Mitonyi 11:1-40
11 Yefita+ mwina Gileada wajinga kitonzhi; wajinga mwana wa mwanamukazhi pite, kabiji Gileada ye wajinga shanji Yefita.
2 Pano bino, muka Gileada naye wamusemejile baana. Baana banji bo asemejile mu mukazhanji byo bakomene, bamupangile Yefita ne kumwambila’mba: “Obewa kechi ukekalapo na buswanyi mu nzubo ya batata ne, mambo wi mwana wasemwa ku mwanamukazhi mukwabo.”
3 Onkao mambo, Yefita wanyemeneko ku balongo banji ne kuya na kwikala mu Toba. Kabiji banabalume babujile bya kuba bakwatankene ne Yefita, ne abo bamulondejilenga.
4 Byo papichile kimye, bena Amonyi balwilenga na bena Isalela.+
5 Kabiji bena Amonyi byo balwilenga na bena Isalela, ponkapotu bakulumpe ba mu Gileada bayile ku kyalo kya Toba na kumuleta Yefita.
6 Baambijile Yefita amba: “Iyai mwikale mukulumpe wetu wa nzhita, pa kuba’mba tulwe na bena Amonyi.”
7 Bino Yefita washikishe bakulumpe ba mu Gileada amba: “Nanchi kechi yenu mwanshikilwe bingi kya kuba mwampangile ne mu nzubo ya batata nenyi?+ Pano mambo ka o mwaishila kwi amiwa byo muji mu bya malwa?”
8 Ponkapo bakulumpe ba mu Gileada bamukumbwile Yefita amba: “O ene mambo o twaishila kwi anweba. Inge muye ne atweba ne kulwa na bena Amonyi, mukekala ntangi wetu wa bangikazhi bonse ba mu Gileada.”+
9 Onkao mambo, Yefita waambijile bakulumpe ba mu Gileada amba: “Inge mumbwezhe kuba’mba ngye na kulwa na bena Amonyi, ne Yehoba akanshinjilebo, po po nkekala ntangi wenu!”
10 Bakulumpe ba mu Gileada bamwambijile Yefita amba: “Yehoba ekale kamonyi* wetu, inge tukabule kuba byonka byo mwaamba.”
11 Onkao mambo, Yefita wayile na bakulumpe ba mu Gileada ne bantu bamutongwele kwikala ntangi wabo ne mukulumpe wa nzhita. Kabiji Yefita wabwezhezhepo kwamba byambo byanji byonse ku meso a Yehoba mu Mizipa.+
12 Kepo Yefita atumine baluwe kwi mfumu wa bena Amonyi+ amba: “Ñanyi kintu kyo nemuba,* kimulengela’mba mwiye na kulukuka kyalo kyami?”
13 Mfumu wa bena Amonyi waambijile baluwe ba kwa Yefita amba: “Mambo bena Isalela baangachile kyalo kyami kimye kyo bafuminenga mu Ijipita,+ kufuma ku Alanonyi+ kufika ku Yaboka, kukafika ne ku Yodano.+ Pano kibwezhetu mu mutende.”
14 Bino Yefita watumine jibiji baluwe kwi mfumu wa bena Amonyi
15 na kumwambila’mba:
“Abino byo byaamba Yefita amba: ‘Bena Isalela kechi baangachile kyalo kya bena Moabu+ ne kyalo kya bena Amonyi+ ne,
16 mambo kimye kyo balupukile mu Ijipita, bena Isalela baendele mu kiselebwa kukafika ne ku Kalunga ka Mema Kachila+ ne kukafika ku Kadeshi.+
17 Kepo bena Isalela batumine baluwe kwi mfumu wa Edomu+ amba: “Mwane tuswishai tupite mu kyalo kyenu,” bino mfumu wa Edomu kechi waswile ne. Kabiji kwi mfumu wa Moabu+ nako batumineko mawi, ne aye kechi waswile ne. Onkao mambo, bena Isalela batwajijile kwikala mu Kadeshi.+
18 Byo baendelenga mu kiselebwa, basezhezhe kyalo kya Edomu+ ne kyalo kya Moabu. Bapichijile ku musela wa kyalo kya Moabu+ ne kutebelela mu kibunji kya Alanonyi; kechi batwelele mu mupaka wa Moabu+ ne, mambo Alanonyi ye wajinga mupaka wa Moabu.
19 “‘Bena Isalela batumine baluwe kwi Sihona mfumu wa bena Amoli, mfumu wa Heshibonyi, kabiji bena Isalela bamwambijile’mba: “Mwane tuswishai tupite mu kyalo kyenu byo tubena kuya ku mpunzha yetu.”+
20 Bino Sihona kechi wibaketekejile bena Isalela kuba’mba ebaswishe kupita mu nyaunda yanji ne, onkao mambo Sihona wakonkenye pamo bantu banji ne kutebelela mu Yahaza ne kulwa na bena Isalela.+
21 Na mambo a kino, Yehoba Lesa wa Isalela, wapaine Sihona ne bantu banji bonse mu maboko a bena Isalela, ne kwibashinda bebashinjile kabiji bena Isalela batambwile kyalo kyonse kya bena Amoli, bene bena kyalo.+
22 Byonkabyo, batambwile nyaunda yonse ya bena Amoli kufuma ku Alanonyi kufika ku Yaboka ne kufuma ku kiselebwa kufika ku Yodano.+
23 “‘Yehoba Lesa wa Isalela ye wapangile bena Amoli ku bena Isalela,+ nanchi pano mwakeba kwibapangamo nyi?
