Kubala 22:1-41
22 Ponkapo bena Isalela baimene lwendo ne kukatebelela mu kiselebwa kya Moabu ku bushiya bwa Yodano ku Yeliko.+
2 Kabiji Belaka+ mwana wa kwa Zipole wamwene bintu byonse byaubile bena Isalela ku bena Amoli.
3 Kabiji bena Moabu bachiine bano bantu mambo bavujile bingi. Bena Moabu baakaminwe bingi na mambo a bena Isalela.+
4 Onkao mambo, bena Moabu baambijile bakulumpe ba bena Mijanyi+ amba: “Kino kipwilo kisakuja bintu byonse bituzhokoloka, byonkatu ñombe mulume byo aja nsono mungye.”
Belaka mwana wa kwa Zipole ye wajinga mfumu wa bena Moabu pa kyokya kimye.
5 Kabiji watumine baluwe kwi Balamu mwana Beola ku Petola+ ku kyalo kyanji kyajinga kwipi na Mukola.* Wamwichile ne kumubuula’mba: “Talai! Bantu baiya kufuma ku Ijipita. Bakumbana ntanda*+ yonse kabiji babena kwikalatu kwipi ne amiwa.
6 Pano nemusashijila namba, iyai mumfingileko bano bantu+ mambo bankila bulume. Apo kampe nkebashinda ne kwibapangamo mu kyalo, mambo nayukishatu namba muntu yense ye mupesha wikala na mapesho, ne muntu yense ye mufinga wikala wafingwa.”
7 Byonkabyo, bakulumpe ba bena Moabu ne bakulumpe ba bena Mijanyi baimene lwendo, kabiji basendele mali a kupongesha a kupa Balamu+ kabiji bamubuujile byambo byaambile Belaka.
8 Ponkapo wibambijile’mba: “Laalai kuno, amiwa nkemubuula byonse bisakuñambila Yehoba.” Onkao mambo, bakulumpe ba bena Moabu baikele ne Balamu.
9 Kepo Lesa aishile kwi Balamu ne kumushikisha amba:+ “Nanchi bano bantu bo uji nabo bo bañanyi?”
10 Balamu wamukumbwile Lesa wa kine amba: “Belaka mwana wa kwa Zipole mfumu wa bena Moabu wantumina byambo bya kuba’mba,
11 ‘Bantu bafuma mu Ijipita bakumbana ntanda* yonse. Pano iyai mumfingileko bano bantu.+ Apo kampe nakonsha kulwa nabo ne kwibapangamo.’”
12 Pakuba Lesa waambijile Balamu amba: “Kange uye nabo ne. Kabiji kange wibafinge bano bantu ne, mambo baubilwa bibusa.”+
13 Balamu wabuukile lukelo ne kwambila bakulumpe ba kwa Belaka amba: “Yainga ku kyalo kyenu, mambo Yehoba wankanya kuya nenu.”
14 Byonkabyo, bakulumpe ba bena Moabu babwelele kwi Belaka ne kumubuula’mba: “Balamu wakana kwiya ne atweba.”
15 Nangwa byonkabyo, Belaka watumine jikwabo bakulumpe bavula kabiji bashiñama kukila jibumba jitanshi jo atumine.
16 Ne abo bafikile kwi Balamu ne kumubuula’mba: “Abino byo byaamba Belaka mwana wa kwa Zipole amba, ‘Napopwela kange muleke kintu nangwa kimo kimukanye kwiya kwi amiwa ne,
17 mambo amiwa nkemunemeka bingi ne kwimubila kintu kyonse kyo mukakeba amba nemubile. Mwane nemusashijila namba iyai, mumfingileko bano bantu.’”
18 Pakuba Balamu waambijile bakalume ba kwa Belaka amba: “Nangwa kya kuba Belaka akampe nzubo yanji yayula siliva ne ngolode, kechi nkoba kintu kicheche nangwa kikatampe kukila pa byakambizha Yehoba Lesa wami ne.+
19 Mwane ne anweba laalai, pa kuba’mba ngyuke kintu kisakumbuula Yehoba.”+
20 Kepo Lesa aishile kwi Balamu bufuku ne kumubuula’mba: “Inge bano bantu baiya na kukwita, uye nabo. Bino ukebabuuletu byambo byonka byo nkakwambila.”+
21 Onkao mambo, Balamu waimene lukelo ne kukasa kya kwikalapo pa mbongolo* wanji kabiji wayijile pamo na bakulumpe ba bena Moabu.+
22 Bino Lesa wazhingijile bingi na mambo a kuba Balamu wayile, kabiji malaika wa Yehoba waimene mu jishinda kuba’mba amukanye kuya. Balamu waendelenga pa mbongolo wanji saka aji na bakalume banji babiji.
