Kubala 30:1-16
30 Kabiji Mosesa waambijile bakulumpe+ ba mikoka ya bena Isalela amba: “Yehoba wakambizha bino amba:
2 Umvwe mwanamulume wachipa luchipo+ kwi Yehoba nangwa wachipa luchipo+ lwa kwikanya mwine* kuba kintu, wafwainwa kwilufikizha.+ Akobe bintu byonse kwesakana na mo achipijile.+
3 “Kabiji umvwe mwanamukazhi wachipa luchipo kwi Yehoba nangwa wachipa luchipo lwa kwikanya kuba kintu saka akiji mwanyike kabiji ukikala mu nzubo ya bashanji,
4 ne bashanji inge baumvwa luchipo lo achipa nangwa luchipo lwanji lwa kwikanya* kuba kintu kabiji babula kumukanya, ko kuba’mba luchipo lwanji akelufikizhe, ne luchipo lonse lo achipile lwa kwikanya kuba kintu wafwainwa kwilufikizha.
5 Pakuba umvwe bashanji baumvwa luchipo lo achipa nangwa luchipo lwanji lwa kwikanya kuba kintu kabiji bamukanya, ko kuba’mba kechi akelufikizhe ne. Yehoba ukamulekelako mambo, mambo bashanji bamukainye.+
6 “Pano bino, umvwe wasongolwa saka achipa kala nangwa walayile na kanswatu kuba kintu,
7 ne mwatawanji wikyumvwa kabiji pa juba jo ekyumvwa wabula kumukanya, ko kuba’mba luchipo nangwa luchipo lwanji lwa kwikanya kuba kintu lo achipile mwine, akelufikizhe.
8 Pakuba umvwe mwatawanji wamukanya pa juba jo elumvwa, wakonsha kwalula lolo luchipo ke lwatu nangwa kintu kyo alayile mwine na kanswatu,+ kabiji Yehoba ukamulekelako mambo.
9 “Bino umvwe mwanamukazhi wafwilwa nangwa ye bakana wachipa luchipo, kintu kyonse kyo achipile akekifikizhe.
10 “Pano bino, umvwe mwanamukazhi wachipa luchipo nangwa luchipo lwa kwikanya kuba kintu saka asongolwa,
11 ne mwatawanji wilumvwa kabiji wabula kumukanya, ko kuba’mba luchipo nangwa luchipo lwanji lwa kwikanya kuba kintu lo achipile mwine, akelufikizhe.
12 Pakuba umvwe mwatawanji pa juba jo aumvwine luchipo lonse lo achipile nangwa luchipo lwanji lwa kwikanya kuba kintu wilwalula ke lwatu, ko kuba’mba kechi akelufikizhe ne.+ Mwatawanji byo akelwalula ke lwatu, Yehoba ukamulekelako mambo.
13 Pa mambo a luchipo lonse nangwa luchipo lwa kwikanya kuba kintu, lwa kusankilapo* kuba bintu bimo, mwatawanji ye ukamulengela kwilufikizha nangwa ne.
14 Bino umvwe papita moba avula ne mwatawanji wabula kumukanya, ko kuba’mba ukamulengela kufikizha luchipo lonse nangwa luchipo lwanji lwa kwikanya kuba kintu lo achipile. Ukamulengela kwilufikizha mambo kechi wamukainye pa juba jo amumvwine na kuchipa ne.
15 Bino umvwe waalula luchipo lwanji ke lwatu, pa kupitapo moba kufuma pa juba jo elumvwine, ko kuba’mba bakamutwika bubi bwa mukazhanji.+
16 “Ano o malamuna Mosesa o bamukambizhe kwi Yehoba pa mambo a mwanamulume ne mukazhanji, ne pa mambo a shanji ne mwananji wa mukazhi ukiji mwanyike ukikala mu nzubo yanji.”
Tubyambo twa munshi
^ Nangwa’mba “kukanya mweo wanji.”
^ Nangwa’mba “mweo wanji.”
^ Nangwa’mba “luchipo lwa kumanyika mweo.”
