Byambo bya Maana 30:1-33
30 Byambo byanema bya kwa Akula mwana wa kwa Yake byo aambijile Itiela, Itiela ne Ukala.
2 Amiwa ne kilubi kukila bantu bonse,+Kabiji kechi nji na milangwe ikala na muntu ne.
3 Kechi nji na maana ne,Kabiji kechi nji na maana ajipo na Mwine Wazhila ne.
4 Ñanyi wakikanjilapo kala mwiulu ne kwikila?+
Ñanyi wakibungizhapo kala mwela mu maboko anji?
Ñanyi wakikashilapo kala mema mu kivwalo kyanji?+
Ñanyi waikajika* ntanda monse mo yapela?+
Jizhina janji ne ja mwananji bo bañanyi, inge wiayuka?
5 Byambo bya Lesa byonse byalumbuluka.+
Aye ye jikebo ja boba bafyama mwi aye.+
6 Kechi unungeko ku byambo byanji ne,+Kuchina’mba wakakukajipila,Ne obewa ukekala wa bubela.
7 Nemulomba bintu bibiji.
Kange muntanebyo saka nkyangye kufwa ne.
8 Mufumye kwi amiwa bintu byabula bya kine ne bubela.+
Kange mumpe buyanji nangwa bunonshi ne.
Ndekai nje kajo kamfwainwatu,+
9 Kuchina’mba nakekuta ne kwimukana ne kwamba’mba, “Yehoba ye ñanyi?”+
Kabiji kange mundengele kwikala muyanji ne, nakeya kwiba ne kupeezha* jizhina ja Lesa wami.
10 Kange umubepele kalume kwi nkambo yanji ne,Kuchina’mba wakakufinga ne obewa wakekala na mambo.+
11 Kuji bantu bafinga bashaboKabiji kechi bapesha bainabo ne.+
12 Kuji bantu bemona’mba batoka+Bino kechi bebatokesha ku bya bunya* byabo ne.
13 Kuji bantu baji na meso a kwilundumikaKabiji batala na meso a kwitota!+
14 Kuji bantu baji na meno aji nobe mapokoNe mibanga iji nobe mipenyi;Bonauna bakajilwa ba pano pa ntandaNe bayanji bebafumyamo mu bantu.+
15 Misundu iji na baana ba bakazhi babiji, bajila amba, “Tupepoi! Tupepoi!”
Kuji bintu bisatu bibula kutondwa,Bintu bina bibula kwamba’mba, “Kyapwa!”
16 —Kilende*+ ne jivumo ja ñumba,Ne mushiji wauma,Ne mujilo kechi wamba’mba, “Kyapwa ne!”
17 Jiso ja muntu wendeleka bashanji ne kubula kukookela bainanji,+Bakejilobolamo ku bikwangala bikala mu kimpachiko,Ne kwijija ku baana ba bampungu.+
18 Kuji bintu bisatu byampezha maana,*Ne bintu bina byo nakankalwa kuyuka:
19 Bilelemba mpungu mwiulu,Byenda muloolo pa jibwe,Byenda bwato pa kalunga ka mema,Ne mwanamulume byo oba inge uji na mwanamukazhi.
20 Abino byo byuba mwanamukazhi nkende:
Uja ne kushimuna pa kanwa;Ne kwamba’mba, “Kafwako kyatama kyo nauba.”+
21 Kuji bintu bisatu bilengela ntanda kusunkenaNe bintu bina biilengela kubula kukosa:
22 Inge muzha waikala ke mfumu,+Ne wakosama inge waikala na kajo kavula,
23 Kabiji inge mwanamukazhi ye bashikwa* wasongolwa,Ne wa mwingilo wa mukazhi inge wapingakena pa kifulo kya nkambo yanji wa mukazhi.+
24 Kuji bintu bina biji pa bintu byakepesha biji pano pa ntanda,Bino biji na maana a kisemwa:*+
25 Tuzhengekene kechi tubilengwa twakosa ne,Bino tunengezhezha jimo kajo kato mu kimye kya kisalo.+
26 Bibila*+ kechi bilengwa byakosa ne,*Bino bishimika mazubo abyo mu mabwe akatampe.+
27 Nzhiye+ kechi iji na mfumu ne,Bino yonse yendela pamo nobe nzhita.*+
28 Mayengela+ ulamata na maulu anji,Kabiji utwela mu jilapa ja mfumu.
29 Kuji bintu bisatu bilengela kukumya pa kwibimona inge bibena kwenda,Bintu bina byenda kipale:
30 Bokwe, yenka uji na ngovu kukila banyama bonse,Ubula kuchina kintu nangwa kimo;+
31 Kabwa; mbuzhi mulume;Ne mfumu uji na nzhita yanji.
32 Inge witumbijika na mambo a kukosama+Nangwa walanguluka kuba bino,Bika kuboko pa kanwa kobe.+
33 Mambo byonkatu kukumbaula mukaka byo kulenga bbataNe kufina moona byo kulengela mashi kufuma,Ne kukolomona bukaji byo byo kuleta lutobo.+
Tubyambo twa munshi
^ Mu Kihebelu, “waimanya.”
^ Nangwa’mba “kulengulwisha.”
^ Mu Kihebelu, “tuvwi.”
^ Nangwa’mba “byangwamina bingi.”
^ Nangwa’mba “ye babula kutemwa.”
^ Nangwa’mba “biji bingi na maana.”
^ Mu Kihebelu, “ ke bantu babula kukosa.”
^ Nangwa’mba “Kanyama kapasha nsenzhi.”
^ Nangwa’mba “yabana mu mabumba.”
