Salamo 33:1-22
33 Anweba baoloka, imbainga na lusekelo na mambo a bintu byauba Yehoba.+
Kyayilamo bingi baoloka kumutota.
2 Musanchilai Yehoba na kyansa;Mwimbilai nyimbo ya kumutota kwingijisha kijimba kya mizhinge jikumi.
3 Mwimbilai lwimbo mupya;+Imbai bulongo na kijimba kya mizhinge, pamo na nyimbo ya lusekelo.
4 Mambo byambo bya Yehoba byaoloka,+Ne bintu byonse byo oba byo bya kishinka.
5 Aye watemwa bololoke ne bunchibamambo bwaoloka.+
Ntanda yayula na butemwe bwa Yehoba bubula kwaluka.+
6 Jiulu jalengelwe na jiwi ja Yehoba,+Ne bintu byonse bijimo* byalengelwe na muya wa mu kanwa kanji.
7 Aye ukonkanya pamo mema a mu tulunga kwikala nobe kizhiba;+Ulonga mema avula mu matala.
8 Ntanda yonse yakamwe Yehoba.+
Bantu bonse bekala pano panshi bamwakamwe.
9 Mambo aye waambile, kabiji kyamwekele;+Wakambizhe, kabiji kyaikajikilwe.+
10 Yehoba wavulañanya milanguluko* ya bisaka bya bantu;+Waalulula bifuukula* bantu.+
11 Pakuba bintu bifuukula* Yehoba bikekala myaka ne myaka;+Milanguluko ya mu muchima wanji kechi yaluka ne.
12 Kyo kya lusekelo akya kisaka kya bantu kiji na Lesa wakyo Yehoba,+Bantu bo asala kwikala bunonshi bwanji.+
13 Yehoba mwiulu utala panshi;Umona baana ba bantu bonse.+
14 Kufuma mwanji mo ekala
Umona bonse bekala pano pa ntanda.
15 Ye walengele michima ya bonse;Utalatala mingilo yabo yonse.+
16 Kafwako mfumu nangwa umo ye bapulusha ku nzhita ikatampe ne;+Kilobo kechi upuluka na mambo a bulume bwanji bukatampe ne.+
17 Mbili kechi wakonsha kupulusha* muntu ne;+Bulume bwanji bukatampe kechi bwakonsha kupokolola muntu ne.
18 Umvwai! Meso a Yehoba atalatala pa boba bamwakamwa,+Aba batengela butemwe bwanji bubula kwaluka,
19 Kuba’mba ebapokolole* ku lufuNe kwibalama na bumi mu kimye kya kipowe kya nzala.+
20 Tubena* kupembelela Yehoba.
Aye ye nkwasho wetu kabiji ye jikebo jetu.+
21 Michima yetu yasangalela mwi aye,Mambo twaketekela mu jizhina janji jazhila.+
22 Anweba Yehoba, butemwe bwenu bubula kwaluka bwikale pe atweba,+Byo tubena kwimupembelela.+
Tubyambo twa munshi
^ Mu Kihebelu, “nzhita yonse.”
^ Nangwa’mba “maana.”
^ Nangwa’mba “milanguluko ya.”
^ Nangwa’mba “byuba.”
^ Nangwa’mba “kushinda.”
^ Nangwa’mba “mweo wabo.”
^ Nangwa’mba “Mweo wetu ubena.”
