Mitonyi 17:1-13
-
Bankishi ba kwa Mika ne ñanga wanji (1-13)
17 Kwajinga muntu umo waikalanga mu kibunji kya mitumba kya Efelaimu,+ jizhina janji Mika.
2 Waambijile bainanji amba: “Mali a siliva 1,100 o bemusendejile onka emulengejile’mba mufingañane, ne amiwa saka ñumvwa—yami nji nao. Yami neasendele.” Ponkapo bainanji baambile’mba: “Yehoba apeshe mwanami.”
3 Onkao mambo, wabwezhejile bainanji mali a siliva 1,100, bino bainanji baambile’mba: “Ano mali a siliva afuma mu kuboko kwami, nsakwiazhijika kwi Yehoba kuba’mba mwanami akeengijishe kulengelamo kipashañano kya kusonga ne kya kyela.+ Pano nakubwezhezhao.”
4 Byo abwezhejile bainanji mali a siliva, bainanji bashikwilepo mali a siliva 200 ne kwiapana ku sendwe wa siliva. Aye walengele kipashañano kya kusonga ne kya kyela; kabiji bebibikile mu nzubo ya kwa Mika.
5 Mika wajinga na nzubo ya balesa, kabiji walengele kajilaya kabula maboko+ ne bankishi*+ ne kutongola* mwananji wa mulume umo kwikala ñanga wanji.+
6 Mu oa moba, kechi mwajinga mfumu mu Isalela ne.+ Muntu yense waubanga kyonka kyo amona* amba kijitu bulongo.+
7 Kwajinga nsongwalume wa ku Betelema+ mu Yuda waikalanga mu kisemi kya kwa Yuda. Wajinga mwina Levi+ waikajilenga kokwa pa kimye kimo.
8 Uno mwanamulume wafumine mu muzhi wa Betelema mu Yuda ne kuya na kukeba pa kwikala. Byo ajinga pa lwendo, wafikile ku kibunji kya mitumba kya Efelaimu, ku nzubo ya kwa Mika.+
9 Kepo Mika amushikishe’mba: “Wafuma kwepi?” Aye wakumbwile’mba: “Amiwa nemwina Levi nafuma ku Betelema mu Yuda, kabiji nji pa lwendo lwa kuya na kukeba pa kwikala.”
10 Kepo Mika amwambijile’mba: “Ikala ne amiwa, wingilenga nobe shetu* kabiji ñanga wami. Pa mwaka pa mwaka nkakupanga mali a siliva jikumi ne bivwalo ne kajo.” Onkao mambo, uno mwina Levi waikele.
11 Byonkabyo, uno mwina Levi waswile kwikala na uno muntu, kabiji uno nsongwalume waikeletu nobe mwananji.
12 Kabiji Mika watongwele* uno mwina Levi kwikala ñanga wanji,+ kabiji waikalanga mu nzubo ya kwa Mika.
13 Kepo Mika aambile’mba: “Pano nayuka namba Yehoba ukangubila bintu byawama, mambo mwina Levi waikala ñanga wami.”
Tubyambo twa munshi
^ Nangwa’mba “bipashañano bya telafimu.”
^ Mu Kihebelu, “kuyuzha kuboko kwa.”
^ Nangwa’mba “byo alanguluka’mba byawama.”
^ Nangwa’mba “ubulañana maana.”
^ Mu Kihebelu, “wayuzhizhe kuboko kwa.”
