Ezikyo 48:1-35
48 “Ano o mazhina a mikoka, kutatwila ku mapunzha aikela ku kabeta ka ku buyeke: Mpunzha ya bena Danyi+ yatendekejile ku Hetelona kuya ku Lebo-hamata*+ kukafika ne ku Hazala-enona, ne kukapita ku mupaka wa ku Damasakasa ku kabeta ka ku buyeke kwipi na Hatama;+ kabiji wafumine ku musela kukafika ne ku mupaka wa ku muzhika.
2 Mpunzha ya bena Ashela+ yaikejile ku mupaka wa bena Danyi kufuma ku mupaka wa ku musela kukafika ne ku mupaka wa ku muzhika.
3 Mpunzha ya bena Nafitali+ yaikejile ku mupaka wa bena Ashela kufuma ku mupaka wa ku musela kukafika ne ku mupaka wa ku muzhika.
4 Mpunzha ya bena Manase+ yaikejile ku mupaka wa bena Nafitali kufuma ku mupaka wa ku musela kukafika ne ku mupaka wa ku muzhika.
5 Mpunzha ya bena Efelaimu yaikejile ku mupaka wa bena Manase+ kufuma ku mupaka wa ku musela kukafika ne ku mupaka wa ku muzhika.
6 Mpunzha ya bena Lubenyi yaikejile ku mupaka wa bena Efelaimu+ kufuma ku mupaka wa ku musela kukafika ne ku mupaka wa ku muzhika.
7 Mpunzha ya bena Yuda yaikejile ku mupaka wa bena Lubenyi+ kufuma ku mupaka wa ku musela kukafika ne ku mupaka wa ku muzhika.
8 Ku mupaka wa bena Yuda, kufuma ku mupaka wa ku musela kukafika ne ku mupaka wa ku muzhika, mpunzha yo mukapana kwi Lesa yafwainwa kwikala mu bwipi makyubichi* 25,000.+ Kabiji mu bula yafwainwa kwesakana na mapunzha o bakapa mikoka ikwabo, kufuma ku mupaka wa ku musela kukafika ne ku mupaka wa ku muzhika. Nzubo yazhila ikekela pakachi kayo.
9 “Mpunzha yo mukapana kwi Yehoba ikekale mu bula makyubichi 25,000, ne makyubichi 10,000 mu bwipi.
10 Ino mpunzha ikekala mpunzha yazhila yo bakapa bañanga.+ Ku kabeta ka ku buyeke ikekala makyubichi 25,000, ku muzhika makyubichi 10,000, ku musela makyubichi 10,000 ne ku kabeta ka ku bulenge makyubichi 25,000. Nzubo ya Yehoba ikekela pakachi kayo.
11 Ikekala mpunzha ya bañanga bazhila bafumine mu kisemi kya kwa Zadoki,+ bonka baingijilenga mingilo yami, kabiji babujile kusatuka kimye bena Isalela ne bena Levi kyo basatukile.+
12 Ku mpunzha yo bakapana kwi Lesa, bakebachibilako mpunzha ikekala yazhijisha, ikekela ku mupaka wa bena Levi.
13 “Ku mpunzha yalamankana na mpunzha ya bañanga, bena Levi bakebapa mpunzha iji na makyubichi 25,000 mu bula ne makyubichi 10,000 mu bwipi. (Ino mpunzha yonse ikekala makyubichi 25,000 mu bula ne makyubichi 10,000 mu bwipi.)
14 Ino mpunzha yawama kechi bafwainwa kwiipotesha nangwa kwiipimpula na kintu nangwa kuchibilako muntu ne, mambo ino ke mpunzha yazhila kwi Yehoba.
15 “Mpunzha yashalako iji makyubichi 5,000 mu bwipi ne makyubichi 25,000 mu bula, ikekala ya muzhi+ pa kushimikila mazubo ne kwa kujiila banyama. Uno muzhi ukekala pakachi kayo.+
16 Abino byo byo bakapima muzhi: Mupaka wa ku kabeta ka ku buyeke ukekala makyubichi 4,500, mupaka wa ku kabeta ka ku bulenge ukekala makyubichi 4,500, mupaka wa ku musela ukekala makyubichi 4,500, ne mupaka wa ku muzhika ukekala makyubichi 4,500.
17 Mpunzha ya muzhi ya kujiishishamo banyama ikekala makyubichi 250 ku kabeta ka ku buyeke, makyubichi 250 ku kabeta ka ku bulenge, makyubichi 250 ku musela ne makyubichi 250 ku muzhika.