24 Nanchi kechi muji na bintu lesa wenu aye Kemoshi+ byo emupa kwikala byenu nenyi? Onkao mambo, yense ye apangamo kala ku meso etu Yehoba Lesa wetu, ye ye tusakupangamo.+
25 Nanchi anweba mwakila Belaka+ mwana wa kwa Zipole, mfumu wa Moabu nyi? Nanchi aye watobokelepo na bena Isalela, nangwa kulwapo nabo nyi?
26 Bena Isalela byo baikelenga mu Heshibonyi ne mande anji,*+ mu Aloa ne mande anji, ne mu mizhi yonse iji kwipi na bitulu bya Alanonyi pa myaka 300, mambo ka o mwabujile kwiitambula mizhi mu kyonkakya kimye?+
27 Amiwa kechi nemulengapo mambo ne, bino anweba mwauba kintu kyatama pa kundukuka. Yehoba aye Mutonyi,+ lelo jino achibile mambo bena Isalela ne bena Amonyi.’”
28 Bino mfumu wa bena Amonyi kechi wateleko muchima ku mawi a kwa Yefita o amutumijile ne.
29 Mupashi wa Yehoba waishile pe Yefita,+ ne aye wapichile mu Gileada ne mu Manase ne kuya ku Misipa wa mu Gileada,+ kabiji wafumine ku Misipa wa mu Gileada ne kuya ku bena Amonyi.
30 Kepo Yefita achipile luchipo+ kwi Yehoba amba: “Inge mukapane bena Amonyi mu kuboko kwami,
31 ko kuba’mba yense ukalupuka mu kibelo kya nzubo yami na kuntundaila kimye kyo nkabwela mu mutende kufuma ku bena Amonyi, ukekala ke wa kwa Yehoba,+ kabiji nkamulambula kwikala mulambo wa kusoka.”+
32 Kepo Yefita ayile na kulwa na bena Amonyi, ne Yehoba wibapaine mu kuboko kwanji.
33 Wibatapile bavula bingi kufuma ku Aloa kukafika ne ku Minifi—mizhi 20—kukafika ne ku Abela-kelamimu. Bena Amonyi bebashinjile ku bena Isalela.
34 Kepo Yefita abwelele ku nzubo yanji mu Mizipa,+ kabiji mwananji wa mukazhi walupukile na kumutundaila, saka emba munsakayi ne kuzha! Ye mwana ye ajingatu nanji. Kechi wajingapo na mwana mukwabo wa mulume nangwa wa mukazhi ne.
35 Byo amumwene, watabwile bivwalo byanji ne kwamba’mba: “Mama, mwanami! Walala muchima* wami, mambo yobe ye nsakupana. Namulayile Yehoba, kabiji kechi nakonsha kwalulula ne.”+
36 Bino mwananji wamwambijile’mba: “Tata, inge mwamulayile Yehoba, ngubai monka mwayila kyo mwalayile,+ mambo Yehoba wimushinkenyako balwanyi benu, bena Amonyi.”
37 Kepo aambijile bashanji amba: “Ngubilai kino: Munswishe ngikale kwa bunke pa bañondo babiji, kabiji ngye ku mitumba na kujila bukisungu bwami na bakwetu banabakazhi.”*
38 Kabiji aye wamwambijile’mba: “Yanga!” Byonkabyo, wamuswishishe kuya pa bañondo babiji, kabiji aye wayile ku mitumba na balunda nanji na kujila bukisungu bwanji.
39 Bañondo babiji byo bapwile, wabwelele kwi bashanji, kabiji wafikizhe luchipo lo achipile pa mambo a aye.+ Kechi walaajilepo na mwanamulume ne. Kabiji kino kyaikele ke kisho* mu Isalela:
40 Pa mwaka pa mwaka, bansongwakazhi ba mu Isalela bayanga na kutakaika mwana wa mukazhi wa kwa Yefita mwina Gileada moba ana mu mwaka.
Tubyambo twa munshi
^ Mu Kihebelu, “awa witumvwa.”
^ Mu Kihebelu, “Ki ka kwi amiwa ne kwi anweba.”
^ Nangwa’mba “azhokolokako.”
^ Mu Kihebelu, “Wambwezha panshi.”
^ Nangwa’mba “kujila pamo na bakwetu mambo kechi nkasongolwapo ne.”
^ Nangwa’mba “jilamuna.”
