Kubala 17:1-13
-
Kamama ka kwa Alona kasapuka, kaikala ke kiyukilo (1-13)
17 Kabiji Yehoba waambijile Mosesa amba:
2 “Buula bena Isalela, utambule tumama kwi abo, kamo pa kikota, kamo pa kikota ku bonse bakulumpe babo monka mwayila bikota byabo,+ tonse pamo tumama 12. Pa kamama ka muntu yense unembepo jizhina janji.
3 Pa kamama ka kwa Levi unembepo jizhina ja kwa Alona, mambo kujitu kamama kamo ka mukulumpe wa pa kikota kimo kimo.
4 Ubike tumama mu tente wa lusambakeno kulutwe ya Jikwachi ja Lushimuno,+ konka ko nsambakena nenu kimye kyonse.+
5 Kabiji kamama ka muntu ye nsakusala+ kakasapuka kabiji nkalekesha bena Isalela kunnyinyita,+ byonka byo babena kwimunyinyita ne anweba.”+
6 Byonkabyo, Mosesa wabuujile bena Isalela kabiji bakulumpe babo bonse bamupele tumama, kamama kamo pa mukulumpe monka mwayijile bikota byabo, tumama tonse pamo twajinga 12, ne kamama ka kwa Alona kajinga pa tumama twabo.
7 Kepo Mosesa etubikile kwi Yehoba mu tente mwajinga Jikwachi ja Lushimuno.
8 Pa juba jalondejilepo, Mosesa wayile mu tente mwajinga Jikwachi ja Lushimuno, kabiji wataaine kamama ka kwa Alona ka mu kikota kya kwa Levi saka kauba kala mituntu kabiji kalajile buluba ne kupanga bipangwa byapya bya amonde.
9 Ponkapo Mosesa walupwile tumama tonse twajinga kwi Yehoba ne kwituleta ku bena Isalela bonse. Ne abo betutajile, kabiji bonse pa muntu pa muntu batambwile tumama twabo.
10 Kepo Yehoba aambijile Mosesa amba: “Bwezha kamama ka kwa Alona+ wikabike kulutwe ya Jikwachi ja Lushimuno kekale kayukilo+ ka kwibashinawina bonse basatuka+ kuba’mba bekileke kunnyinyita ne kuba’mba bakabule kufwa.”
11 Ponkapo Mosesa waubile monka mwamukambizhizhe Yehoba. Waubiletu byonkabyo.
12 Kepo bena Isalela bamwambijile Mosesa amba: “Pano tusakufwa, tusakuvila kabiji tukonaikatu bonse!
13 Muntu yense ukafwenya kwipi na tente wa lusambakeno wa Yehoba, ukafwa!+ Nanchi twafwainwa kufwangatu byonkabye nyi?”+
