Salamo 31:1-24
Kwi ntangi. Lwimbo wa kwa Davida.
31 Anweba Yehoba, mwi anweba mo mo mfyama.+
Kechi mundeke kindenge bumvu ne.+
Mpokololai na mambo a bololoke bwenu.+
2 Ntelekai.*
Iyai bukiji mumpokolole.+
Ikalai mutumba wami wakosa wa kufyamamo,Mpunzha iji na nsakwa yakosa ya kumpulushishamo.+
3 Mambo anweba yenu jibwe jami jikatampe kabiji mwi nsakwa yami yakosa;+Na mambo a jizhina jenu,+ mukantangijila ne kumbuula mwa kuya.+
4 Mukamfumya mu bukonde bo banta mu bufyamfya,+Mambo anweba mwi nsakwa yami.+
5 Napana mupashi wami mu maboko enu.+
Anweba Yehoba Lesa wa bukine,* mwankuula.+
6 Nashikwa boba bapopwela bankishi, bintu byatutu,Pakuba amiwa, naketekela mwi Yehoba.
7 Nkasekela bingi mu butemwe bwenu bubula kwaluka,Mambo mwamona kumanama kwami;+Mwayuka bya malwa* byami bikatampe.
8 Kechi mwampana ku mulwanyi ne,Bino mwandengela kwimana mu mpunzha yazhikijilwa.*
9 Ngubilai lusa anweba Yehoba, mambo namanama.
Bya malwa byalengela meso ami+ ne mubiji* wami yense kukooka.+
10 Bumi bwami bwakooka na mambo a bulanda+Ne myaka yami yo ya kubinzatu.+
Bulume bwami bwapwa na mambo a bubi bwami;Bikupa byami byakooka.+
11 Balwanyi bami bonse banseka,+Kikatakata bekala kipikipi ne amiwa.
Kabiji balunda nami banchina;Inge bammona nji pa mvula bantu, bannyema.+
12 Kechi banta muchima* ne, bandubako, ubatu nobe nafwa;Njitu nobe mulondo walajika.
13 Naumvwa mañwiñwi avula a bintu byatama pe amiwa;Bintu bilengesha moyo byanzhokoloka.+
Umvwe bekonkanya pamo na mambo a amiwa,Bomvwañana’mba bonaune bumi* bwami.+
14 Bino amiwa naketekela mwi anweba Yehoba.+
Ñamba namba: “Anweba yenu Lesa wami.”+
15 Bumi bwami buji mu kuboko kwenu.
Mpokololai ku maboko a balwanyi bami ne ku a boba bammanyika.+
16 Mubilai bibusa kalume wenu.+
Mpokololai na butemwe bwenu bubula kwaluka.
17 Anweba Yehoba, inge nemwita, kange mundeke kindenge bumvu ne.+
Babi kibalenge bumvu;+Bazhindametu mu Kilende.*+
18 Byatunwa byamba bubela bizhindamepo,+Byatunwa byamba na kwitota pa muntu waoloka, na kwilundumika ne milengulwila.
19 Buwame bwenu byo bwavulapo!+
Mwibulamina boba bemwakamwa,+Kabiji mwibumwesha ku bantu bonse na mambo a boba bafyama mwi anweba.+
20 Mukebafya mu mpunzha yenu yafyamika+Ku bintu byatama bilanguluka bantu;Mukebafya mwenu mo mwikalaKu bantu bebambila byatama.*+
21 Yehoba atotwe,Mambo wammwesha butemwe bwanji bubula kwaluka+ mu jishinda ja kukumya byo naji mu muzhi ye balukuka.+
22 Pakuba amiwa nekatezhenga bingi ne kwamba’mba:
“Nkafwila ku meso enu.”+
Bino mwaumvwine misashijilo yami ya kukeba bukwasho byo nemwichile.+
23 Temwai Yehoba, anweba bonse ba kishinka banji!+
Yehoba uzhikijila bantu ba kishinka,+Bino ukakabisha yense wilundumika.+
24 Chinchikai ne kukosa,+Anweba bonse mubena kupembelela Yehoba.+
Tubyambo twa munshi
^ Nangwa’mba “Kunamai ne kunteleka.”
^ Nangwa’mba “Lesa wa kishinka.”
^ Nangwa’mba “lumanamo lwa mweo wami.”
^ Nanagwa’mba “mpunzha yabaya.”
^ Nangwa’mba “mweo wami ne jivumo jami.”
^ Nangwa’mba “bamvuluka.”
^ Nangwa’mba “mweo.”
^ Mu Kihebelu, “Ku njimi ya lutobo.”