23 Bino mbongolo byo amwene malaika wa Yehoba saka aimana mu jishinda watanyika ne mpoko yanji, mbongolo wakebele kusendukamo ne kuya mu bujimi. Ponkapo Balamu watendekele kupuma mbongolo amba amubwezhe mu jishinda.
24 Kepo malaika wa Yehoba akemene pakepela jishinda na pakachi ka majimi abiji a miñanzañanza pajinga nsakwa ya mabwe aku ne kuku.
25 Mbongolo byo amwene malaika wa Yehoba, washakamijile ku nsakwa ne kushenkakenyako kulu kwa kwa Balamu, kabiji Balamu watendekele jibiji kupuma mbongolo.
26 Malaika wa Yehoba wapichijile kulutwe jikwabo ne kukemana pakepela jishinda pakatezhe kusendukila ku kipiko nangwa ku kilujo.
27 Mbongolo byo amwene malaika wa Yehoba, wafukamine panshi. Onkao mambo, Balamu wazhingijile bingi ne kutwajijila kupuma mbongolo na kamama kanji.
28 Ponkapo Yehoba walengejile mbongolo kwamba*+ ne kushikisha Balamu amba: “Nanchi ñanyi kintu kyo nemuba, kyalengela kuba’mba mumpume bimye bisatu?”+
29 Balamu wakumbwile mbongolo amba: “Nakupuma na mambo a kuba wankosamika. Umvwe najinga na mpoko inge nakwipaya!”
30 Kepo mbongolo ashikishe Balamu amba: “Nanchi kechi yami mbongolo wenu ye mwendapo moba onse a bumi bwenu kufikatu ne lelo nenyi? Abya nakimubapo kintu kya uno mutundu nyi? Aye wakumbwile’mba: “Ine!”
31 Ponkapo Yehoba walabishe meso a kwa Balamu,+ ne aye wamwene malaika wa Yehoba saka aimana mu jishinda na mpoko mu kuboko kwanji. Ponkapo wafukamine ne kumulambila.
32 Kabiji malaika wa Yehoba wamwipwizhe’mba: “Mambo ka o waji kupumina mbongolo wobe jisatu? Amiwa naji kwiya na kukukanya, mambo lwendo lobe lwapusenamo na kyaswa muchima wami.+
33 Mbongolo waji kummona ne kukeba kusenduka bimye bisatu kufuma mu jishinda mo najinga.+ Umvwe mbongolo kechi waji kusendukamo ne, inge naji kukwipaya ne kupulushako mbongolo.”
34 Balamu waambijile malaika wa Yehoba amba: “Nalenga mambo, mambo kechi naji kuyuka namba yenu mwaji kwimana mu jishinda amba munsambakane ne. Inge kino kintu kyatama kwi anweba, nsakubwelamo.”
35 Bino malaika wa Yehoba waambijile Balamu amba: “Yanga na bano bantu, kabiji wafwainwa kwambatu byambo byonka byo nkakubuula.” Onkao mambo, Balamu watwajijile kuya pamo na bakulumpe ba kwa Belaka.
36 Belaka byo aumvwine’mba Balamu waiya, ponkapo wayile na kumutundaila mu muzhi wa Moabu uji ku musezho wa Alanonyi ku mupaka wa kyalo.
37 Belaka washikishe Balamu amba: “Nanchi kechi natumine bantu ba kwiya na kukwita nenyi? Mambo ka o wabujijile kwiya? Abya walangulukilenga’mba kechi nakonsha kukunemeka nenyi?”+
38 Balamu wamukumbwile Belaka amba: “Amiwa naiya kwi anweba. Nanchi musakunswisha ñambepo nyi? Amiwa nsakwambatu byambo byonka bisakumbuula Lesa.”+
39 Onkao mambo, Balamu wayijile pamo ne Belaka ku Kiliata-huzota.
40 Kabiji Belaka walambwile bañombe ne mikooko ne kutumapo bamo kwi Balamu ne ku bakulumpe bo ajinga nabo.
41 Kabiji byo bwakile lukelo Belaka wasendele Balamu ne kumutwala ku Bamoti-baela; konkakwa ko ko amwene bantu bonse.+
Tubyambo twa munshi
^ Kyamweka, Ufelata.
^ Nangwa’mba “kyalo.”
^ Nangwa’mba “kyalo.”
^ Mu Kihebelu, “mbongolo mukazhi.”
^ Mu Kihebelu, “waasamikile kanwa ka mbongolo mukazhi.”
