabiji kechi bakabuukapo jibiji ne.’”+
Tubyambo twa munshi
^ Monai bya Kulumbulula B14.
^ Monai bya Kulumbulula B14.
^ Nangwa’mba “ntanda.”
^ Nangwa’mba “nyimbo ya majila.”
^ Nangwa’mba “kuselela juba.”
