Ezikyo 31:1-18
-
Kupona kwa Ijipita, kichi kya Sida kyalepa (1-18)
31 Mu mwaka wa bu 11, mu ñondo wa busatu, pa juba jitanshi ja ñondo, Yehoba wañambijile jikwabo amba:
2 “Obewa mwana muntu, ambila Felo mfumu wa Ijipita ne mabumba anji amba,+‘Ñanyi waesakana na buneme bobe?
3 Asilya wajinga nobe kichi kya sida kya ku Lebanoni,Kyajinga na misampi yawama bingi nobe jivunda ne kulepa;
Kyalepele kufika mu makumbi.
4 Mema ekilengejile kukoma, kabiji mema atupauka panshi ekilengejile kulepa.
Bekijimbile ku tukola;Kabiji mema a mu tunkololongwa atekezhenga bichi byonse bya mungye.
5 O ene mambo o kyalepejile kukila bichi byonse bya mungye.
Misampi yakyo yavujile bingi ne kulepaNa mambo a kuvula kwa mema a mu tukola mo kiji.
6 Bañonyi bonse balengejilenga binsa byabo ku misampi yakyo,Ne banyama bonse ba mungye basemejilenga munshi ya misampi yakyo,Kabiji bantu ba mu bisaka byonse baikelenga mu kimfutele kyakyo.
7 Kyamwekelenga bingi bulongo kabiji kyajinga na misampi yalepa,Mambo kyatwezhezhe mizhazhi yakyo panshi pene pajinga mema avula.
8 Mu bujimi bwa Lesa,+ kechi mwajingapo kichi kya sida kikwabo kyaesakene nakyo ne.Nangwatu misampi ya bichi bya yunipa kechi yaesakene na misampi yakyo ne,
Kabiji misampi ya bichi bya pulenyi nayo kechi yaesakene na misampi yakyo ne.
Kafwako kichi kikwabo mu bujimi bwa Lesa kyamwekelenga bulongo kwikikila ne.
9 Nekilengejile kumweka bulongo, kwikala na mabuula avula,Kabiji bichi bikwabo byonse bya mu bujimi bwa Edena, bujimi bwa Lesa wa kine, bikyubijilenga kichima.’
10 “Onkao mambo, Nkambo Mfumu Yehoba waamba’mba: ‘Na mambo a kuba akyo kyalepele bingi kufika ne mu makumbi ne kwitota na mambo a kulepa kwakyo,
11 nkekipana kwi ntangi wa bulume wa mu bisaka bya bantu.+ Kabiji ukekikambula, ne amiwa nkekikana na mambo a bubi bwakyo.
12 Kabiji bantu bafuma mu kyalo kingi bakilamo kushinta ba mu bisaka bya bantu bakekitema ne kukekisha peulu ya mitumba, ne mabuula akyo akaponena mu bimpachiko byonse, misampi yakyo ikachimauka kabiji ikatumpaukanga peulu ya tukola.+ Bantu ba mu mitundu yonse pano pa ntanda bakanyemamo mu kimfutele kyakyo ne kwikisha.
13 Bañonyi bonse bakekalanga pa mwandalo wakyo ne banyama bonse ba mungye bakekalanga mu misampi yakyo.+
14 Kikekala bino pa kuba’mba kukabule kwikala kichi nangwa kimo kiji ku mema kyafwainwa kukoma ne kulepa kufika mu makumbi. Kabiji kafwako kichi kikwabo kiji ku mema avula kikesakana nakyo kulepa ne. Mambo bonse bakebepaya ne kwibatwala ku mushiji pamo na baana ba bantu bo batwala mu kimbo.’*
15 “Nkambo Mfumu Yehoba waamba’mba: ‘Juba jo kikaya ku Kilende,* nkalengela bantu kujila. Onkao mambo, nkashinka mema afuma panshi pene ne kukijika mema a mu tukola pa kuba’mba akabulenga kupita. Na mambo a kino, nkalengela Lebanoni kwikala na bulanda kabiji bichi bya mungye bikooma.
16 Inge kichi kyatebukila panshi, nkalengela bisaka bya bantu kumvwa moyo byo nkekitwala ku Kilende* pamo na boba bonse bo babena kutwala mu kimbo.* Kabiji bichi byonse bya mu Edena,+ bichi byonse byawamisha bya mu Lebanoni ne bichi byonse byatambwilanga mema, bikasekela.
17 Bebitwajile pamo ne aye ku Kilende* kuji boba bo baipayile ku mpoko+ ne bonse bamukwashanga baikalanga mu kimfutele kyanji pamo na bisaka bya bantu.’+
18 “Nkambo Mfumu Yehoba waamba’mba: ‘Ñanyi bichi bya mu Edena byaesakene pamo ne obewa mu lukumo ne buneme?+ Kine bakakuponesha panshi ne kukutwala ku mushiji pamo na bichi bya ku Edena. Ukalaala pamo na bantu babula kuya ku mukanda ne na boba bo batapa na mpoko. Abino byo bikamwekela Felo ne mabumba anji onse.’”