18 “Bula bwa mpunzha ikashalako bukesakana na mpunzha yazhila yo bakapana kwi Lesa.+ Ikekala makyubichi 10,000 ku musela, ne makyubichi 10,000 ku muzhika. Ikesakana na mpunzha yazhila yo bakapana kwi Lesa, kabiji mu ino mpunzha mukamenanga kajo ka kujiisha boba bakengijilanga mu muzhi.
19 Bantu bakafuma mu mikoka ya bena Isalela bakengijilanga mu muzhi, bo bakajimangamo.+
20 “Mpunzha yonse yo bakapana kwi Lesa ikekala makyubichi 25,000 monse muna. Mwafwainwa kwiipaatula kwikala mpunzha yazhila ya kupana kwi Lesa pamo na mpunzha ya muzhi.
21 “Mpunzha ikashalako bushiya ne bushiya bwa mpunzha yazhila yo bakapana kwi Lesa ne ya muzhi ikekala ya kinemanga.+ Ikekela ku mipaka iji na makyubichi 25,000 iji ku musela ne ku muzhika wa mpunzha yazhila yo bakapana kwi Lesa. Ino mpunzha ikesakana na mapunzha akwabo o ikalamankana nao, kabiji ano mapunzha nao akekala a kinemanga. Mpunzha yazhila yo bakapana kwi Lesa ne nzubo yazhila, ikekela pakachi kayo.
22 “Mpunzha ya bena Levi ne ya muzhi ikekela pakachi ka mpunzha ya kinemanga. Kabiji mpunzha ya kinemanga ikekela pakachi ka mupaka wa bena Yuda+ ne wa bena Benjamina.
23 “Bino byo bikekala mikoka ikwabo yashala. Mpunzha ya bena Benjamina ikafuma ku mupaka wa ku musela kukafika ne ku mupaka wa ku muzhika.+
24 Mpunzha ya bena Shimeona ikekajila ku mupaka wa bena Benjamina+ kufuma ku mupaka wa ku musela kukafika ne ku mupaka wa ku muzhika.
25 Mpunzha ya bena Isakala+ yaikejile ku mupaka wa bena Shimeona kufuma ku mupaka wa ku musela kukafika ne ku mupaka wa ku muzhika.
26 Mpunzha ya bena Zebuluna yaikejile ku mupaka wa bena Isakala+ kufuma ku mupaka wa ku musela kukafika ne ku mupaka wa ku muzhika.+
27 Mpunzha ya bena Gadi yaikejile ku mupaka wa bena Zebuluna+ kufuma ku mupaka wa ku musela kukafika ne ku mupaka wa ku muzhika.
28 Mupaka wa ku kabeta ka ku bulenge waikela ku mupaka wa kwa Gadi ukafuma ku Tamala+ kukafika ne ku mema a ku Meliba-kadeshi,+ kepo akapita ne ku Kakola*+ kukafika ne ku Kalunga ka Mema Kakatampe.*
29 Nkambo Mfumu Yehoba waamba’mba: “Ino yo mpunzha yo ukabanya ku mikoka ya bena Isalela+ kwikala ya buswanyi bwabo, kabiji ano akekala ke mapunzha ayo.”+
30 “Abino byo bikekala bibelo bya muzhi bya kulupukilako: Ku kabeta ka ku buyeke, kikekala makyubichi 4,500.+
31 Bibelo bya muzhi bakebitumba mazhina monka mwayila mikoka ya bena Isalela. Pa bibelo bisatu biji ku kabeta ka ku buyeke, paji kibelo kimo kya kwa Lubenyi, kikwabo kya kwa Yuda ne kya kwa Levi.
32 Ku musela, uno muzhi ukekala makyubichi 4,500 mu bula kabiji ukekala na bibelo bisatu; kimo kya kwa Yosefwa, kikwabo kya kwa Benjamina ne kya kwa Danyi.
33 Ku kabeta ka ku bulenge, uno muzhi ukekala mu bula makyubichi 4,500 ne na bibelo bisatu: kimo kya kwa Shimeona, kikwabo kya kwa Isakala ne kya kwa Zebuluna.
34 Ku muzhika uno muzhi, ukekala mu bula makyubichi 4,500 ne na bibelo bisatu: kimo kya kwa Gadi, kikwabo kya kwa Ashela ne kya kwa Nafitali.
35 “Muzhi yense ukekala makyubichi 18,000. Kabiji kufuma pa jonka jino juba uno muzhi bakamutelanga’mba, Yehoba uji monka.”+
Tubyambo twa munshi
^ Nangwa’mba “kibelo kya ku Hamata.”
^ Kino kibena kwamba pa makyubichi alepa. Monai bya Kulumbulula B14.
^ Ko kuba’mba, Meditelanya.
^ Ko kuba’mba, Kakola ka Ijipita.
