Salamo 139:1-24
Wa kwa ntangi. Salamo wa Davida. Lwimbo.
139 Anweba Yehoba, mwantalatala kabiji mwangyuka.+
2 Muyuka byo ngikala ne byo ñimana.+
Ne milanguluko yami mwiiyukilatu kwalepa.+
3 Muntalatala* byo ñenda ne byo ndaala;Mwayuka mashinda ami onse.+
4 Saka nkyangye kwamba kyambo na kanwa kami,Anweba Yehoba mwikiyukila jimo.+
5 Mwanzhokoloka kulutwe ne kunyuma;Kabiji mwatenteka kuboko kwenu pe amiwa.
6 Bintu byo mwayuka pe amiwa byazhika.*
Kechi nakonsha kwibikwatakanya ne.*+
7 Kwepi ko nakonsha kunyemena kuchina mupashi wenu,Kabiji kwepi ko nakonsha kufyama ko mwakonsha kubula kummona?+
8 Inge nakanjila mwiulu, mukekala monka,Kabiji inge naanshika mwanya wami mu Kilende,* mukekala monka.+
9 Inge nauba namba ntumbuke na byapi bya lukeloKuya na kwikala kwalepa na kalunga ka mema,
10 Nakotu kuboko kwenu kukantangijilaNe kuboko kwenu kwa kilujo kukankwata.+
11 Inge naamba namba: “Kine, mfishi ikamvweta!”
Ponkapo bufuku bwanzhokoloka, bukaluka ke kyeya.
12 Nangwatu mfishi kwi anweba kechi ikekala yafiita ne,Bino bufuku bukatokatu nobe mute;+Mfishi ijitu nobe kyeya kwi anweba.+
13 Mambo yenu mwalengele mafyo ami;Byo najinga munda mwa bamama, mwangabenye nobe na kipembe.+
14 Nkemutotanga mambo nalengelwe mu jishinda ja kukumya.+
Mingilo yenu yawama,+Kino nekiyukisha* bingi.
15 Bikupa byami kechi byafyamine kwi anwebaByo nalengelwe mwafyamika,Byo nakomenenga munda mwa bamama* ne.+
16 Meso enu ammwene saka nji munda;*Binungwa bya mubiji wami byonse byanembelwe mu buku wenuNe moba o byalengejilwengamo,Nangwa kya kuba kechi kwakijingapo nangwa kimo kyamwekele ne.
17 Milanguluko yenu byo neinemekapo!+
Anweba Lesa, yonse byo yavulapo!+
18 Inge nauba namba neibale, yavula bingi kukila busenga.+
Nangwa nabuuka lukelo, ntwajijilatu na kwiibala.*+
19 Anweba Lesa, nanchi inge mwibepaya babi!+
Ne bantu bakanama* bakangamuka,
20 Bonka bamba bintu byatama* pe anweba;Bo balwanyi benu bengijisha jizhina jenu mu jishinda jabula kufwainwa.+
21 Anweba Yehoba, nanchi kechi nashikwa aba bemushikwa,+Ne kushikwa aba bemusatukila nenyi?+
22 Nebashikwa bingi;+Baaluka ke balwanyi bami.
23 Anweba Lesa, nkebakebai ne kuyuka muchima wami.+
Mpimapimai ne kuyuka milanguluko yami yankatazha.*+
24 Monai mwi amiwa inge mujipo kyatama,+Ne kuntangijila+ mu jishinda ja myaka ne myaka.
Tubyambo twa munshi
^ Mu Kihebelu, “mupima.”
^ Nangwa’mba “kechi nakonsha kwibyumvwisha ne.”
^ Nangwa’mba “byankumisha bingi.”
^ Nangwa’mba “Mweo wami wayuka.”
^ Mu Kihebelu, “munshi ya ntanda.”
^ Mu Kihebelu, “jishi.”
^ Nangwa, “Ngikala nenu.”
^ Nangwa’mba “bazhatwa na mambo a mashi.”
^ Nangwa’mba “monka mwayila mulanguluko wabo.”
^ Nangwa’mba “bijikila.”