Ezikyo 34:1-31
34 Yehoba wañambijile jikwabo amba:
2 “Obewa mwana muntu, aula pa bintu bikamwekela bakafunga ba bena Isalela. Aula ne kubuula bakafunga amba, ‘Nkambo Mfumu Yehoba waamba’mba: “Malwa abo bakafunga ba bena Isalela+ bejiishatu abo bene! Nanchi bakafunga kechi bafwainwa kujiisha jitanga nenyi?+
3 Anweba muja mafuta a banyama, muvwala bivwalo byo balenga na boya bwa mikooko kabiji mwipaya banyama banuna,+ bino kechi mujiisha jitanga ne.+
4 Anweba kechi mukosesha mikooko yakooka, kubuka yakolwa, kupomba bisapi pa bilonda bya yoya ikozha nangwa kubwezha yoya yalubilamo nangwa kukeba yoya yaeleka ne;+ pakuba anweba kechi mwiilama bulongo ne, mwiyubila bukaji.+
5 Onkao mambo, yapalañenejilemo mambo kechi yajinga na kafunga ne.+ O ene mambo o yaikajile ke kajo ku banyama bakaji bonse ba mungye.
6 Mikooko yami yapitañenengatu pa mitumba ne pa tutumbatumba tonse; mikooko yami yapalañenejile pano pa ntanda ponse kabiji kafwako nangwa umo wiitele muchima nangwa kwiikeba ne.
7 “‘“Onkao mambo, anweba bakafunga umvwai byaamba Yehoba:
8 “Nkambo Mfumu Yehoba waamba’mba, ‘Byonkatu byo nji na bumi, mikooko yami byo babena kwiikwata ne kwiija ku banyama bakaji ba mungye na mambo a kubula kafunga, ne bakafunga bami byo babujile kwiikeba, abo saka bejiishatu bene kwa kubula kujiisha mikooko yami,”’
9 onkao mambo, anweba bakafunga umvwai byaamba Yehoba.
10 Nkambo Mfumu Yehoba waamba’mba: ‘Amiwa nazhingijila bakafunga kabiji nkebazhachisha na mambo a mikooko yami,* kabiji kechi nkebaswisha kujiisha mikooko yami ne,+ kabiji bakafunga kechi bakeijiishapo* jibiji ne. Amiwa nkapokolola mikooko yami mu tunwa twabo kuba’mba ikabule kwikala kajo kabo jibiji.’”
11 “‘Mambo Nkambo Mfumu Yehoba waamba’mba: “Umvwai, amiwa mwine nkeikeba mikooko yami ne kwiilama bulongo.+
12 Nkeita muchima byonkatu byuba kafunga ujiisha mikooko yanji yapalañenejilemo inge wiitaana.+ Mu juba ja makumbi ne mfishi, nkeibwezha kufuma mu mapunzha onse mo yapalañenejile.+
13 Nkeifumya mu mitundu ya bantu ne kwiikonkanya pamo kufuma mu byalo ne kwiileta mu kyalo kyayo, kabiji nkeijiishisha pa mitumba ya Isalela,+ ku mikola ne mu mapunzha monse mwikala bantu.
14 Nkeijiishisha konka kuji nsono ya munyemvu kabiji ikajiilanga pa mitumba yalepa ya bena Isalela.+ Ikalaalanga ku mpunzha konka kuji nsono yawama+ kabiji ikajanga munyemvu uji pa mitumba ya Isalela.”
15 “‘Nkambo Mfumu Yehoba waamba’mba, “Amiwa mwine nkeijiishanga+ ne kwiilengela kulaala panshi.”+
16 “Nkakeba yaeleka, nkabwezha yalubilamo,+ ikozha nkeipomba bisapi pa bilonda ne yoya yakooka nkeikosesha, pakuba aya yanuna ne yoya yakosa nkeyonauna. Nkeichibila mambo ne kwiikambula.”
17 “Nkambo Mfumu Yehoba waamba’mba, ‘Umvwai anweba mikooko yami: “Katatakatu nchibile mambo mikooko, mikooko ilume ne bambuzhi balume.+
18 Nanchi kechi mwafwainwa kwikileka kuja nsono ya munyemvu nenyi? Nanchi mwafwainwa kufumpakanya ne nsono yashalapo na maulu enu nyi? Inge mwapwisha kutoma mema akenguluka, nanchi mwafwainwa kwiavundankanya na maulu enu nyi?
19 Nanchi mikooko yami yafwainwa kuja nsono yo mwafumpakanya na maulu enu ne kutoma mema o mwavundankanya na maulu enu nyi?”
20 “‘Onkao mambo, Nkambo Mfumu Yehoba wiyambila’mba: “Umvwai, amiwa nkachibila mambo mikooko yanuna ne yanyana,
21 mambo anweba mwashinjikilenga mikooko yonse yakolwa na mbavu, na bipuzhi ne na masengo enu kufikatu ne byo mwiipalañenyejile ku mapunzha akwabo.
22 Nkapulusha mikooko yami ne ayo kechi bakeiyanjishapo jibiji ne;+ kabiji mikooko nkeichibila mambo.
23 Nkaleta kafunga umo wa kwiilama,+ kalume wami Davida,*+ ne aye ukeijiisha. Kabiji ukeijiishanga ne kwikala kafunga wayo.+
24 Kabiji amiwa Yehoba nkekala Lesa wayo,+ ne kalume wami Davida ukekala mfumu wabo.+ Amiwa Yehoba yami naamba.
25 “‘“Nkalayañana nayo lulayañano lwa mutende+ kabiji nkonauna banyama bakaji baji mu kyalo,+ pa kuba’mba mikooko ikekalenga mutende mu kiselebwa ne kulaala mu jisaka.+
26 Nkapesha mikooko ne mpunzha yazhokoloka tutumbatumba twami,+ kabiji nkanokesha mvula pa kimye kyafwainwa. Mapesho aketulukanga nobe mvula.+
27 Bichi bya mungye bikapanga bipangwa, ne mushiji ukamenesha kajo+ kabiji mikooko ikekalanga mutende mu kyalo. Kabiji po po ikayuka’mba amiwa yami Yehoba byo nkachimauna bikonkoji byayo+ ne kwiipokolola ku boba beiyanjishenga.
28 Kechi bakeiyanjishapo jibiji ku bisaka bya bantu ne. Kabiji banyama bakaji ba mungye kechi bakeija ne, ayo ikekalanga mu mutende, kafwako nangwa umo ukeilengesha moyo ne.+
29 “‘“Amiwa nkeimwena bujimi bwawama bwaya nkuwa* kabiji kechi ikafwapo jibiji na nzala mu kyalo ne,+ kabiji kechi bakeilengululapo jibiji ku bisaka bya bantu ne.+
30 “Nkambo Mfumu Yehoba waamba’mba, ‘Ayo ikayuka’mba amiwa Yehoba Lesa wayo nji nayo,+ ne kisaka kya Isalela bo bantu bami.’”
31 “Nkambo Mfumu Yehoba waamba’mba, ‘Anweba yenu mikooko yami+ yo nata muchima, anweba mwi bantu, kabiji amiwa yami Lesa wenu.’”
Tubyambo twa munshi
^ Nangwa’mba “Nkakeba mikooko yami kufuma ku maboko abo.”
^ Nangwa’mba “bakeilama.”
^ Ko kuba’mba, wa mu kisemi kya kwa Davida.
^ Mu Kihebelu, “bwa jizhina.”
