Isaya 35:1-10
35 Bisanzangala ne ntanda yauma bikasangalala,+Ne kiselebwa kikasekela ne kwikala na maluba avula.*+
2 Kine mukekala maluba avula;+Bikasangalala ne kwimba na mambo a lusekelo.
Bakebipa lukumo lwa Lebanoni,+Buya bwa Kamela+ ne Shalona.+
Bikamona lukumo lwa Yehoba, ko kuba’mba buwame bwa Lesa wetu.
3 Koseshai maboko akooka,Ne kukosesha manungo abena kuzukuma.+
4 Ambilai boba bakakilwa amba:
“Kosai, kuchina ne.
Umvwai! Lesa wenu ukeya kushinkanya na balwanyi benu,Lesa ukeya na kwimushinkenyako.+
Aye ukeya na kwimupulusha.”+
5 Pa kyokya kimye, meso a bampofu akalaba,+Ne matwi a bashinka matwi akashinkuka.+
6 Pa kyokya kimye, bantu balemana bakakilauka nobe balupaala,+Ne bakamaama bakabijika na lusekelo.+
Mema akatupaukanga mu bisanzangala,Kabiji mu kiselebwa mukekala tukola twa mema.
7 Pa mushiji wauma na kyuya, pakekala kizhiba kya mema,Ne pa mushiji waumisha pakatupaukanga mema.+
Kabiji mu mapunzha mwikala balubwala,+Mukamena nsono ya munyemvu, matete ne mambanga.
8 Kabiji mu kiselebwa mukekala mukwakwa,+Utelwa’mba Mukwakwa Wazhila.
Awa yense uba byatama kechi ukendamo ne.+
Bantu boba byawama bo bakendangamotu;Muntu wakosama kechi ukapitamo ne.
9 Kechi mukekala mabokwe ne,Kabiji kechi mukatanwapo banyama bakaji ne.
Kechi bakekalamo ne;+Bantu bo bakuula bo bakendangamotu.+
10 Kabiji bantu Yehoba bo akapokolola bakabwela+ ku Ziona saka basangalala.+
Bakasangalalanga myaka ne myaka.+
Bakasangalalanga ne kusekela,Bulanda ne kubinza byonse bikapwa.+
Tubyambo twa munshi
^ Mu Kihebelu, “wibabenyeyo na lutambo wa kupiminako.”